Ноутбук

Қазақстанда интернет арқылы қанша ақша табуға болады

1419
(Жаңартылды 14:02 16.02.2020)
Бүгінде Қазақстан Youtube-ті пайдалану жағынан әлем бойынша төртінші орында тұр. Соған қарамастан, осы желінің жарнамасынан түсетін ақшаның көлемі мардымсыз

НҰР-СҰЛТАН, 16 ақпан – Sputnik, Арман Асқар. Бүгінде интернет арқылы пайда тауып жатқан адамдар аз емес. Қазақстандық блогерлер мен влогерлер де сапалы контентпен табыс көруге болады деп отыр. Sputnik Қазақстан тілшісі танымал паблик және арна өкілдерімен тілдесіп, интернет арқылы қанша ақша табуға болатынын білді.

Блогер мен бизнесмен айырмашылығы

"ZTB media" бас директоры Әлішер Базарханов интернет арқылы біраз ақша табуға болады дейді. Ол үшін бір ғана арнамен шектелмеу керек. Пабликтерді де жүргізуге болады.

"Негізі, қазақ тілді блогерлер 300-400 мың теңге пайда таба алады. Бұдан бөлек, пабликтердің өздері айына, кем дегенде, 1,5 миллиондай кіріс әкеледі. "ZTB Qazaqstan" деген паблигіміз сондай ақша табады. Бұл – ең аз көрсеткіш. Біз бұқаралық ақпарат құралы болып саналамыз. Өзімдіздің блогерлеріміз, 40-қа жуық паблигіміз бар. Бізге жарнама береді немесе өзіміз ірі компанияларға барып, ұсыныс жасаймыз", - деді Базарханов Sputnik Қазақстан тілшісіне берген сұқбатында.

Оның айтуынша, отандық және шетелдік компаниялар тапсырысты айына немесе жылына береді. Сөйтіп, жарнама үшін ақша төлейді. 

"Қазіргі кезде қазақ тілінде жарнамаға тапсырыс беру көбейіп келеді. Мысалы, бір қазақи бренд бар, олар бізден бір жылға жарнама алып қойды. Youtube-те интеграциялар өте көп. Бірақ блогерлердің көбі оны жасай алмайды. Осыны үйрену керек", - деп атап көрсетті Әлішер Базарханов.

Базарханов блогерлердің басым бөлігі актер, бірақ бизнесмен емес деп отыр. Содан компанияларға барып, өз өнімін сата алмайды.

"Ал интеграция дегеніміз не? Ол - компанияларға барып, жарнамаға тапсырыс алу. Блогерлер соны жасай алмайды. Себебі блогер – контент жасайтын адам, өз рөлін ойнайтын актер. Ол бизнесмен емес. Ондайда өнімді сататын адам керек. Мысалы, Apple компаниясын екі адам ашты. Біреуі – шығармашылық адам, бағдарлама жасаушы Стив Возняк, екіншісі – өнім сататын Стив Джобс. Сол сияқты екі адам болуы керек. Сонда блогерлер көп ақша таба алады", - дейді Әлішер Базарханов.

Youtube арнаның табысы қандай

"Salem Social Media" компаниясының бас директоры Александр Аксютицтің айтуынша, бүгінде қазақ тілді арналардың қанша пайда көретіні туралы нақты есеп бар. Youtube-тің ресми әріптестері ол ақша көлемі өткен жылы 400 мың доллар болды деп отыр.

"Сонда бізде 100 қазақ тілді арна болса, әрбіреуі 4 000 доллардан пайда тапты деген сөз. Негізі, бұл көп ақша емес, тиын-тебен ғой. Өкінішке қарай, солай болып тұр. Бір қызығы, көрші Қырғызстанда аудитория аз болса да, ол елдің блогерлері Youtube жарнамасы арқылы Қазақстаннан әлдеқайда көп ақша табады", - деді Аксютиц Sputnik Қазақстан тілшісіне берген сұқбатында.

Оның сөзіне қарағанда, бүгінде Қазақстан халықтың Youtube-ті пайдалану жағынан әлем бойынша төртінші орында тұр. Соған қарамастан, осы желінің жарнамасынан түсетін ақшаның көлемі мардымсыз. Оның да өзіндік себебі бар.

