Кандидаттар

Дебаттың екінші раунды: кандидаттар қандай проблемаларды көтерді?

200
(Жаңартылды 20:59 29.05.2019)
Теледебаттың екінші раундында әр кандидат "Қазақстанның әлеуметтік жаңғыруы" тақырыбында сөз сөйледі

НҰР-СҰЛТАН, 29 мамыр – Sputnik. "Хабар" арнасында өткен теледебаттың екінші кезеңі "Қазақстанның әлеуметтік жаңғыруы" тақырыбына арналды. Әр кандидатқа сөз сөйлеуге 90 секунд уақыт берілді.

Бірінші болып сөз кезегін президент сайлауына кәсіподақтар федерациясы атынан түсіп жатқан Амангелді Таспихов алды.

Пайдасы жоқ ұлттық компанияларды қысқарту керек

"Өздеріңіз білесіздер, біздің елімізде орташа жалақы 168 мың теңге саналады. Бірақ ондай жалақы бұқаралық халыққа арман. Халықтың негізгі бөлігінің жалақысы 100 мың теңгенің айналасында ғана. Сондықтан ол жалақыны 2-3 есе өсіру керек. Ол ақшаны қайдан аламыз? Ол өте оңай нәрсе. Халыққа еш пайдасы жоқ ұлттық компаниялар мен мемлекеттік мекемелер бар. Солардың жартысы қысқарса, соның өзі жетіп жатыр", - деді Таспихов.

Сонымен қатар, ол қыруар ақшаны талап ететін имидждік іс-шараларды өткізуді тоқтату керектігіне назар аударды. Бұған қоса, ауылдардағы мұғалімдер мен дәрігерлердің жағдайын көтерді.

Революция көшеде емес, санада болуы керек

Президенттікке үміткер Дания Еспаеваның атынан теледебатқа "Ақ жол" партиясының төрағасы Азат Перуашев қатысты.

"Елімізде талай әлеуметтік проблема жиналғаны баршамызға мәлім. Мемлекет оларды көпке созбай шешуі тиіс. Әрі қарай мұндай ашу-ызаны жинамас үшін үкімет өкілетті органдармен қарым-қатынасты өзгертіп, халықтың сөзіне мұқият назар аударып, оны дұрыс қабылдап үйренуі керек. Халықтың көпшілігі Еуропа жолын, Еуропа сапасын қалайды. Мемлекеттен батыстың сапасын талап етсек, өзіміз де тәрбие, саяси менталитет жағынан Еуропа ұстанымдарына, біліміне бет бұруымыз қажет. Ең маңызды революция көшелерде емес, санада өтуі керек. Онсыз жап-жаңа ғимараттар құлайды, тас жолдар тоза береді. Ал прогресшіл санасы бар, технологияны түсінетін ел қоғамды бұрын болмаған жеңістерге жеткізеді", - деді ол.

Бюджет қаржысын ұрламасақ, бәріне ақша жетеді

"Ұлт тағдыры" қозғалысы атынан сайлауға түсетін Әміржан Қосанов үшін әлеуметтік жаңғыру – қоғамның жаңғыруы.

"Көпбалалы аналар 21 мың теңге алу үшін әкімдіктің табалдырығын тоздырмауы керек. Егер біз бюджет қаражатын ұрламасақ, шетелге заңсыз шығарылған қаржыны кері қайтарсақ, ақша жетеді деп ойлаймын", - деді президенттікке кандидат.

Сондай-ақ, Қосанов дәстүрлі құндылықтардан айырылып қалмау керектігін қадап айтты.

"Жаһандану процесінде қазақ өз орнын табуы керек. Ол әрбір елге берілген мүмкіндік. Сондықтан менің бағдарламамда Еуропалық одаққа қарай вектор ап-анық айтылған. Әлеуметтік жаңғыруды қазақстандық қоғамды демократияландырусыз көзге елестету мүмкін емес. Бұл ең алдымен саяси еркіндікке қатысты. Бірде-бір адам өз ойын ашық айтқаны үшін қуғын-сүргінге ұшырамауы керек", - деді кандидат.

Көпбалалы аналарға тегін үй

Төртінші кандидат Сәдібек Түгел әлеуметтік мәселелерді шешуде, ең алдымен, аналар мен балаларға, барлық зейнеткерге, мүмкіндігі шектеулі жандарға жағдай жасалуы керектігін алға тартты.

