Дәрігер, вакцина, архивтегі сурет

"Қазақстандық вакцина салдырдым": профессор екпеге неге бірден келісті

155
(Жаңартылды 15:38 31.03.2021)
Қазақстандық вакцина салғызған профессор ерікті түрде екпе салғызуға келісуінің себебі мен отандық вакцинаның ерекшелігі туралы айтты. Сондай-ақ екпе алғаннан кейінгі жағдайымен бөлісті

НҰР-СҰЛТАН, 31 наурыз — Sputnik. Келесі айдың соңында коронавирусқа қарсы "QazCovid-in" атты қазақстандық вакцинаны сынақтан өткізу мерзімі аяқталады. Сол кезде оны жаппай шығаруға қажетті құжаттар да дайын болады деген жоспар бар. Ал клиникалық зерттеулер кезінде отандық екпе үш мыңнан астам еріктіге салынды. Олардың ішінде Қазақстанның ұлттық фтизиопульмонология ғылыми орталығы директорының орынбасары, профессор Ләззат Ералиева да бар. Sputnik Қазақстан тілшісіне сұқбат берген ғалым сынаққа не себепті бірден келіскенін және отандық вакцинаның ерекшелігі туралы айтып берді.

Вакцина шығарған ғалымдарды білемін

"COVID-19 пандемиясы басталғанда мен осы проблеманы шешудің екі-ақ жолы бар екенін анық білдім. Біріншісі – вирусқа қарсы тиімді медициналық препарат, екіншісі – вакцина. Өкінішке қарай, коронавирусты емдеу кезінде бірде-бір дәрі коронавирусты тиімді емдей алмады. Қазіргі кезде ондай препарат жоқ. Артынан вакцина да шықты", - дейді Ералиева.

Профессор отандық "QazCovid-in" вакцинасын сынақтан өткізу шаралары басталған бойда ерікті түрде екпе салғызуға келісті.

"Ресейлік вакцина әлі келмеген. Ал қазақстандық екпені сынақтан өткізуді бастаған болатын. Мен бірден өзіме салғыздым. Вирусқа қарсы иммунитеттің болғанын қаладым. Әрине, вакцинаға да сендім. Өйткені оны шығарған Биологиялық қауіпсіздік институтының қызметкерлері де барлығы бірдей өздеріне екпе салғызды. Сосын мен ол вакцинаны шығарған адамдарды жақсы білемін. Олар ғылымға қатты берілген, өз ісін жақсы біледі", - деп атап көрсетті Ералиева.

Қазақстандық және ресейлік вакцинаның айырмашылығы неде

Профессор Ералиева коронавирусқа қарсы отандық вакцинаны салғызудың тағы бір себебін атады. Оның айтуынша, "QazCovid-in"-нің технологиясын әлем бойынша 80 жылдан астам уақыт бойы қолданып келеді. Соның негізінде басқа вакциналар да шығарылады.

"Бұл жаңа бір әдіс емес, РНК-вакцина да емес. QazCovid-in – ол инактивті вакцина. Ондай технологияны әлем бойынша басқа вирустарға қарсы кеңінен қолданады", - деді Ералиева Sputnik Қазақстан тілшісіне берген сұқбатында.

Осы орайда ғалым қазақстандық және ресейлік вакцинаның айырмашылығын түсіндіріп берді.

"Олардың технологиясы екітүрлі. Мәселен, біздің вакцинамыздың құрамында инактивті вирус бар. Ғалымдар коронавирустың штамын алып, арнайы химиялық әдіспен барынша әлсіз қылған. Былайша айтқанда, инфекцияның күшін азайтқан. Ал оны вакцинамен ағзаға салғанда вирус тарамайды, бірақ антиденелер бөліне бастайды. Осылайша, иммунитет қалыптасады", - деп атап көрсетті Ералиева.

Ал ресейлік вакцина векторлық екпе болып саналады. Себебі аденовирустар вектор, яғни, вирусты ағзаға жеткізуші рөлін атқарады. Ол үшін аденовирусқа коронавирустың бір бөлшегін ғана "мінгізеді" де, вакцинамен ағзаға енгізеді. Аденовирустар оны жасушаларға жеткізгеннен кейін антиденелер, яғни, инфекцияға қарсы иммунитет қалыптасады. Қазақстандық және ресейлік вакцинаның ұқсастығы бар, екпе екі рет салынады.

"Вакцина салғанымды ұмытып кеттім"

"Мен өзім вакцина салғызғаннан кейін ешқандай реакция сезген жоқпын. Шынымды айтсам, екпе алғанымды ұмытып кетіппін. Жаттығудан кейін суға түсіп, вакцина салғызған жерді қатты ысқылап жібергеннен кейін ғана есіме түсті (күлді). Негізі, мен тұмауға қарсы вакцинаны да салғызғанмын. Себебі тұмаумен ауырсаң, иммунитет төмендейді. Демек, коронавирусты жұқтыру қаупі болады. Сондықтан алдымен тұмауға қарсы, одан кейін коронавирусқа қарсы екпе салғызып алдым", - дейді Ералиева.

Профессор Ләззат Ералиева
© Photo : Ләззат Ералиеваның жеке архивінен алынды
"Екпе алғанымды ұмытып кетіппін", - дейді профессор

Профессор маңызды бір мәселені де атап өтті. Оның айтуынша, кез келген вакцинаны салғызғаннан кейін біршама уақыт барынша сақтанып жүру керек. Адам көп жиналатын жерлерге бармаған дұрыс. Өйткені ағзада вирусқа қарсы иммунитет қалыптасуы тиіс.

"Жеті күннен кейін ағзада ақырындап антиденелер бөліне бастайды. Сондықтан осы уақытта барынша сақтанып жүрген дұрыс. Өйткені адам басқа бір инфекцияны жұқтырып алса, жағдайы нашарлап, иммунитеті төмендейді. Демек, коронавирусқа қарсы тұра алатын антиденелердің қажетті көлемі шықпай қалуы мүмкін. Сол себепті дәрігерлер вакцинадан кейін сақтық шараларын сақтауға кеңес беріп жатады", - деп атап көрсетті ғалым.