"Меніңше, негізгі проблема мынада, аудиторияның басым бөлігі – қазақ тілді адамдар. Алайда жарнама берушілер дәл осы аудиторияны тұтынушы ретінде қарастырмайды. Содан тапсырыс та бермейді. Ал жарнама түспегесін ақша да болмайды. Бұның бәрі бизнес қой", - деп атап көрсетті Александр Аксютиц.

Youtube-те видеоға кірген адамдардың санына қарай ақша төлеу жүйесі де бар. Ол үшін компанияның әріптесімен келісімшартқа отыруы қажет. Осыдан кейін 1 миллион рет көрілген видео үшін 300 долларға жуық пайда көруге мүмкіндік бар. Бірақ ол видеоға түскен жарнаманың көлемі де ескеріледі.

"Алдағы уақытта веб-сериалдар танымал болады. Бұл – әлемдік тренд. Ол Қазақстанға да келді. Сосын, қазақ тілді аудиторияның өзі сериалдарды жақсы көреді ғой", - деп атап көрсетті Аксютиц.

Қазақ тілді жарнаманың жабылуы

Александр Аксютиц Youtube-тің қазақ тілді жарнаманы жауып тастағанын да айтты. Ол да табыс көлеміне кері әсерін тигізіп отыр.

"Білуімше, олар Қазақстан, Өзбекстан, Қырғызстан және тағы бірнеше елдегі бөлімшелерін жауып тастады. Ол жердегі мамандар не істейді? Мысалы, қазақ тіліндегі жарнама ролигін шығару үшін Youtube маманы оның мазмұнын қарап шығуы қажет. Маман соған жауап береді. Өткен жылы оларда қазақ тілді мамандар болған. Қазір жоқ. Меніңше, пайда түспегесін жауып тастады", - дейді ол. 

Ал "ZTB media" бас директоры Әлішер Базарханов онымен келіспейді. Қазақ тілді жарнаманы ашуға болады. Ол үшін компания менеджерлеріне хат жазу керек. 

Тағы оқыңыз: Қазақстанда бірнеше қылмыстың жазасы қатаңдатылды

"Біздің Қазақстан екенімізді, қазақ тілінің бар екенін жазып жеткізу керек. Әйтпесе, олар білмейді. Оларға жазып түсіндіру қажет. Менің ойымша, Александрдың айтқаны дұрыс емес. Өйткені олардың "Aitu" деген өздерінің жобалары бар. Сол себепті солай айтып жатыр. Қазір таргет бар, мысалы, Facebook. Таргетке қазақ теңгесін кіргізіп жатыр. Youtube-ке де қазақ тілін кіргізсе болады. Ол компания ашық, жұмыс істеуге дайын. Бірақ соны жасайтын адам жоқ", -  дейді Базарханов.

Осы орайда "ZTB media" басшысы интернет арқылы ақша тапқысы келетін адамдарға кеңес берді.

"Мысалы, көп адам өздерін көрсеткісі келмейді. Дұрыс сөйлей алмаймын, эфирге шыға алмаймын деп ойлайды. Ондай адамдар көбінесе паблик ашады. Ал танымал болғысы келетін адамдар блогер болып кетеді. Сондықтан барлығы адамның өзіне байланысты. Негізі, 2020 жылы Youtube трендте болады. Өйткені адамның бәрі Youtube-ке кіріп жатыр. Қазір бастап кетсеңіз, ертең үлкен арнаға айналасыз. Ірі компаниялардың көбісі Youtube арнаны сұрайды", - деп атап көрсетті Әлішер Базарханов.