"Көпбалалы аналарға жәрдемақыны екі-үш есеге арттырып, тегін үй алуына жағдай жасауымыз қажет. Екіншіден, шетелде тұратын қандастарымыздың атажұртына оралуына жол ашуымыз керек", - деді "Ұлы дала қырандары" қоғамдық бірлестігі атынан додаға түскен кандидат.

Ол жастардың рухани-адамгершілік тәрбиесі мен ар мәселесін қазіргі қоғамның өткір проблемасы екенін ашына айтты.

"Ар мәселесінде біздің алдымызда жар, артымызда құз тұр. Халқымыздың болмысына, менталитетіне жат дүниелер шаһарларымызға баса-көктеп кіріп алды. Олар шайтани орындар, түнгі клубтар, күндіз-түні жұмыс істейтін сауналар. Осылар жастарымызды азғындық жолға салып отыр. Олармен күресу керек. Түнгі клуб, казино, сауналарды – бәрін жабу керек", - деп қорытты Түгел.

Табыстың әділ бөлінуін қолдаймыз

Бесінші үміткер Жамбыл Ахметбеков Қазақстандағы байлар мен кедейлер арасындағы алшақтыққа назар аудартты.

"Біз азаматтарға тең жағдай жасалып, табыстың әділ бөлінуін қолдаймыз. Қазақстандағы теңсіздік жекелеген санаттағы азаматтардың табысына ғана қатысты мәселе емес. Сенімсіздік күшейіп барады, қиын жағдайға тап болған азаматтар кімге арқа сүйерін білмейді. Көбісі қарызға батып, тұрмысын сол деңгейде ұстап тұрғысы келеді. Алайда бұл ұтылысқа апаратын жол", - деді ол.

Сондай-ақ, Қазақстан коммунистік халық партиясы атынан сайлауға түскен кандидаттың пікірінше, интернетке тәуелділік әлеуметке төнген қауіп-қатер.

"Заманауи технологиялар прогреспен бірге өскелең ұрпаққа зиянын тигізіп жатыр. Коммунистік Қытайда цифрлық технологиялар жоғары дамыған, бірақ интернетке тәуелділік ауру деп танылады және ондайларды күштеп емдейді. Батыста ғалымдар интернет адамның психикасына, әлеуметтік дамуына қауіпті деп дабыл қағып жатыр. Біздің қоғам осы проблемаға мұқият назар аударуы керек", - деді Ахметбеков.

Негізгі бағыт – ауылдарды жаңа тұрғындармен толықтыру

"Ауыл" партиясы атынан сайлауға түскен Төлеутай Рақымбековтің орнына дебатқа сенатор Әли Бектаев қатысты. Алтыншы болып сөз алған ауылдарды жаңғырту мәселесіне тоқталды.

"Өкінішке қарай, соңғы он бес жылдың көлемінде мыңнан аса ауыл жойылып кетті. Қазіргі бар 5690 ауылдың көпшілігінің жағдайы төмен. Адамдар ауылдан қалаға ағылып жатыр. Ең негізгі себеп, балалардың болашағы. Сондықтан ауылдағы мектептердің жағдайын, білім беру жүйесін жақсартуымыз керек. Білім сапасын арттыру үшін мұғалімдердің сапасы жақсаруы тиіс. Біздің партияның бағдарламасындағы ең негізгі бағыттардың бірі – ауылдарды жаңа тұрғындармен толықтыру", - деді ол.

Бұған қоса, Бектаев елімізде қабылданған "Серпін" бағдарламасын қайта қарау қажеттігіне назар аударды.

"Халқы көп өңірлерден көшіп келген азаматтарға жақсы жағдай жасалса ғана, олар сол жерде тұрақтап қалады. Әсіресе, көпбалалы отбасылар мен білікті мамандарды тұрақтандыру өте маңызды. Оларға тегін үй не пайызсыз несие беру керек", - деп қорытты сөзін ол.

Қолжетімді баспанамен қамту

Қасым-Жомарт Тоқаевтың республикалық штабының жетекшісі Мәулен Әшімбаев кандидат өз бағдарламасында халықты қолжетімді баспанамен қамту мәселесіне үлкен көңіл бөліп отырғанын атап өтті.

Тағы оқыңыз: Сайлауалды дебат: президентікке кандидаттар не ұсынды?