Бетпердені қашан шешеміз

Бүгінде денсаулық сақтау министрі де, бас санитарлық дәрігер де вакцинацияның арқасында шектеу шараларын барынша жеңілдетуге болатынын айтып отыр. Бірақ ол үшін халықтың жартысынан көбі екпе салғызуы қажет. Онсыз коронавирусқа қарсы ұжымдық иммунитет қалыптаспайды.

"Қазақстан халқының саны 18 миллионнан артық екенін ескерсек, 11-12 миллион адам коронавирусқа қарсы вакцина салғызуы қажет. Сонда ғана ұжымдық иммунитет қалыптасады", - дейді профессор Ералиева.

Ресми мәліметке сәйкес, осы уақытқа дейін Қазақстанда 130 мыңнан астам адам ресейлік вакцинаның бірінші компонентін салғызды. Ал екінші дозасын қабылдағандардың саны 30 мыңнан асып отыр. Денсаулық сақтау министрі Алексей Цойдың сөзіне қарағанда, сәуір айында сан алуан өндірушілерден қосымша 2,5 миллион доза жеткізіледі. Сол кезде қазақстандық вакцинаның клиникалық зерттеулері де аяқталады, тиісті құжаттары да дайын болады деген жоспар бар. Осыдан кейін вакцинаны жаппай өндіруге рұқсат беруі тиіс.

"Әрине, вакцинаны жаппай шығару үшін мықты өндіріс орны болуы қажет. Сондықтан барлығы зауыттың құрылысына байланысты. Содан болар, президент әзірше басқа вакциналарды ала тұруға ұсыныс жасады", - деп атап көрсетті Ералиева.

155
Кілт сөздер:
екпе, вакцина, коронавирус
Тақырып:
COVID-ке қарсы вакцина (161)
Тақырып бойынша
Сәуір айында 60 мыңнан астам астаналыққа вакцина егіледі
Сауда орталықтары мен базарларда вакцина салдыру үшін не істеу керек
Әлия Назарбаева коронавирусқа қарсы қытай вакцинасын салдырды – фото
Коронавирусқа қарсы вакцинадан бас тартпауға шақырамыз – денсаулық министрі
Министр Цой: Қазақстанда ақылы вакцинация жоқ
Флолиант баспасынан қайта басылып шыққан Махаббат қызық мол жылдар кітабы

"Күтпеген жағдай болды": ХХІ ғасырдың Ерболы мен Меңтайы сұхбат берді

1427
Әзілхан Нұршайықовтың "Махаббат, қызық мол жылдар" романы негізінде түсірілген телесериалда басты рөлді сомдаған актерлар түсірілім кезінде оянған сезім мен отбасылық өмірі жайлы баяндады

АЛМАТЫ, 15 сәуір – Sputnik. Абай "ғашықтың тілі – тілсіз тіл, көзбен көр де, ішпен біл" деген. Ал ел арасында "махаббат пен жөтелді жасыра алмайсың" деген сөз бар. Рас, сезім оты жүректе лаулап, жанар арқылы берілсе, сезілсе керек. Дәл осындай ғашықтық сезімін бастан өткеріп, бірнеше ай бір алаңда жұмыс істеп, артынша шаңырақ көтергендер арамызда бар. Sputnik Қазақстан бір фильмнің арқасында бағы жанған қос ғашықтың оқиғасын ұсынады.

Жуырда Әзілхан Нұршайықовтың "Махаббат, қызық мол жылдар" романының желісі бойынша түсірілген телесериал көрерменге жол тартты. Фильмнің түсірілімі төрт айға созылған. Басты рөлді Ермек Тұрғанбек пен Нарқыз Айдарова сомдады. Қос актер дәл Ербол мен Меңтайдай бір оқу орнында оқиды. Алайда олардың тағдыры роман желісінен мүлде бөлек: бастапқыда сырттай таныс болған екі жас түсірілім аяқталған соң бірден шаңырақ көтерді.

Сезім мен ой арпалысы

Кастинг онлайн форматта өткендіктен екі актер бірге рөл сомдайтынын білмеген. Түсірілімнен бір ай бұрын образды ашу мақсатында олар басқа әріптестерінен бөлек дайындалған. 

Ермек Тұрғанбек пен Нарқыз Айдарова
© Photo : Жеке архивтен
Ермек Тұрғанбек пен Нарқыз Айдарова

"Жүргенов атындағы өнер академиясына оқуға түскенімде Ермек 3-курста оқып жүрді. Бір-бірімізді сырттай білдік. Алайда ашық әңгіме айтқан емеспіз. Түсірілім кезінде, дайындық барысында таныстық. Бірден жақсы сөйлесіп кеттік деуге келмейді. Түсірілім басталмастан бір ай бұрын режиссер шақырып, рөлімізді, образымызды түсіндірді. Бір ай бойы бірге дайындалып, түсінісіп кеттік", - дейді Нарқыз.

Ал Ермек фильм түсірілімі кезінде махаббат сахнасы мен сезімге толы мәтіннің көп болғанын айтады.

"Күтпеген жағдай болды... Дайындық барысында Ербол мен Меңтайдың махаббат сахналарын сомдадық. Мәтіннің өзінде сезімді білдіру сахнасы көп еді. Дайындық кезінде ұшқын пайда болғандай көрінді. Содан түсірілімге келіп, бір жарым ай өткеннен кейін махаббат, сезім бар екенін білдім. Сезім бірінші менде оянды", - дейді Ермек.

Содан кейін жұмысты жеке өмірмен араластырмаймын деп жүрген жас жігіт өз ережесінен аттап, қызға сезімін айтқан. Қыз-жігіт болып кездесуге ұсыныс жасаған.