1419
Кілт сөздер:
ақша, интернет, Қазақстан
Тақырып бойынша
Көріпкел Алматы тұрғынын 27 миллион теңгеге алдап кетті
Олимп енді ставка қабылдамайды – букмекер кеңсесінде не болып жатыр
"Тыйым салу керек": депутат мектепте неден бас тарту қажет екенін айтты
Павлодарда мектеп мұғалімінің қылмысы әшкере болды
Бас прокурордың орынбасары қазақстандықтарға үндеу жасады
кредит

Ауылда әр отбасының мойнында 900 мың теңге кредит бар ҰКП төрағасы

340
Қазіргі уақытта Қазақстан халқының 41%-і ауылды жерлерде тұрып жатыр

АЛМАТЫ, 23 қазан – Sputnik. Қазақстанда ауылдық жердегі әр отбасыда 900 мың теңге кредит бар. Бұл туралы "Атамекен" ұлттық кәсіпкерлер палатасының төрағасы Абылай Мырзахметов айтты, деп хабарлайды Sputnik Қазақстан тілшісі.

"Өткен жылы үкіметтің қолдауымен барлық ауыл орталығында скрининг жүргізілді. Оған 2 миллионнан астам үй шаруашылығы қатысты. Соның 42%-і ғана тұрақты табысы бар екенін көрсетіп отыр. Орта есеппен әр үйдің табысы – 81 мың теңге, әр адам басына шаққанда 23 мың теңгеден келеді. Әр отбасының мойнында орта есеппен 900 мың теңге кредит бар", - деді Мырзахметов сенатта ауылдық жерлердің әлеуметтік-экономикалық дамуы талқыланған парламенттік тыңдау барысында.

Айтуынша, ауылдағы мәселелерді шешу бойынша 2004 жылдан бастап алты бағдарлама қабылданған.

"Ол моноқалаларды, ауыл шаруашылығы аймағын дамытуға бағытталды. Оған 2 триллионға жуық қомақты ақша бөлінген. Әрине, жетістік жоқ деп айта алмаймыз. Көп мәселе шешілді. Бірақ ауылдың жағдайы әлі де әртүрлі болып отыр. Осындай қаражат салынғанына қарамастан қазіргі үлкен қалалар мен ауыл шаруашылығы дамыған облыстардың арасы өте алшақ болып отыр", - деді Мырзахметов 

Мысал ретінде Алматы қаласы мен Солтүстік Қазақстан облысының экономикасын салыстырды. Айтуынша, екі аймақтың жалпы экономикасының арасы – 11  есе.

"Қазақстан халқының 41%-і ауылда тұрады. 6 300-ден астам ауылды мекен орталықтары бар. Соңғы бес жыл ішінде ықшамдау саясатының арқасында 300-ден астам ауылдық мекеме қысқартылыпты", - деді ол.

Сонымен қатар Мырзахметов кәсіпкерлікті дамытуға бағытталған "Бастау" жобасы аясында атқарылған істерге тоқталды.

"Үкіметтің қолдауымен соңғы бес жылда "Бастау" жобасын іске асырып отырмыз. Жұмыссыз немесе өзін асырайтын 150 мыңға жуық азамат оқытылды. Ішінде 40 мыңға жуық азамат өз кәсібін ашты. Олардың 93%-і қазір салығын төлеп отыр", - деді кәсіпкерлер палатасының төрағасы.

Айтуынша, бүгінде барлық аудан орталығында кәсіпкерлерді қолдау орталықтары жұмыс істеп тұр.

Сонымен қатар ауыл экономикасының жалпы экономикаға әсер ететінін айтқан Мырзахметов ең алдымен бюджет мәселесін шешуді ұсынды.

Мысал ретінде ауыл шаруашылығы дамыған Ақмола облысының бюджетін көрсетті.

"Ақмола облысы бюджетінің 67%-і – әлеуметтік дамуға, экономикалық дамуға 13%-і, 10%-і – инфрақұрылымдық дамуға бөлінген. Яғни, экономиканың дамуына он процент қана қаражат бөлініп отыр. Сондықтан бюджет саясатын нақты өзгертуіміз керек ", - деді ол.

Қорыта келе, ұлттық кәсіпкерлер палатасының төрағасы ауылдың жер ресурсын тиімді пайдалану қажет екенін айтты. Әр ауыл өз шикізатын өндіруге мамандандырылуы керек. Сондай-ақ, ауылда өндірілеген затты сатуға мүмкіндік жасауды ұсынды.