"Алдымыздағы жылдары 650 мың қазақстандық отбасы әртүрлі мемлекеттік бағдарлама аясында қолжетімді баспанамен қамтылатын болады. Сондай-ақ, біздің кандидаттың ұсынысымен алдағы уақытта 40 мың жалдамалы пәтер салынып, көпбалалы отбасылар мен мұқтаж жандарға берілелі. Бұған қоса, жастарды қолдау үшін Шымкент, Алматы, Нұр-Сұлтан сияқты ірі қалаларда жылына кем дегенде 1 мың жалға берілетін пәтер салынады", - деді ол.

Әшімбаев президенттікке кандидат Тоқаевтың денсаулық, дәрігерлердің мәртебесін көтеру, дәрі-дәрмектің қолжетімділігін арттыру мәселелеріне де көп көңіл бөлгенін айтты.

Сайлауалды дебаттың қатысушылары

Сайлау алдындағы дебатқа қатысушылар (жеребе бойынша):

  • Nur Otan партиясы атынан Мәулен Әшімбаев (Қасым-Жомарт Тоқаевтың сенімді өкілі);
  • "Ауыл" партиясы атынан Әли Бектаев "Төлеутай Рақымбековтің сенімді өкілі);
  • Қазақстан коммунистік халық партиясы атынан Жамбыл Ахметбеков;
  • "Ұлы дала қырандары" қоғамдық бірлестігі атынан Сәдібек Түгел;
  • "Ұлт тағдыры" қозғалысы атынан Әміржан Қосанов;
  • Ақ жол" демократиялық партиясы атынан Азат Перуашев (президенттікке үміткер Дания Еспаеваның өкілі);
  • Кәсіподақтар федерациясы атынан Амангелді Таспихов.
200
Кілт сөздер:
президент сайлауы, раунд
Тақырып:
Президент сайлауы - 2019 (176)
Тақырып бойынша
Президенттікке үміткер басында үйі жоғын, астындағы көлігін несиеге алғанын айтты
Әміржан Қосанов: Тоқаевтың уәдесіне сеніп келдім
Президент сайлауы: кандидаттардың аты-жөні бюллетенде қандай ретпен жазылады?
Қазақстан президенттігіне кандидаттар арасындағы дебат – видеотрансляция
Сайлауалды дебат: президентікке кандидаттар не ұсынды?
Парламент отырысы

Саясаттанушы парламентке оппозициялық партиялар келсе не болатынын болжады

499
(Жаңартылды 15:11 28.10.2020)
Мәжілістің бұған дейінгі сайлауы 2016 жылдың 20 наурызында өтіп, бірінші сессия 25 наурызда ашылған еді. Тиісінше, қазіргі шақырылымдағы мәжілістің өкілеттігі 2021 жылдың 24 наурызында аяқталады

АЛМАТЫ, 28 қазан – Sputnik. Мәжілістің келесі сайлауы 2021 жылдың 10 қаңтарында өтеді. Мемлекет басшысы сайлауға қатысты үндеуінде заңға парламенттік оппозиция институтын құру туралы өзгерістер енгізілгенін хабарлады. Депутаттардың 30%-і жастар мен әйелдер болады деп жоспарланып отыр.

Sputnik Қазақстан тілшісі бұл өзгерістерден не күтуге болатынын және сайлаудың қалай өтетітіне қатысты саясаттанушылар пікірін білді.

Көппартиялы парламент қалыптаса ма

Парламент мәжілісінің алтыншы сайлауы 2016 жылы өтті. Ол кезде сайлауға түскен алты партияның үшеуі (Nur Otan, "Ақ жол" партиясы, Қазақстан коммунистік халық партиясы) ғана сайлаушылардың 7%-тен астам дауысына ие болды. Саясаттанушы Досмұхамед Көшімнің айтуынша, бұл сайлауда көппартиялы парламент жасанды түрде құрылды.

"Бұл үш партия да президент аппаратының рұқсатымен құрылған. Коммунистік партия 5 және 6 шақырылымда 7-8% дауыс жинап өтті. Ал кейінгі президент сайлауында коммунистік партия өкілі 1,82% дауыс жинады. Халықты қалай сендіреміз? Партияның президент болам деген адамы осындай дауыс жинап отыр", - дейді Дос Көшім.

Ал саясаттанушы Самат Нұртаза партияның көп болуы демократияны кеңейетініне кепілдік бермейтінін айтты.

"Партия неғұрлым көп болса, демократия соғұрлым кеңейе түседі деген – қате ұғым. Қырғызстанда партия көп, бірақ соның нәтижесінде халық жұмаққа түсіп кетті деп айта алмаймын. Сонымен қатар 1-2 партия деген де аз. Либерализмге жол ашатын уақыт жетті", - дейді Нұртаза.

