НҰР-СҰЛТАН, 14 қазан – Sputnik. Әлеуметтік желіде Павлодар қаласындағы жол апатының суреті тарап кетті. Toyota маркалы көлік дүкеннің кіреберісіне шығып кеткен, деп хабарлайды Sputnik Қазақстан облыстық полиция департаментіне сілтеме жасап.
View this post on Instagram
Ресми мәліметке сәйкес, оқиға қазанның 13-нен 14-не қараған түні Қатаев көшесінің бойында болған. Mercedes мінген көлік жүргізушісі тұрақтағы Toyota-мен соқтығысқан. Жапондық авто дүкеннің кіреберісінен бір-ақ шыққан.
Қазіргі кезде Mercedes жүргізушісіне іздеу жарияланды. Әкімшілік құқықбұзушылық туралы кодекстің 610-бабы ("Көлiк жүргiзушiлерінiң жол жүрісі қағидаларын адамдардың денсаулығына зиян келтiруге, көлiктің немесе өзге де мүлiктiң бүлінуіне алып келген бұзушылығы") бойынша әкімшілік өндіріс басталды.
View this post on Instagram
Осы бап бойынша кінәлі адамға 20 АЕК (58 340 теңге) мөлшерiнде айыппұл салынады немесе 6 айға дейінгі мерзiмге көлiк басқару құқығынан айырылады.
Жыл басынан бері облыста 2 075 жол апаты тіркелді.
