Саясаттанушы Данияр Әшімбаев

Үкімет басына кім келеді саясаттанушы үш адамның атын атады

16834
(Жаңартылды 13:59 11.01.2021)
Қазіргі премьер Асқар Мамин, мәжіліс спикері Нұрлан Нығматулин және Nur Otan төрағасының орынбасары Бауыржан Байбек үкімет басшысы болуы мүмкін

НҰР-СҰЛТАН, 11 қаңтар – Sputnik. Саясаттанушы Данияр Әшімбаев мәжіліс сайлауынан кейін жасақталатын үкіметтің жаңа құрамына қатысты пікір білдірді, деп хабарлайды Sputnik Қазақстан тілшісі.

"Меніңше, үкіметтің басым бөлігі қайта тағайындалады. Себебі бізде тәжірибелі кадрлар көп емес. Сосын қазіргі премьер-министр Асқар Маман барлық дерлік саяси күштердің көңілінен шығып отыр", - деді Әшімбаев Sputnik Қазақстан тілшісіне берген сұхбатында.

Оқи отырыңыз: Үкімет отставкаға кетуі керек – Тоқаев 

Сарапшының ойынша, кейбір министрлер ауысады. Оларды өңірлерді күшейту үшін жіберуі мүмкін. Себебі соңғы бір жылдың ішінде әкімдіктердің жұмысынан біраз олқылық шықты. Соны түзету үшін орталықтан адам жіберу керек.

Осы орайда саясаттанушы білім және денсаулық сақтау министрлерінің ауысына қатысты өз ойын айтты.  

"Енді бізде білім, денсаулық министрлерін жиі сынайды ғой. Білімнің өзі жиі сынға ұшырайтын сала ғой. Министрді (Асхат Аймағамбетов – Sputnik) ауыстырайық дейді. Бірақ оның осы қызметке келгеніне көп болған жоқ. Ал белгілі бір проблеманы шешу үшін үш-төрт жыл қажет. Сосын бірізділік керек. Осы салада проблема көп. Ал карантин көп проблеманы ушықтырып жіберді", - деп атап өтті Әшімбаев. 

Сарапшы денсаулық сақтау министрінің жұмысына көңілі толмайтынын жеткізді. Бірақ мемлекет тарапынан өзгеріс жасау ниеті болмаса, министрді ауыстыру мәселесі көтерілмейді. Бұдан бөлек, әділет министрі Марат Бекетаев та бірнеше рет сынға ұшыраған. Жалпы, ротация болады. Бірақ, оның айтуынша, жаңа адамдар келмейтін сияқты.  

"Бәлкім, мәжіліске вице-премьер Ералы Тоғжанов барады. Ал үкімет басшысы қызметіне қазіргі Асқар Мамин лайықты. Сосын мәжіліс спикері Нұрлан Нығматулин мен Nur Otan төрағасының орынбасары Бауыржан Байбекті атап жатыр. Осы үш кандидат", - деді Әшімбаев.

16834
Кілт сөздер:
үкімет, саясат
Үкімет үйі

Тоқаевтың төрағалығымен үкіметтің кеңейтілген отырысы басталды

104
(Жаңартылды 10:56 26.01.2021)
Кеңейтілген отырыста елдің әлеуметтік-экономикалық дамуының 2020 жылғы қорытындылары мен алдағы жоспары талқыланады

НҰР-СҰЛТАН, 26 қаңтар – Sputnik. Қазақстан президенті Қасым-Жомарт Тоқаевтың төрағалығымен жаңарған үкіметтің кеңейтілген отырысы басталды, деп хабарлайды Sputnik Қазақстан.

Отырыс онлайн өтіп жатыр. Жиында елдің әлеуметтік-экономикалық дамуының 2020 жылғы қорытындылары мен алдағы жоспары талқыланады.

Журналистер отырыстан жаңалықтарды "Қазмедиа орталығынан" таратады.

Еске салсақ, бұрынғы үкімет 10 қаңтарда өткен парламент сайлауынан кейін отставкаға кеткен болатын.

18 қаңтарда мемлекет басшысы Қазақстан үкіметінің жаңа құрамын бекітті.

Премьер-министр мен министрлердің басым бөлігі өз орнын сақтап қалды. Екі министр ғана ауысты. Еңбек және халықты әлеуметтік қорғау министрлігіне Серік Шәпкенов келсе, ұлттық экономика министрлігін Әсет Ерғалиев басқарды.

Тағы оқыңыз: Мамин екі министрді не себепті ауыстырды – сарапшылар пікірі

Сондай-ақ, сыртқы істер министрі Мұхтар Тілеуберді төртінші вице-премьер қызметін қоса атқарады.

Қазақстанда мәжіліс сайлауы 10 қаңтарда өтті. Дауыс беру қорытындысына сәйкес, парламенттің төменгі палатасына үш партия  – Nur Otan, "Ақ жол" және Қазақстанның халық партиясы (бұрынғы коммунистер партия) өтті.

"Nur Otan" партиясы – 76 мандат, "Ақ жол" демократиялық партиясы – 12 мандат, ал Қазақстанның халық партиясы 10 мандат алды.

