АСТАНА, 5 мамыр — Sputnik. Қазақстандық бокс сүйер қауым орта салмақтағы WBA Super, WBC, IBF және IBO тұжырымдары бойынша әлем чемпионы Геннадий Головкиннің (37-0-1, 33 КО) жекпе-жегін көре алмауы мүмкін, деп хабарлады Sports.kz.
5 мамырда (Қазақстанда 6 мамыр таңертең) Головкин Карсонда (АҚШ, Калифорния штаты) америкалық боксшы Ванес Мартиросянға (36-3-1, 21 КО) қарсы жекпе-жек өткізеді.
GGG-дің ВКонтактедегі ресми парақшасындағы мәлімет бойынша, қазіргі таңда бұл жекпе-жекті көрсету құқығын 151 ел сатып алған, бұл ресми мәлімет. Айта кетейік, жергілікті телеарналармен келіссөздер жүргізіліп жатқанына қарамастан бұл тізімде Қазақстан жоқ.
Головкин — Мартиросян жекпе-жегі жексенбі күні Астана уақытымен сағат 09:00-де басталады.
