АЛМАТЫ, 16 қараша – Sputnik. Сәтбаев қаласында саяжай аумағында итке таланған бүлдіршіннің мәйіті табылды. Қалалық полицияның кезекші бөліміне бұл туралы 15 қараша кешкі сағат 17.00-де "жедел жәрдем" қызметкерлері хабарлаған.
"Оқиға орнына барған дәрігерлер баланың қайтыс болғанын анықтады", – деп хабарлады Қарағанды облысының полиция департаменті Sputnik Қазақстан тілшісіне.
Содан кейін ол жерге жедел-тергеу тобы келген. Анықталғандай, қыз ата-анасымен бірге саяжай аумағындағы үйлердің бірінде тұрған. Сол күні бала ересектердің қарауынсыз жүріп, ауладағы иттердің ортасында қалған.
Оқи отырыңыз: Әбжыланмен айқасқан ит өліп бара жатып баланы құтқарып қалды – видео
Қайғылы жағдайға байланысты қылмыстық іс тіркелді. Қазіргі кезде сараптама тағайындалып, оқиғаның мән-жайы анықталып жатыр. Ветеринарлық қызметке иттерді аулау туралы бұйрық берілді.