"Оған дейін жұмысқа тек жұмыс ретінде қарап, түсірілім алаңында ешкіммен жеке қарым-қатынас орнатпаймын деген жеке заңым болатын. Сезімді білдіру мен үшін оңай болған жоқ. Нарқыздың да маған деген ықыласын байқадым. Содан "жіберіп алуға болмайды" деген шешімге келдім", - деп еске алды Ермек.

 Актерлер түсірілім жұмыстарының жеңіл болмағанын айтты. Бастапқыда бір-бірінің денсаулығына аса қатты көңіл бөлмегенімен, уақыт өте келе қамқорлық танытқан. Ермектің айтуынша, қыз-жігіт болып кездесе бастаған соң бір-бірін демеп, қарайласқан.

"Кітап желісі бойынша Ербол мен Меңтайдың арасында махаббат сахнасы өте көп. Барынша шынайы жеткізуге тырыстық. Бір-бірімізге деген сезім бір жарым ай бірге жұмыс істегеннен кейін пайда болды дейміз, алайда алғашқы махаббат сахнасын сомдағаннан кейін іште өзгеше сезім оты жанды. Бірақ менің тарапымнан да, Ермектің тарапынан да ол айтылған жоқ. Дей тұрғанмен, бір-бірімізді алғаш көрген кезде сырттай ұнату сезімі болды", - дейді Меңтай рөлін сомдаған Нарқыз.

Ербол мен Меңтайға ұқсай ма?

Қос ғашықтың айтуынша, екеуінің арасындағы сезімді өздерінен бұрын түсірілім алаңындағылар байқаған. Тіпті түсірілім жұмыстары басталған сәтте "екеуің фильмге түсіп болған соң отбасы боласыңдар" деп те әзілдеген екен.

"Сондай сәтте "жоқ" деп бой бермеген едім. Себебі өнер саласына келген соң күйеуімнің де осы саладан болғанын қаламадым. Ермек те дәл солай өнер адамымен бас қосамын деп ойламаған. Ал қазір бір үйде екі адамның бір салада болғанына қуанамыз. Бір-бірімізді түсінеміз, ортақ әңгіме бар", - дейді Нарқыз.

Нарқыз күйеуінің бойында Әзілхан Нұршайықовтың "Махаббат, қызық мол жылдар" романындағы Ерболға тән бірнеше қасиеттің бар екенін айтты.

"Кітапта Ерболды салмақты, намысшыл азамат ретінде бейнелеген. Ермектің бойында да сондай қазақылық, намыс, өзіне тән сабырлы мінез бар. Басқа ер адамнан байқамаған қасиетті Ермектен көрдім. Мүмкін тұрмысқа шығуыма да сол әсер еткен шығар...", - дейді Нарқыз Айдарова.

"Қыз қылығымен тәтті. Ең алдымен қылықтылығы, сыпайылығы баурап алды. Әр адамның өз теңі бар дейді ғой. Маған керектің бәрін Нарқыздан таптым", - дейді Ермек.

Махаббат, қызық мол жылдар

Нұр-Сұлтан қаласында "Фолиант" баспасы "Махаббат, қызық мол жылдар" романын жаңа мұқабамен басып шығарды. Мұқабаға сериалдағы басты кейіпкерлер Ермек Тұрғанбек пен Нарқыз Айдарованың фотосын қойған. Жастар мұны естігенде көзіне жас алыпты.

Посмотреть эту публикацию в Instagram

Публикация от «Фолиант» баспасы (@foliant.kz)

 "Бұл біз үшін үлкен жауапкершілік болды. Бұған дейін өзімізді теледидардан көрген кезде мұндай сезім болған жоқ. Кітаптың сыртын көріп, кітапты ұстап көрген кезде өзімізді тарихқа үлес қосқан адам ретінде сезіндік. Бұл – үлкен жауапкершілік. Сериал шыққан кезде көпшіліктің бізге деген қызығушылығы мұндай болған жоқ. Кітап шыққан соң жан-жақтан хабарласып, телефонымызға тыным болмай кетті", - деп күлді Ермек.
Нарқыз өзі 5-сыныпта оқыған шығармасы қайта басылып шыққан кезде мұқабасында өз фотосы тұратынын бір кездері ойламағанын жеткізді.

"Мектеп кезінде Меңтай образына ғашық болып, араға осынша жыл салып, ең сүйікті шығармамның мұқабасында суретім тұрғанына әлі сене алар емеспін... Біз үшін бұл үлкен тарих", - дейді актриса.

Оқи отырыңыз: "Айғайладым! Мұндай дүние үнсіз жазылмайды": Олжас Сүлейменов сұхбат берді

Әңгіме соңында Ермек Тұрғанбек сериалдың арқасында отбасы құрғанын, кітап мұқабасына шығып, тарихтың бір бөлшегі болғанын айтты.

"Сериалды көріп жатқан көрермендердің арасында сын айтқаны да, ұнатқаны да бар. Ол да жақсы. Ал кітаптың қайта басылып шыққанына қуаныштымыз. Үлкен тарихтың бір бөлшегі болу – үлкен бақыт", - деп түйіндеді Ермек Тұрғанбек.

P.S. 2020 жылдың 19 қыркүйегінде "Махаббат, қызық мол жылдар" сериалының түсірілімі аяқталып, 23 жастағы Ермек Тұрғанбек пен 21 жастағы Нарқыз Айдарова 20 қыркүйекте бас қосты. Ал романда Меңтайынан айырылған Ербол XXI ғасырда ғашығынан бір күнге де алыстағысы келмеген.

"Махаббат, қызық мол жылдар" сериалы 2021 жылдың 9 наурызынан бастап "Қазақстан" ұлттық арнасынан көрсетіліп жатыр. Сериал 25 бөлімнен тұрады.

