НҰР-СҰЛТАН, 25 қараша – Sputnik. Елордалық полиция ауа райының қолайсыздығына байланысты автокөлік иелері мен жаяу жүргіншілерге жолда барынша мұқият болуды ескертті.
Астанада түні бойы қар жауды. Салдарынан жолдарды қалың қар басып, көлік қатынасы қиындады. Қалалық полиция департаментінің ақпаратынша, қазір арнайы техника көшелерді қардан тазалап жүр. Олар тәулік бойы жұмыс істейді.
"Жүргізушілерді мұқият болуға және көліктерін жол бойына қоймауға, қоғамдық көліктің қозғалысына және қар тазалаушы техниканың жұмысына кедергі келтірмеуге шақырамыз. Жол қозғалысы ережелерін, жылдамдық режимі мен қауіпсіз ара қашықтықты қатаң сақтаңыздар",- делінген хабарламада.
Полиция көктайғақ пен бұрқасын жолдағы адамдарға қауіп төндіретінін атап өтіп, жүргізушілерге өз бағдарын алдын ала жоспарлауға, қала сыртына шықпауға кеңес берді.
Жаяу жүргіншілерге де барынша сақ болу керектігін ескертті. Жолды кесіп өтерде телефонға телмірмей, құлаққапты шешіп, көлік жүріп келе жатпағанына көз жеткізген абзал.
Елорда полицейлері тұрғын үйлерге қызмет көрсететін компаниялар да ауладағы қарды уақытында тазалауы қажет екенін мәлімдеді.
Оқи отырыңыз:
