НҰР-СҰЛТАН, 1 маусым – Sputnik. Денсаулық сақтау министрі Алексей Цой елдегі эпидемиологиялық ахуал туралы баяндады, деп хабарлайды Sputnik Қазақстан тілшісі.
Министр республика бойынша коронавируспен ауыру деңгейі төмендеп келе жатқанын атап өтті. Өткен аптамен салыстырғанда соңғы жұмада індетке шалдыққандар саны 15 мыңнан 12 мыңға дейін төмендеген.
"Жалпы соңғы айда ауыру көрсеткіші 1,6 есе азайды. Қазіргі таңда эпидемиологиялық жағдай тұрақталуда, өңірлердің қызыл аймақтан біртіндеп шығып жатқаны байқалады, коронавируспен ауыру реалистік сценарий бойынша өрбіп келеді", - деді Цой үкімет отырысында.
Айтуынша, күн сайынғы мониторингке сәйкес елде инфекциялық төсек-орындар 28 процентке (9 984), реанимациялық төсек-орын 24 процентке (777) толы.
Оқи отырыңыз: Қазақстанда коронавирус жұқтырғандардың саны күрт төмендеді
Министр тұрақты жағдайды сақтау үшін әкімдіктер вакциналау қарқынын арттырып, халық арасында түсіндіру жұмысын күшейтуі керек екенін айтты.