1427
Кілт сөздер:
өнер, кинотуынды, махаббат
Олжас Сүлейменов

"Айғайладым! Мұндай дүние үнсіз жазылмайды": Олжас Сүлейменов сұхбат берді

1428
(Жаңартылды 18:06 07.04.2021)
12 сәуірде адамның алғаш рет ғарышқа ұшқанына 60 жыл болады. Сол тарихи сәтті қағазға түсірген ақын Олжас Сүлейменов Юрий Гагаринмен кездескені жайлы, поэманың қалай жазылғанын айтып берді

АЛМАТЫ, 7 сәуір – Sputnik. Адамзаттың ғарышқа алғашқы сапары Қазақстан жерімен тығыз байланысты. Осыдан 60 жыл бұрын Байқоңыр жерінен ұшқан Юрий Гагарин ғарыш әлемін бағындырды. Сонымен қатар сол күні әлем тарихи сәтті жырға қосқан қазақ ақыны Олжас Сүлейменовті таныды.

Адамның алғаш рет ғарышқа ұшқанына 60 жыл толуына байланысты Sputnik Қазақстан тілшісі белгілі ақын, жазушы, әдебиеттанушы, лингвист және қоғам қайраткерімен сұхбаттасты.

Олжас Сүлейменов "Адамға табын, Жер, енді!" поэмасының қалай жазылғаны, бір күнде ақын мен өлеңнің танымал болуы, Юрий Гагаринмен қалай кездескені, ғарышты бағындырған алғашқы адамның қазасын қалай қабылдағаны және бүгінгі Қазақстан жайлы эксклюзивті сұхбатта айтып берді. 

"Айғайладым! Мұндай дүние үнсіз жазылмайды"

- Олжас Омарұлы, қайырлы күн. Сізді аман-есен көргенімізге шын қуаныштымыз.

- Құдайға шүкір, рақмет!

- Биыл 18 мамырда 85 жасқа келесіз. 60 жыл бұрын шамамен дәл осындай уақытта сіздің Юрий Гагариннің ғарышқа ұшуына арналған көпшілікке белгілі "Адамға табын, Жер, енді!" поэмаңыз жарық көрді. Бұл туындының жазылу тарихы қандай? Поэма арқылы оқырманға не жеткізгіңіз келді және оны жазуға қанша уақыт кетті?

- 12 сәуір. 1961 жылдың 12 сәуірі. Бұл бүкіл адамзат үшін ғана емес, жас ақын, әдебиетші Сүлейменов үшін де жұлдызды күн болды. Оған дейін де бірлі-жарым өлең жаздым, алайда ол уақытта кітабым да жоқ еді. "Казахстанская правда" газетінде жұмыс істеп жүрдім. Редактор шақырып, "Ертең адам ғарышқа ұшады" деді. Маған осындай құпияны айтты. Шамасы, партияда осыған байланысты қандай да бір ақпарат айтылып жүрген, республикалық газеттің редакторы ретінде ол жоспардан хабардар еді. Меніңше, Кеңес Одағының барлық редакторы сол тарихи оқиғаның болатынын білді. Алайда тек бір редактор ғана оны өзінің қызметкеріне айтып, өлең жазуын өтінді. Ол менің өлең жазатынымды білетін, себебі әдебиет институтында оқыдым. Әдеби газетте өлеңдерім жарияланған. Содан Федор Боярский осындай ұсыныс айтты. Ерекше редактор болатын. "Ертең газетте жариялайтындай етіп жаз" деді. Тапсырмасын сол күні орындадым, баспаға тапсырдым.

Казахский поэт Сулейменов
© Sputnik / Иосиф Будневич
Олжас Сүлейменовтің жас кезі

Ал таңертең қарындастарым менің өлеңім басылған бір уыс парақ алып келді. Төбеден ұшақпен тастаған екен... Бір ұшақ Алматының үстінен өлең жазылған қағазды тастапты. Көгілдір, кейбірі қызғылт парақ. Жалпы сол шығарманың толық жинағы қолымда болды. Еш әдебиетші дәл сондай таңғажайып басылымға ие болмаған деп ойламаймын.

- Адам ғарышқа сәтті ұшты. Сол күні қалада не болғаны есіңізде ме? Адамдар бұл жаңалықты қалай қабылдады?

Бүкіл әлем 12 сәуірде дүркіреп тұрды. Алматы тікесінен тік тұрды. Бұл мереке болды! Алматыда болған осындай керемет екі-ақ оқиғаны білемін. Бірі – 12 сәуір және 1945 жылдың 9 мамыры. Ол кезде жас болдым. Алматы көшелерінде де осындай үлкен қуаныш болды. Барлығы жақсы көңіл-күйде жүрді. Таңғаларлық. Өкінішке қарай, бұдан басқа мұндай мереке күндері есімде қалмапты.

...Содан кейін Федор Боярский сол күні, 12 сәуірде маған: "Жаз. Өлең аз болады, әрі қарай жаз. Көлемді өлең жаз. Көп. Ғарышқа ұшу туралы жаз. Сен инженерсің ғой, түсінесің..." деді. Себебі оған дейін геология факультетін бітірдім, геолог-инженер болдым. Шын мәнінде адамның ғарышқа ұшуы дегеннің не екенін түсіндім. Мұны бәзбіреулер балықтың құрлыққа шығуы секілді тарихи, биологиялық фактімен салыстыруға болатынын айтты. О, қалай! Авторы есімде жоқ, алайда бұл сәтті салыстыру болды.

Содан кейін жаздым. Бір апта жазған болармын. Тоқтамастан жаздым, жаздым. Айғайладым! Себебі мұндай дүние үнсіз жазылмайды. Дауыстап айтып отырып жазылады. Бөлме ішінде ары-бері жүргенімнен үйдегілер де қорқып кететін. Нәтижесінде сәуірде "Адамға табын, Жер, енді!" поэмасын өндіріске өткіздім.