340
Кілт сөздер:
кредит, ауыл
Ақша, теңге

Сайлау комиссиясында жұмыс істейтіндер қанша жалақы алады

96
Жалақы сайлауға бөлінген қаржы есебінен төленеді. Сондай-ақ, уақытынан артық жұмыс істегені үшін де ақы төленеді

НҰР-СҰЛТАН, 22 қазан – Sputnik. Орталық сайлау комиссиясы мәжіліс пен мәслихаттар сайлауы кезінде учаскелік комиссияларда жұмыс істейтін адамдардың жалақысын жариялады, деп хабарлайды Sputnik Қазақстан тілшісі.

Комиссия мүшесі Сәбила Мұстафинаның айтуынша, сайлау науқаны кезінде комиссияларда жұмыс істейтін мамандарға үш минималды еңбекақыдан төмен болмайтын жалақы белгіленеді. Бұл – заң талабы. Жалақы сайлауға бөлінген қаржы есебінен төленеді.   

"2020 жылда үкімет минималды еңбекақыны 42 500 теңге көлемінде белгілеген болатын. Сондықтан сайлау комиссияларының мүшелеріне, кем дегенде, 127 500 теңгенің (үш минималды еңбекақы - Sputnik) жалақысы төленеді. Сондай-ақ, уақытынан артық жұмыс істегені үшін де ақы төленеді. Бірақ оның көлемі айына 12 сағаттан аспауы тиіс", - деді Мұстафина ОСК-да өткен онлайн брифингте.

Оның сөзіне қарағанда, демалыс пен мереке күндері де жалақы төленеді. Бірақ әрбір адамның жұмысқа шыққаны туралы табель жүргізіледі. 

"Сондықтан жұмыс істеген уақытына қарай еңбекақы төленеді. Ал комиссия мүшелерінің жалақысы бірдей болады", - деп атап көрсетті Мұстафина.

Сайлауға қанша ақша бөлінді

Мәжіліс пен мәслихаттардың бірлескен сайлау науқанына кететін шығындардың жобалық сметасы 15,3 миллиард теңгені құрап отыр. Соның басым бөлігі сайлау комиссияларында жұмыс істейтін адамдардың жалақысына жұмсалады. 

Мәселен, осы жылдың аяғына дейін ұсынылған шығындардың сметасы - 10,8 миллиард теңге. Соның 7,3 миллиард теңгесі, яғни, жалпы шығындардың 68 проценті 10 061 сайлау комиссиясында жұмыс істейтін 70 681 адамның еңбекақысына жіберіледі. Бұдан бөлек, 3,5 миллиард теңге (32% ) бюллетеньдерді шығаруға, полиграфиялық қызметтерге, ақпараттық жұмысқа және сайлау комиссияларының ұйымдастырушылық шараларына жұмсалады.

Карантиндік ережелер де сақталады. Осыған байланысты комиссия мүшелерін жеке қорғаныс құралдарымен қамтамасыз етуге 341,4 миллион теңге бөлінеді. 

Ал келесі жылдың шығындары 4,5 миллиард теңгеге бағаланып отыр. Осы қаржының барлығы дерлік сайлау комиссияларының мүшелері алатын жалақыға жұмсалады. Себебі сайлауға дейін он-ақ күн қалады.

Сәбила Мұстафинаның айтуынша, мәжіліс пен мәслихаттар сайлауына бөлінген қаржы үнемделуі мүмкін. Сол кезде қалған қаржы бюджетке қайтарылады. Мысалы, 2019 жылы президент сайлауының қорытындысы бойынша 445 миллион теңге үнемделген. Ал биыл тамыз айында болған сенат сайлауынан 120 миллион теңге қалған. Ол ақша да бюджетке қайтарылады.

Мәжіліс пен мәслихаттар сайлауы

Мәжіліс пен мәслихаттар сайлауы 2021 жылы 10 қаңтарда өтеді. Кандидаттарды ұсыну 10 қарашада басталып, 30 қараша күні кешкі сағат 18:00-де аяқталады. Үміткерлерге қойылатын талаптар конституциялық заңда көрсетілген. Олар:

  • Қазақстан азаматтығы;
  • Қазақстан аумағында соңғы 10 жыл тұру;
  • 25 жасқа толу;
  • сайлау құқығының болуы.