Сонымен қатар саясаттанушы енді сайлау қарсаңында партиялар дауыс жинау үшін уәде беретініне тоқталды. Айтуынша, бұған дейінгі тәжірибе партиялар айтқанының 10-15% орындайтынын көрсетті.

Парламенттік оппозиция керек пе

Самат Нұртаза парламенттік оппозиция керек екеніне, алайда кей адам оның жұмысын түсінбей отырғанына назар аударды. 

"Парламенттік оппозиция деген жамандау емес, ол кемшіл жақтарын айтып, ой қосу. Оппозицияның пікіріне құлақ асудың нәтижесінде халық ұтады. Билік өзара жаға жыртысып, атажау болуының қажеті жоқ. Бастысы екеуі ақылдасып, бір-бірінің қатесін түзеп, халық жақсы өмір сүруі керек", - дейді ол.

Ал саясаттанушы Дос Көшім мұны болашаққа арналған заң деп атады. Себебі қазір парламентте оппозиция жоқ, алайда кейіннен саяси аренаға оппозициялық партиялар келсе, соларға белгілі бір деңгейде жұмыс істеуге мүмкіндік беріледі.

"Бұл – болашаққа арналған заң. Қазіргі кездегі партиялардың біреуі "мен оппозиция рөлін атқарамын" десе, ол алдау, спектакль. Саяси оппозициялық күш жоқ кезде бұл заң күшіне енбейді. Мұны 10-20 жылдан кейін оппозициялық партия кірген кезде пайдалануға болады. Бұл – дұрыс бастама", - дейді саясаттанушы Көшім.

Айтуынша, бұл заң алдағы бес жылда күшіне енбейді.

Әйелдер мен жастардың билікке келуі нені білдіреді

Саясаттанушы Дос Көшім әйелдер мен жастарға берілген квотаны демократияның белгісі деп санамайды. Кеңес үкіметі кезіндегі квотаны мысал еткен саясаттанушы енді партиялар мәжбүрлі түрде адам санын толтыруға жұмыс істейтін болады дейді. 

"Кеңес үкіметі кезінде осындай квота болды. Шаруалар, жұмысшылар, зиялылар, әскерилер болу керек деп бөліп қойды. Олар қандай заң талқыланып жатқанын да білмей, құр отыратын. Міне, квота деген - осы. Парламентке саяси дайындығы бар, саяси жұмыс істеген адамдар барады. Ол әйел бола ма, шал бола ма, ол маңызды емес", - дейді Көшім.

Тіпті парламентте 99 әйел отыруын да құп көретінін жеткізді. Алайда барлығы саяси әлемнен хабары бар болуы керек.

"Неге 30% болу керек? Бұл – адам құқығын шектеу, квота деген – адам құқығына қарсы іс-қимылдың бір түрі. Еуропа мен Америкада әйел мен ерді теңестіру үшін күрес жүрді. Ал бізде баяғыдан әйел мен ер адам тең. Бізге ондай жасанды квотаның қажеті жоқ. Жасанды теңгермешілік ешқашан нақты нәтижесін бермейді", - дейді ол.

Сол себепті жастар мен әйелдер 30 немесе 40 процент болу керек деген шешімнің қате екенін айтты. Бұл Қазақстанда әйелдерді төмен санау бар екенін көрсетеді, дейді саясаттанушы.

"Квота бізді дүние жүзіне масқара қылды. Бұл – өте нашар қадам. Ойланбай қабылданған шешім. Бұл бізде әйелдерді төмендету бар дегенді мойындау. Бірақ бізде ондай жоқ. Мұны енді заңға кіргізді. Енді партиялар ішіне әйелдердің санын 30%-ке жеткізу үшін мәжбүрлі түрде әрекет етеді", - дейді Дос Көшім.

Ал Самат Нұртаза бұл өзгеріске басқаша баға берді. Оның айтуынша, әйелдердің билікке келуі елдегі отбасылық, тұрмыстық мәселені шешуге жағдай жасайды. Ал жастар баспана алу мәселесін көтеруі әбден мүмкін.

"Әйел адам отбасы жағдайын ер адамға қарағанда жақсы түсінеді. Сол секілді баланың, жалғызбасты аналардың жағдайын әйелден басқа артық ешкім түсіне алмайды. Әйел адамдардың, ханымдардың билікке қол ұшын тигізгені дұрыс. Енді жалғызбасты аналардың жағдайын түзеуге, оларды жұмыспен қамтуға жағдай жасалады деген сенім бар", - дейді Нұртаза.