© Sputnik
Ұшқыш-ғарышкер Юрий Гагарин "Восток" ғарыш кемесінің кабинасында

Поэма не туралы? Әрине, ол тек Гагариннің ғарышқа ұшуы туралы болған жоқ. Ол кезде Гагаринді танымайтын едім. Ол уақытта адамның ғарышқа ұшуы не екенін білмесем де, түсіндім. Адамның ғарышқа ұшуы – адамзаттың бүкіл алдыңғы тарихын жалпылау. Міне, мен сол аптада өзімнің не сезінгенімді қорытындыладым. Поэма расымен де бірден жарияланды. Ол уақытта жылдамдық та ғарыш жылдамдығымен тең деп айтар едім. Біздің елде бірден жарияланды. Ал мамырдың соңында Америкаға, Колумбия университетіне бардым. Сол жақта сөз сөйледім. Сол жерде поэмадан үзінді оқыдым.

Америкаға бара жатқанда маған ағылшын тілінде студенттерге оқып беруге болатын шумақты таңдап алуды ұсынды. Жеттік. Колумбия университеті. Залда әртүрлі нәсіл, әртүрлі ұлт өкілдері, университеттің барлық студенті болды. Америкалықтар мен сырттан келген студенттер деп топшыладым. Сол сәтте де сәтті мәтінді таңдап алдым. Қай шумақты оқығаным әлі есімде:

Люди!

Граждане всей вселенной!

Гости галактик!

Хозяева Шара!

Вы не хотите

пропасть бесследно?

Живите,

Живите,

Живите с жаром!

Живите, люди!

Живите, люди.

Вы совершили свой первый подвиг.

Преодолели земную тягость,

Чтобы потомки это запомнили —

Преодолейте земные тяжбы!

Реки, вспаивайте поля!

Города,

вставайте в заре!

Пусть, как сердце, летит Земля,

Перевитая жилами рек!

Мы найдем.

Мы должны найти

Все ответы на тот вопрос.

Путь земной —

Продолженье пути

До сегодняшних

Взятых звёзд.

Бұл өте сәтті таңдалған үзінді болды. Сол шумақты әлі күнге дейін жатқа білемін. 60 жыл өтті. Шамамен бір аптадан кейін осы үзіндіні Парижде оқыдым. Парижде де университет аудиториясында өтті. Осы поэмадан менің әдебиетші ретіндегі шығармашылық өмірбаяным басталды.

Гагаринмен кездесу

- Олжас Омарұлы, Юрий Гагаринмен жеке кездестіңіз бе?

- Ия, әрине, кездестім. Кездескенде қалай, ол кісі өткізген кездесулерде болдым. Ал өзімен жеке небәрі бір-екі рет кездескен шығармын.

- Не туралы әңгімелестіңіздер?

- Екінші рет қай күні кездескеніміз де есімде. Бұл 1967 жылдың шілдесі еді. Бұл кездесу Вешенская ауылында, Дон өзенінде болды. Шолохов Жазушылар одағының хатшысы еді, кеңестің жас ақындарын сол маңға шақырды. Арамызда чилилік ақын әйел болды. Бізді бір аптаға шақырды, сол аптаны ақындардың ортасында жақсы өткіздік. КСРО Комсомолы Орталық комитетінің бірінші хатшысы Сергей Павлович Павлов ұшып келді. Олар Гагарин екеуі дос болды. Бәріміз таныс болдық. Біз тіпті  Ростовтан Гагаринмен бірге ұшақпен ұшып кеттік. Ол ұшақты басқарып көруді сұрап, біраз уақыт жүргізді. Бәріміз қорқып отырдық.

© Sputnik
Юрий Гагарин ғарышқа ұшар алдында ұшақ кабинасында отыр

Алайда ол өзін сенімді ұстап, ұшақты қондырды. Біз сол аптада айырылмай бірге жүрдік. Бір аптадан аз болуы мүмкін. Алайда есте қаларлық күндер еді, Вешенская ауылында бірге сөз сөйледік. Сол кездегі орта қызық болды. Әрине артынан дастарқан жайылды. Гагарин оған белсенді қатысты. Ақындар туралы айтудың да қажеті жоқ шығар... Ал әңгіме поэзия немесе ғарыш туралы емес, жай ғана ер адамдардың тақырыбында болды.

Содан кейін Дон жағасында волейбол ойнадық. Шолохов онда жақсы отырыс өткізді. Құмның үстіне дастарқан жайылды. Сүйрікті сол жерде аулап, бірден қуырылды. Волейбол ойнап жүргенде Гагарин аяғын ұлу қабыршағына кесіп алды. Бірден суға қарай жүгірді.

Дон өзеніне аяғын салғанда... Тынық Дон өзеніне аяғын салған кезде қызыл жолақ болып қан ақты. Бұл жағымсыз белгі болды. Себебі сол оқиғадан бірнеше ай өткен соң 1968 жылы құлады. Алайда ол біздің есімізде қалды. Адамзат атынан шыққан ұлы пионер ретінде ғана емес, сонымен қатар дос бола алатын жақсы жолдас ретінде есте қалды.

- Қазасын қалай қабылдадыңыз?

- Біз сол жерге бардық. Владимирский облысы Киржач ауданы болу керек. Ол жердің қалай аталғаны есімде жоқ. Орманда мүсінші Рукавишников темір ескерткіш, темір құлпытас орнатыпты... темірдің төмен жағына "Адамға табын, Жер, енді..." деп ойып жазылған екен. Ол жерде леп белгісі емес, көп нүкте қойылған. Юрий Алексеевичті осылай шығарып салдық.

