НҰР-СҰЛТАН, 26 шілде – Sputnik. Екі бөлмелі пәтердің ұтысына қатысу үшін құжат толтырудың қажеті жоқ. Оған 25 маусым мен 31 тамыз аралығында вакцинаның бірінші компонентін алған 18 жастан асқан елорда тұрғындары автоматты түрде қатысады, деп хабарлады әкімдіктің ресми сайты.
"Ұтыс ойынының жеңімпаздарын анықтау үшін Birge платформасында арнайы рандомайзер сервисі орнатылған, ол жүлде иелерін вакциналаудан өткендердің ID генерациясымен таңдайды. Оны әзірлеуге IT-қауымдастық атсалысты. Бұл сервис денсаулық сақтау министрлігінің ақпараттық жүйесімен біріктірілген", - делінген ресми хабарламада.
Ал пәтер ұтысының қорытындысы қыркүйек айының басында жарияланады. Ұтыс ойынына қаладағы кез келген вакциналау пунктінде екпе алғандар автоматты түрде қатысады.
Айта кетейік, "MEGA Silk Way" СОО-ның вакциналау пунктінде екпе алғандар арасында автокөлік ұтысы өтеді. Оған қоса Нұр-Сұлтан қаласының әкімдігі апта сайын тікелей эфирде iPhone12 және басқа да бағалы сыйлықтардың ұтысын өткізіп тұрады.