Айтуынша, әйел мен жастардың үлесі 40 процент болса да артық болмайды. 

"Қуаныш Сұлтанов, Владислав Косерев секілді депуттаттар 30 жылда халыққа қолдан келген пайдасын көрсетті. Ол кісілерге ақсақал ретінде ақыл айтып, кеңес беріп отырса жарасады.  Енді сол екі кісінің орнында жалындаған қыз-жігіттер отырса, әлдеқайда пайдасы көп болады", - дейді Самат Нұртаза.

Жас отбасылар баспана болмауы кесірінен жиі ажырасады. Бұл мәселені жастардың өзі көтерсе, құба-құп, дейді саясаттанушы.

Қай партия қанша дауыс жинайды

2016 жылы сайлауда Nur Otan партиясы 82,20%, "Ақ жол" демократиялық партиясы 7,18%, Қазақстан коммунистік халық партиясы 7,14% дауыс жинады.

Саясаттанушы Самат Нұртазаның ойынша, бұл сайлауда коммунистік партияға дауыс беретіндер аз болады. Ал Nur Otan партиясы шамамен 73-74% дауыс жинайды.

"Пандемия кезінде Nur Otan партиясының басқа бірде-бір партия халыққа көмектескен жоқ. Ал кей партияның атқарып жатқан жұмысы халықтың көңілінен шықпайды. Бұған дейінгі сайлауда Nur Otan партиясында 80-85% жинаса, биыл олай болмайды. Себебі партиялар саны да көп. Халықтың да көзқарасы өзгеріп жатыр. Ал қазіргі жағдайда Nur Otan партиясы 73-74%-пен жеңеді деген болжам бар", - дейді ол.

Айтуынша, екінші орынды "Ақ жол" партиясы алуы әбден ықтимал. Кей ауыл-аймақта бұл партияға дауыс берушілер көп болуы мүмкін. Ал соңғы орында коммунистік партия тұрады. Коммунистерге дауыс беру өзіңді сабаумен бірдей сияқты, дейді саясаттанушы.

"Коммунистерге бұрын неге дауыс берді? Себебі, бұрынғы ескі көздер бар. Ақсақалдар жыл сайын азайып жатыр. Сондықтан жаңа буын коммунизмнен аулақ. Сондықтан 2016 жыл мен 2020 жылдың арасында қаншама коммунизмге бүйрегі бұрған адам дүниеден өтті. Сол себепті бұл сайлауда коммунистер бұрынғыдай дауыс жинай алмайды", - дейді Нұртаза.

Саясаттанушы сайлау төңірегінде қандай да бір кикілжің болып тұратынына қарамастан, сайлаудың заңды түрде өтетініне сенімді.

Ассамблея сайлайтын 9 депутат кім

Мәжілісте 107 депутат бар, оның 98-і саяси партиялардан сайланады. Ал қалған тоғыз депутатты Қазақстан халқы Ассамблеясы сайлайды.

Саясаттанушы Дос Көшімнің айтуынша, Қазақстан халқы депутатты ұлты мен жынысына емес, тәжірибесі мен біліктілігіне қарай сайлайды. 

"Қазақстан халқы Ассамблеясының 9 мүшесі ұлты ұйғыр, корей болғаны үшін ғана депутаттар қатарында отыр. Бұл – ұят. Басқа ұлт өкілдері тек Ассамблея арқылы депутат болып отыр деген көзқарас пайда болады. Салдарынан қазақ өзінің ұлтынан басқа ешкімді қолдамайтын жаман халық болып көрінеді", - дейді саясаттанушы Дос Көшім.

Айтуынша, сол себепті шетелдіктерге Қазақстан халқының біліктілігін жоғары бағалайтынын дәлелдеу мүмкін емес.

Еске сала кетейік, Қазақстанда 10 қаңтарда мәжіліс және мәслихат сайлауы өтеді. Кандидаттарды ұсыну 10 қарашада басталып, 30 қараша сағат 18.00-ге дейін созылады. Партия тізімдерін тіркеу мерзімі 10 қарашадан 10 желтоқсанға дейін жалғасады.

