АСТАНА, 16 қараша — Sputnik. Алматы әуежайында тәртіп бұзған Германия азаматын Алматы-Франкфурт рейсінен алып тастады, деп хабарлады көліктегі ішкі істер департаменті баспасөз қызметі.
Ведомство ақпаратына сүйенсек, Қазақстанның көліктік полициясы үш күн науқан жүргізіп, тәртіпбұзушыларды әкімшілік жауапкершілікке тартқан. Сол жайттардың бірінде Алматы әуежайында Алматы-Франкфурт рейсінің жолаушысы ішкі істер бөліміне тапсырылған.
Полиция хабарлауынша, жолаушы 65 жастағы Германия азаматы екен, әуежайда мас күйінде жүріпті. Тәртіп бұзушы жоғарыда көрсетілген рейстен алып тасталды. Аталған дерек бойынша ҚР ӘҚБК 440-бабы 1-бөлігіне сәйкес әкімшілік хаттама толтырылды.