Герой Советского Союза, майор Юрий Гагарин
© Sputnik
Юрий Гагарин

Қазір мені ол кісіні көпшіліктің аз еске алатыны қынжылтады. Жаңа ұрпақ келді. Не дегенмен арада 60 жыл өтті. Жаңа буын алғашқы ғарышкерлерді ұмытып кетті. Олардың өз қызығушылығы бар. Алғашқы ғарышкерлердің атын атамайды. Қазір олардың өз қаһарманы бар. Алайда осы ерліктің 60 жылдығында адамзат шын түсініп, қандай да бір акция арқылы атап өтуі өте маңызды. Өткізеді деген үміт бар. Гагарин ешқашан ұмытылмайды. Юрий Гагариннің есімі ғасырлар бойы өшпейді.

- Олжас Омарұлы, әңгімеміз тарих тақырыбына ауып жатыр ғой. Кейінгі уақытта әртүрлі салада тарихты қайта жазып шығуға, оны өзгертуге тырысып жатқандардың бар екенін байқап жүрміз. Мұның Гагаринге де қатысы бар. Себебі Батыста, Америка Құрама Штаттарында ғарышта болған алғашқы адам Юрий Алексеевич Гагарин емес, америкалық астронавт Алан Шепард екенін дәлелдеуге тырысып жүр. Біздің жас ұрпақтың тарихты зерделеуге асықпай отырғанын ескерсек, мұны санамызға сіңіріп тастауы мүмкін бе?

- Қазір америкалық астронавтың 5 мамырда, ал Гагариннің 12 сәуірде ұшқанын еске салу керек. Осыдан-ақ бәрі анық көрініп тұр. Ойланбайтын адамның өзі де кімнің бірінші екенін анық көреді. Бұл – өткен жылы Трамптың 1945 жылы 8 мамырда Америка Гитлерді, Германияны жеңді деп жасаған мәлімдемесі сияқты дүние. Барлығы мұның 9 мамырда болғанын, Америка емес, Кеңес одағының жеңісі екенін біледі. Аға буын оны жақсы біледі, жас ұрпақ білмеуі мүмкін. Көрермен, оқырман, тыңдарманға даталарды еске салып отыру қажет. Сонда ғана біздің, жастардың санасын өзгерте алмайды.

- "Байқоңыр" ғарыш айлағына барып, ғарышқа ұшу сәтінің куәгері болып көрдіңіз бе?

- Жоқ. Әлі Байқоңырда болмадым. Биыл барып қайтсам деймін.

- Мұны сіздің арманыңыз деп айтуға бола ма?

- Арман деп айту қиын, себебі өзім жазған Байқоңырда болмасам да, әлемді аралап шықтым. Мұндай парадокс кездеседі. Меніңше қалыпты жағдай. Биыл 9 сәуірде барып қайтамын. Ол жерде пилоттық ұшыру болады. Шақырту алдым, барамын.

Алма-Ата ма, Алматы ма?

- Бұған дейін Алматы қаласына Алма-Ата деген бұрынғы атауын қайтаруды ұсындыңыз. Бұл пікіріңіз де біраз сынның астында қалды. Бұл ойыңыз әлі де өзгермеді ме?

- Әлі де солай ойлаймын. Мысалы, хаттарыма "Алма-Ата" деп жазамын. Алматы – біздің қаламыздың қазақша атауы болуы мүмкін. Мысалы, Баку бар. Әзербайжан тілінде Бакы деп естіледі. Олар Bakı деп жазады. Басқалар үшін – Баку. Себебі қаланың немесе елдің атауын "ы" дыбысымен аяқталмауы керек. Себебі оны ешкім дұрыс айтпайды. Бұл жерде мен тек қаланың патриоты ретінде ғана емес, лингвист ретінде де ойымды айттым. Сол ойымда қаламын.

Егер қазақша жазсам, міндетті түрде "Алматы" болады. Бұл қалыпты жағдай. Көптеген елде солай қалыптасқан. Ана тілі немесе мемлекеттік тілде елдің не қаланың аты басқаша жазылса, ал хатты жіберетін елдің тілінде оқырманға түсінікті болу үшін осындай екінші түрін қолданасың. Қаланың атын өзгерте салу емес, осылай қолдану туралы ұсыныс айттым.

Бұл дұрыс болар еді, өйткені Алма-Ата "Алма атасы" деп аударылады. Бұл әлемдегі ең көне алма өскен жер, осы жерден бүкіл әлемге тарады және оны ғалымдар дәлелдеді. Біздің ғалымдар да, ағылшындар мен француздар да дәлелдеді. Демек, алма алғаш рет осы жерде жеміс ретінде пайда болды, содан кейін Жібек жолы арқылы тарап, тұқымы әлемнің басқа елдеріне жетті. Міне бұл – Алма-Ата. Бұл атаудың мағынасы осы деректі айқындайды.

Сүлейменов Нобель сыйлығынан неге бас тартты?

- Олжас Омарұлы, сіз бастаған "Невада-Семей" қозғалысының жұмыс нәтижесінде бес ядролық полигон жабылып, сізді бүкіл әлемге әйгілі тұлға етті. Сізді тіпті Нобель сыйлығына ұсынған екен, бірақ сіз бас тартыпсыз. Неге?

- Бұл да Алматыда, 1990 жылдың мамырында, сынақты тоқтатқаннан кейін жарты жылдан соң болды. Соңғы жарылыс 1989 жылдың 19 қазанында болды. Бұл жаңалық әлемге тарап, барлығы біздің елді көргісі келді. Содан Алматыда мамырда "Барлық сайлаушылар ядролық соғысқа қарсы!" ұранымен алғашқы антиядролық конференция өтетіні туралы хабарладық.

Осы ұранмен ядролық қаруды мүлдем тоқтата аламыз деп ойладым. Америкадан бізге 300 делегат келді. Жапония, Франция, Англиядан келді. Бұл қарапайым азаматтар ғана емес, арасында сенатор, конгрессмендер де болды. Алғашқы антиядролық халықаралық конференция өтті.