499
Кілт сөздер:
сайлау, Мәжіліс, парламент, саясат
Тақырып:
Мәжіліс сайлауы
Тақырып бойынша
"Депутат ұйықтап отыр ма?": Владислав Косарев жауап беруге дайын – видео
Ыдырысова депутаттардың неге шаршап отыратынын айтып берді
Халықтың кредитін кешіру: депутаттар мәселені шешу жолдарын ұсынды
Депутаттар марқұм әріптесінің соңғы тілегін орындауға шешім қабылдады
Біз ұйықтап жатқан жоқпыз – "Ауыл" партиясы
Тағайындау, архивтегі сурет

Тоқаев Ұлттық статистика бюросының басшысын тағайындады

394
41 жастағы Айдапкелов 2016 жылдан бері Ұлттық экономика министрлігі статистика комитетінің төрағасы болды

НҰР-СҰЛТАН, 28 қазан – Sputnik. Нұрболат Айдапкелов Ұлттық статистика бюросының басшысы қызметіне тағайындалды, деп хабарлайды Ақорда.

"Мемлекет басшысының өкімімен Нұрболат Серғалиұлы Айдапкелов Стратегиялық жоспарлау және реформалар агенттігінің Ұлттық статистика бюросының басшысы қызметіне тағайындалды", - деп жазылған жарлық мәтінінде.

Айта кетсек, ұлттық экономика министрлігінің статистика комитеті Ұлттық статистика бюросы болып қайта құрылған болатын. 

Нұрболат Айдапкелов туралы не білеміз

41 жастағы Айдапкелов 2016 жылдан бері Ұлттық экономика министрлігі статистика комитетінің төрағасы болды.

Нұрболат Айдапкелов 1979 жылы 22 шілдеде дүниеге келген. Үйленген, төрт баласы бар.

"Экспорттық кредиттер мен инвестицияларды сақтандыру жөніндегі мемлекеттік сақтандыру корпорациясы" АҚ  қаржы департаментінің директоры, "ҚазАгро" ҰХ" АҚ атқарушы директоры қызметтерін атқарған.

2008-2009 жылдары "ҚазАгроГарант" АҚ басқарма төрағасы болды. 

2009 жылы Статистика агенттігінің төраға орынбасары, 2011 - 2013 жылдары агенттіктің жауапты хатшысы қызметін атқарды.

394
Тақырып бойынша
Қорғаныс министрінің екі орынбасары тағайындалды
Президент ұлттық банк төрағасының жаңа орынбасарын тағайындады
Тоқаев Мусинді цифрлық даму министрі қызметіне тағайындады
Тоқаев Мәдиев пен Өтеновті жаңа қызметке тағайындады
Тоқаев жаңа агенттік басшысының орынбасарларын тағайындады
Иллюстративті фото

Brent мұнайының бағасы 40 доллардан төмендеді

0
Brent маркалы солтүстік теңіз мұнай қоспасының қаңтардағы фьючерстерінің бағасы барреліне 39,97 долларға дейін төмендеді

НҰР-СҰЛТАН, 28 қазан – Sputnik. Brent мұнайының бағасы едәуір төмендеді, оған сауда-саттық мәліметтері дәлел.

РИА Новостидің хабарлауынша, Brent маркалы мұнайдың бағасы 5 қазаннан бері алғаш рет барреліне 40 доллардан төмен түсті.  

Нұр-Сұлтан уақытымен сағат 17.38-дегі жағдай бойынша Brent маркалы солтүстік теңіз мұнай қоспасының қаңтардағы фьючерстерінің бағасы 3,92 процентке – барреліне 39,97 долларға дейін, WTI мұнайының желтоқсандағы фьючерстері 4,83 процентке, барреліне 37,66 долларға дейін төмендеді.

Оқи отырыңыз: Ұлттық банк теңгенің неге әлсіреп кеткенін түсіндірді 

Еске сала кетейік, мұнай бағасының арзандауына байланысты, сәрсенбіде Қазақстанның ұлттық валютасы долларға шаққанда 430,51 теңгеге дейін әлсіреді.

Қазақстан Ұлттық банкінің монетарлық операциялар департаментінің директоры Нұржан Тұрсынханов бұған дейін ұлттық валютаның айырбас бағамы туралы түсініктеме берген болатын.

0
Кілт сөздер:
мұнай бағасы
Тақырып бойынша
Назарбаев Абу-Дабидің тақ мұрагерімен телефон арқылы сөйлесті
Экономистер теңгенің болашағына болжам жасады
Мамин экономиканы қалпына келтіру жағынан артта қалған өңірлерді атады 
2021 жылы ЖОО оқытушыларының жалақысы қанша болады
"Инфляциядан төмен болады": депутаттар республикалық бюджеттің шикі тұстарын атады