Сайлаудың жарнасы 679 500 теңгені құрайды. Оны партиялық тізімге енген әрбір адам үшін төлеу керек. Ал бұған дейінгі сайлауда 7 проценттік межеден асқан партиялар – Nur Otan, Ақ жол мен Қазақстан коммунистері партиясы жарна төлемейді.

10 желтоқсан күні кешкі сағат 18:01-де сайлауалды үгіт-насихат басталады да, 2021 жылы 9 қаңтарда түнгі сағат 00:00-де аяқталады. Сол күн тыныштық күні болады. Ал 10 қаңтарда дауыс беру таңғы сағат 7:00-де басталып, кешкі сағат 20:00-ге дейін жалғасады. Дауыстарды 12 сағаттың ішінде санап шығу қажет. 

Орталық сайлау комиссиясы дауыс беру аяқталғаннан кейін жеті күннің ішінде сайлаудың нәтижесін жариялайды.

Сайлауға қанша партия қатыса алады

Мәжіліс пен мәслихаттар сайлауы 2021 жылы 10 қаңтарда өтеді. Бүгінде әділет министрлігінде алты саяси партия тіркелген. Олар:

  • Nur Otan;
  • "Ақ жол" партиясы;
  • Қазақстанның халықтық коммунистер партиясы;
  • "Ауыл" халықтық-демократиялық партиясы;
  • "Бiрлік" партиясы;
  • Жалпыұлттық социал-демократиялық партиясы.

Бүгінде парламент мәжілісінде үш партия - Nur Otan, Халықтық коммунистер мен "Ақ жолдың" өкілдері отыр.

 

96
Кілт сөздер:
жалақы, жұмыс, сайлау
Тақырып:
Мәжіліс сайлауы
Тақырып бойынша
"Бос сөз": Имашев онлайн дауыс беруге қатысты түсініктеме берді
Мәжіліс сайлауының тарихы
Мәжіліс пен мәслихат сайлауына жұмсалатын қаржы көлемі жарияланды 
Мәжіліс сайлауына қатысуға кім дайын - саяси партиялар жауап берді
Мәжіліс пен мәслихаттар сайлауында дауыс беру тәртібі жарияланды
Астана көрінісі

Қазақстанда 26 қазанда қандай маңызды оқиғалар болады

0
Sputnik Қазақстан 26 қазан мен 5 қараша аралығында болатын негізгі іс-шаралар мен оқиғаларға шолу жасайды (ақпарат толықтырылып отырады)

Қазақстанда бұқаралық іс-шараларды өткізуге уақытша тыйым салынды. Мемлекеттік органдардың мәжілістері мен баспасөз конференциялары онлайн режимде ұйымдастырылады. Десе де, біз алдағы күндерге жоспарланған іс-шаралар туралы ақпарат беруді жалғастырамыз.

26 ҚАЗАНҒА ЖОСПАРЛАНҒАН ШАРАЛАР  

08.30 – Түркия қорғаныс министрі Хулуси Акардың Қазақстанға ресми сапары. Қазақстан Республикасы қорғаныс министрлігінде Қазақстан мен Түркияның қорғаныс ведомстволары басшыларының кездесуі өтеді. Орналасқан жері: Нұр-Сұлтан, Достық көш., 14. Түркістан көшесі жағынан кіру (2 өткізу пункті). Анықтама үшін телефон: 8 (7172) 72-18-69, 72-15-59. Тіркелу үшін: 8 (7172) 72-18-69, 72-15-59.

09.00 – Ақпарат және қоғамдық даму министрлігі "Жыл еріктісі" халықаралық сыйлығына байқау жариялайды. Байқауға қатысу үшін өтінім беріп, qazvolunteer.kz интернет-платформасында волонтерлік қызмет туралы мәліметтерді толтыру керек. Өтінішт қабылдау 2020 жылдың 15 қараша күнгі сағат 09:00-ге дейін жалғасады (қосымша мәліметтер мына сілтемеде).