Оны өткізуге ақша іздедім. Шахматтан әлем чемпионы Анатолий Карпов басқарған кеңестік бейбітшілікті қорғау комитетіне жүгіндім. Оларға түсіндірдім, олар кеңесе келе 400 мың рубль ақша тапты. Бұл доллар 62 тиынға тең кез еді, яғни 600 мың доллардан асатын қаражат болды. Содан кейін КСРО Азаматтық авиация министріне барып, оны көндірдім. Ол америкалық делегаттарға ұшақ жіберді. Осы 300 делегаттың барлығын ұшақ Алматыға алып келді, конференция аяқталғанша Алматы әуежайында тұрды.

Содан кейін Семейге сол ұшақпен ұшып бардық, ол жерде митинг болып жатты. Олар сол жерден Америкаға ұшып кетті. Осындай қызық жағдайлар болды. КСРО Жоғарғы кеңесі мен біздің антиядролық тобымыздың, "Невада - Семей" ұйымымыздың осындай беделі болды.

Народный депутат СССР, поэт Олжас Сулейменов (в центре) беседует с жителями города Семипалатинск, июнь, 1990 года
© Sputnik / Юрий Куйдин
КСРО Халық депутаты, ақын Олжас Сүлейменов Семей қаласының тұрғындарымен кездесті, маусым, 1990 жыл

Конференцияда америкалық делегат ұсыныс айтты. Меніңше, сол ұсынысты айтқан адам генерал болды. Ол биыл қазанда Нобель сыйлығы берілетінін, Сүлейменовті Нобель сыйлығына ұсынуға үлгеру керек екенін айтты. Ал сол генералдың өзі соған дейін ядролық қаруға жақ болып, зейнетке шыққан соң ядролық қаруға қарсы адамдар қатарына қосылған. Әрине, жиналғандар бұл ұсынысты айтқанда қолдай кетті.

Содан кейін мен сөз сөйледім. Сол кезде біздің тек кеңестік полигондарды тоқтатқанымызды, әлі Америкада Невадада АҚШ мен Англия сынақтан өткізетін полигон бар екенін айттым. Француздар сынақ өткізетін Тынық мұхитында Муруроа атоллында полигон бар. Біздің жанымызда қытайлар сынақтан өткізетін Лобнор полигоны бар. Осының бәрін тоқтатайық. Сол кезде өзіміз барып, кез келген сыйлықты сұраймыз дедім. Бұл сөзімді бәрі қолдап, қол соқты. Ал сол генерал Америкаға барған соң топ құрып, Кеңес Одағындағы сынақтарды тоқтатуға қатысқаны үшін өзін Нобель сыйлығына ұсыныпты. Шындап келгенде, бізді ешқандай сыйлық, орден, медаль қызықтырмайды. Егер қандай да бір іс болса, оны істеу керек. Ал ол әрекетіміз үшін марапат не соққы жейтінімізді тағдыр көрсетеді.

- "Невада-Семей" қозғалысының арқасында танымал болып, қазақстандықтардың қолдауына ие болдыңыз. Қазақсан Тәуелсіздік алар кезде Нұрсұлтан Назарбаевпен тең дәрежеде президенттік орын үшін бәсекелесуге барлық мүмкіндік болды. Алайда сіз одан да бас тарттыңыз. Нені басшылыққа алдыңыз?

- Мен ақынмын, қызметкер емеспін. Бізде Қазақ КСР Жоғарғы кеңесі президиумының төрағасы Сәкен Имашев деген кісі болды. 1984 жылы сол кісі қайтыс болған соң жерлеу рәсімінен кейін Қонаевпен бірге шай іштік... Қонаев Байкен Әшімовтің көзінше ұсыныс айтты: "осылай болған екен, бізге жаңа төрағаны ұсыну керек", - деді ол Әшімовке қарап. Сонда Әшімов: "Иә, әрине. Бірақ екі төсбелгісі бар адам керек". Бұл – КСРО және ҚазКСР депутатының белгісі. Содан "Олжаста екі төсбелгі бар", - деді. Олардың алдын ала келіскенін түсіндім, өйткені Әшімов кенеттен осындай ұсыныс жасады. Қонаев маған: "Кәне, мүмкін шынымен де...", - деді. Мен: "Жоқ, Димаш Ахметұлы. Мен жазушымын және өмір бойы осы іспен айналысамын". Бұл іс маған табыс әкеле ме, жоқ па, білмеймін, бірақ осы іспен шұғылданғым келеді. Бұл менің қолымнан келеді, сол себепті қызметпен айналысқым келмейді. Сағат 10-да тұрып... Мен жазушымын. Өзім қалаған уақытта тұрамын. Таңғы 5-те ұйықтаймын... Бұл режимімді бұзбаймын дедім.

Қазақстан болашақта қандай болады?

- Баспасөзде жарияланған сөздеріңізде елімізде мықты білім саласы болуы қажет екенін, жастардың кітап оқып үйренуі туралы жиі айтасыз. Ал тағы бір тарап гаджет пен заманауи технология келгелі кітап оқымаудың қалыпты құбылыс екенін айтады. Ал қалған дүниенің өткеннің еншісінде қалып, жойылуын табиғи жағдай дейді.

- Мешеу адамдар осылай айтады. Спортта тренажерлер бар, ал кітап – ми тренажері. Қаншалықты көп кітап оқысаңыз, ми да соғұрлым күшті болады. Бір қарағанда бұл оңай болып көрінуі мүмкін. Алайда оған сендіру... 30 жыл ішінде кітап оқымайтын ұрпақ дүниеге келді. Олар ғылым сияқты ауыр іске дайын емес.

Олар қысқа хабарламалар, біреуді тонап, біреуді ренжіткені туралы жаңалықтарға үйреніп кетті. Барлық пайымдау мен адамның дамуы осы деңгейде жүріп жатыр.

Олжас Сулейменов
© Sputnik / Тимур Батыршин
Олжас Сүлейменов

Кейінгі 30 жыл ішінде Қазақстанда кем дегенде бір ұлы ғалым, кем дегенде бір ұлы жазушы пайда болды ма? Жоқ, әрине. Біртуар инженерлер бар ма? Жоқ. Инженер өзін көрсете алатын өндіріс те жоқ. Бұл құлдырау кітаптың, хаттың, гуманитарлық және басқа ғылымдардың беделінің төмендеуіне байланысты пайда болды. Өкінішке қарай, бұл күрделі тақырып. Кітап оқитын жаңа ұрпақ пайда болуы үшін қанша жыл керек?

- Олжас Омарұлы, жүз жылдан кейін Қазақстанның қандай болатыны туралы ойлаған боларсыз. Қазақстан, әлем... не өзгереді?

- Мұның екі жақты жауабы бар. Егер кітаптың беделін қалпына келтірсек, онда жауап – біреу. Егер олай болмаса, жауап басқаша болады. Сондықтан балаларымыз бен немерелерімізге кітапты қайтарайық. Бұл әсіресе қазақтар үшін өте маңызды, өйткені біз жазбаша әдебиетке ХХ ғасырда ғана келдік және оны тез жоғалтып алдық, жоғалтып жатырмыз. Егер орыс әдебиеті күшті дейтін болсақ, ол осы кезеңнен аман шығады... Ал біз тағы да фольклорға, халық ауыз әдебиетіне қайта ораламыз. Бұл тақырыпты жандандырып, мұны тоқтату керек. Сол кезде 100 жылдан кейін не болатынын айта аламын. Егер қалпына келтірмесек, онда болжауға тура келеді. Кемшіліктің әлдеқайда көп болатыны анық.

- Олжас Омарұлы, уақыт бөлгеніңіз үшін көп рақмет. Редакциямыздың атынан мықты денсаулық, жемісті күндер тілейміз. Аман жүріңіз!

- Рақмет! Бәріміз аман болайық.

1428
Кілт сөздер:
ғарышқа сапар, Олжас Сүлейменов
Қасым-Жомарт Тоқаев

Мемлекет басшылары Тоқаевты құттықтап жатыр

0
Олар мемлекет басшысына зор денсаулық және бақыт тіледі, сондай-ақ бауырлас Қазақстан халқының одан әрі өсіп-өркендей беруіне тілектестік білдірді

НҰР-СҰЛТАН, 17 сәуір – Sputnik. Мемлекет басшысы Қасым-Жомарт Тоқаевтың атына қасиетті Рамазан айының басталуына орай шет мемлекеттердің басшыларынан және халықаралық ұйымдардың жетекшілерінен құттықтау хаттар мен жеделхаттар келіп түсуде, деп хабарлайды Ақорда.

Өзбекстан президенті Шавкат Мирзиёев жеделхатында Тоқаевқа ұзақ өмір, зор денсаулық және оның аса жауапты қызметіне табыс тілеп, бауырлас Қазақстан халқының өсіп-өркендей беруіне ниеттестік білдірген. Сондай-ақ ол екі ел арасындағы қарым-қатынастардың қарқынды дамып келе жатқанын атап өткен.

"Екі ел арасындағы тату көршілікке, жақын достыққа, өзара құрметке және қолдау көрсетуге негізделген стратегиялық серіктестік ортақ саяси ерік-жігеріміздің арқасында соңғы жылдары мүлде жаңа деңгейге көтерілгені күмәнсіз. Біздің табысты байланыстарымыз бен ұзақмерзімді серіктестігіміз одан әрі дами беретініне сенімдімін", – делінген Өзбекстан басшысының жеделхатында.

Сауд Арабиясының королі Салман бен Әбделәзиз Әл Сауд және Сауд Арабиясы Корольдігінің тақ мұрагері Мұхаммед бен Салман бен Әбделәзиз Әл Сауд өздерінің жеделхаттарында Қазақстан президентін қасиетті Рамазан айының басталуымен құттықтап, оған зор денсаулық және бақыт тілеген, сондай-ақ бауырлас Қазақстан халқының одан әрі өсіп-өркендей беруіне тілектестік білдірген.

Тағы оқыңыз: Рамазан-2021: маңызды 10 сұрақтың жауабы

Сонымен қатар Қазақстан президентіне Қатар әмірі Шейх Тамим бен Хамад Әл Тәни, Иордания королі II Абдалла, Оман сұлтаны Хайсам Бен Тариқ, Кувейт әмірі Шейх Наваф әл-Ахмад әл-Джабер Әс-Сабах, Кувейттің тақ мұрагері Мишаль әл-Ахмед әл-Джабер Әс-Сабах, Бахрейн королі Хамад бен Иса Әл Халифа, Марокко королі VI Мұхаммед, Египет президенті Әбдель Фаттах Әс-Сиси, Ирак президенті Бархам Салех, Палестина президенті Махмуд Аббас, Қатар шейхінің орынбасары Абдалла Бен Хамад Әл Тәни және Ислам ынтымақтастығы ұйымының бас хатшысы Юсеф әл-Осеймин өздерінің құттықтау хаттарын жолдады.

Биыл Рамазан айы 13 сәуірде басталып, 12 мамырда аяқталады. 8 мамырдан 9 мамырға қараған түн – қасиетті Қадір түні.

Пітір садақаның мөлшері жан басына 420 теңгені құрады.

0
Кілт сөздер:
Рамазан-2021, Қасым-Жомарт Тоқаев
Тақырып бойынша
Ақордада өткен кездесуде қырғыз президенті Тоқаевты таңғалдырды  
Тоқаев сыбайлас жемқорлыққа қарсы агенттіктегі ауыс-түйіс туралы айтты
Тоқаев жұмысын дұрыс атқармаған басшыны қызметінен босатуды бұйырды
Тоқаев кейбір салаларға қосымша қаражат бөлуді тапсырды