10.00 – Қазақстан жастары конгресі мен Нұрсұлтан Назарбаев қоры ұйымдастырған әмбебап және конвергентті журналистерді даярлауға арналған "Jas Qalam" республикалық жобасының басталуы. Жоба дәстүрлі сипатқа ие болды және үшінші рет өткізіліп отыр. Биыл оқыту екі тілде өтеді: 26 қазаннан 20 қарашаға дейін – орыс тілді аудитория үшін, ал 16 қарашадан 11 желтоқсанға дейін – қазақтілді аудитория үшін. Орыс тілді аудиторияға өтінімдер қабылдау 22 қазанда, ал қазақтілді аудитория үшін 16 қарашада аяқталады (тіркелу мына сілтеме бойынша).

10.30 – БҰҰ комитеттерінің көзқарасы бойынша сарапшылар мен жол картасы авторларының қатысуымен "Әділ сот талқылауына құқық" тақырыбындағы брифинг. Брифинг бейнеконференция форматында өтеді. Сарапшылар – Адам құқығы және заңдылықты сақтау жөніндегі Қазақстандағы халықаралық бюроның директоры Евгений Жовтис, адвокат Светлана Ковлягина, Данияр Қанафин, Алматы қалалық адвокаттар алқасының адвокаты Анар Ибраева, "Қадір-Қасиет" ҮЕҰ сарапшысы – онлайн-форматта өз ұсыныстарын республика заңнамасына енгізеді (тіркелу +7 (7172) 45-76-21 телефоны немесе prestigeedu20@gmail.com электронды  почтасы арқылы жүргізіледі).

11.00 – Интернеттегі трансляция форматындағы алаяқтықпен күрес тақырыбында ІІМ брифинг өткізеді. Спикер: ІІМ криминалдық полиция департаменті бастығының орынбасары Ерлан Омарбеков. Тақырып бойынша сұрақтар mvd_pr@mail.ru поштасы немесе 8 (705) 440 83 65 WhatsApp арқылы қабылданады.

Нұр-Сұлтан

08.30 – Түркия Республикасының қорғаныс министрі Хулуси Акардың Қазақстанға ресми сапары. Қорғаныс министрлігінде Қазақстан мен Түркияның қорғаныс ведомстволары басшыларының кездесуі өтеді (Өтетін орны: Қорғаныс министрлігі, Достық көшесі, 14. Байланыс телефоны: +7 (7172) 72-18-69, 72-15-59).

Алматы

17.00 – "Счастливые поют" музыкалық қойылымы – қос сахна саңлағы – Фрэнк Синатра мен Эдит Пиафқа арналған қойылым (Лермонтов атындағы Мемлекеттік академиялық орыс драма театры).

28 ҚАЗАНҒА ЖОСПАРЛАНҒАН ШАРАЛАР
Нұр-Сұлтан

19.00 – "Мадам Баттерфляй" операсының премьерасы, "Астана Опера" театры (Қонаев көшесі, 1. Байланыс телефоны: +7 (7172) 70 95 94).

29 ҚАЗАНҒА ЖОСПАРЛАНҒАН ШАРАЛАР

19.00 – "Дикарь. Третье слово" қойылымы, Максим Горький атындағы Мемлекеттік академиялық орыс драма театры (Нұр-Сұлтан қаласы, Желтоқсан көшесі 11-13).

31 ҚАЗАНҒА ЖОСПАРЛАНҒАН ШАРАЛАР
Нұр-Сұлтан

18.00 – ХХ ғасырдың әйгілі хореографы Ролан Петидің Лео Делибес әуенімен сахналаған "Коппелия" комедиялық балеті. Либретто Эрнст Гофманның шебер Коппелиус жасаған механикалық қуыршаққа ғашық болған жас жігіт туралы "Песка" әңгімесінің негізінде жазылған ("Астана Опера" театры, Қонаев көшесі, 1. Байланыс телефоны: +7 (7172) 70 95 94).

5 ҚАРАШАҒА ЖОСПАРЛАНҒАН ШАРАЛАР
Нұр-Сұлтан

12.00 – Эрнст Гофманның ертегісі бойынша "Щелкунчик" балеті, "Астана Опера" театры (Қонаев көшесі, 1. Байланыс телефоны: +7 (7172) 70 95 94).

Жоспарланған шаралар тізімі ашық дереккөзден алынды. Sputnik Қазақстан шаралардың уақыты мен күнінің өзгеруіне жауапты емес.

0