Сондай-ақ, мәжіліс депутаттарының қатарына Қазақстан халқы Ассамблеясының өкілдері де енді.

104
Кілт сөздер:
Үкімет, Қасым-Жомарт Тоқаев
Тақырып бойынша
Тоқаев қазақстандықтар қызу талқылап жатқан заң жобасына қатысты пікір білдірді
Қазақстанда көлеңкелі үкімет құрылуы мүмкін бе – министр жауап берді
Тоқаевтың көмекшісі коронавирусқа қарсы вакцинаны екінші рет салдырды
Тоқаев биыл кімдердің жалақысы өсетінін айтты
Су кодексіне түзету енгізілді: Тоқаев заңға қол қойды
Ауыз су

Су кодексіне түзету енгізілді: Тоқаев заңға қол қойды

111
Қолданысқа енгізілген заң ауылдық жерлердегі халықты ауыз сумен жабдықтау қызметінің құнын төмендетуді қарастырады

НҰР-СҰЛТАН, 25 қаңтар – Sputnik. Президент Қасым-Жомарт Тоқаев "Қазақстан Республикасының Су кодексіне жергілікті өкілді, орталық және жергілікті атқарушы органдар арасында ауызсумен жабдықтауды субсидиялау жөніндегі өкілеттіктердің аражігін ажырату мәселелері бойынша өзгерістер мен толықтырулар енгізу туралы" заңға қол қойды, деп хабарлады Ақорданың сайты.

Оқи отырыңыз: Таза ауыз су әрбір үйде болуы керек – Тоқаев

Жаңа түзетулерге сәйкес, енді жергілікті жерде ауыз сумен жабдықтау қызметінің бағасын мәслихаттар анықтайды. Мысалы, мәслихат республика бойынша ең төменгі тарифтен төмен емес және облыстың әлеуметтік-экономикалық дамуын ескере отырып, орташа облыстық деңгейден жоғары емес төлемдер мөлшерін бекіте алады.

Заң жобасының негізгі мақсаты:

  • халықты ауыз сумен жабдықтауды қамтамасыз ету рәсімін оңтайландыру;
  • жаңадан салынған ауыз сумен жабдықтау жүйелерін жеңілдікті объектілер тізіміне қосуды жеделдету;
  • ауылдық жерлердегі халықты ауыз сумен жабдықтау қызметінің құнын төмендету.

Айта кетейік, бүгінде халықты ауыз сумен жабдықтау қызметінің құнын төмендету мақсатында мемлекеттен субсидия бөлініп тұрады. 2021 жылда осы мақсатта 16 миллиард теңге қарастырылған.

Ресми мәліметке сәйкес, қазіргі кезде ауыл халқының 87 проценті орталықтандырылған ауыз сумен қамтамасыз етілген. Осы санатқа 4 078 ауыл кіреді. Олардың ішінде 42 проценті субсидия алған.  

111
Кілт сөздер:
ауыз су, Қасым-Жомарт Тоқаев
Тақырып бойынша
Министрді де алдаған: Павлодар тұрғындары өңірдегі былықты жайып салды
"Бәрі түсінікті": министрден көңілі қалған Нығматулин қолын бір-ақ сілтеді
Ақорда миллиардтаған қаражаттың жымқырылғанын хабарлады
Қызылордада көпқабатты үйдің тұрғындары судың түсінен шошып отыр
Назарбаева сенаттың ұсынысына атүсті қараған үкіметтегі шенеуніктерді сынады  
2025 жылға қарай халық толықтай ауыз сумен қамтылады – Мамин 
Бойжеткен, иллюстративті фото

Семейде сұлулық байқауының жеңімпазы басшылық қызметке тағайындалды

0
Екі жыл бұрын "Семей ханымы" байқауының жеңімпазы атанған Диана Шаяхметова бүгінде төрт баланың анасы

НҰР-СҰЛТАН, 27 қаңтар – Sputnik. Семей қаласының тұрғын үй-коммуналдық шаруашылығы бөлімінің бастығы қызметіне "Миссис-2019" байқауының жеңімпазы тағайындалды. Ол мұндай міндетті бұрынғы бастығының жұмыстан босатылуына байланысты уақытша атқаратын болды.

"Диана Шаяхметова 25 қаңтардан бастап Семей қаласының тұрғын үй-коммуналдық шаруашылық бөлімінің бастығы қызметіне тағайындалды. Ол екі жыл бұрын "Семей ханымы-2019" байқауына қатысып, жеңімпаз атанған болатын", – деп жазады облыстық Arnapress басылымы.

Осы кезге дейін Шаяхметова аталған бөлім бастығының орынбасары қызметін  атқарып келген.

34 жастағы келіншек бүгінде төрт баланың анасы.

Ал бөлімнің бұрынғы басшысы Амантай Өтелбаевтың қызметінен босатылуына қатысты әлі ресми ақпарат жоқ. Басылым дерегінде оның Семей қаласының тұрғын үй-коммуналдық секторын дамытуға қосқан үлесі ұшан-теңіз екені айтылған.

Оқи отырыңыз: Дауға қалған Семей полициясының бастығы қандай жағдайда қызметінен кететінін айтты

Айта кетейік, 25 қаңтарда Семей қаласының әкімі ауысты. Облыс әкімі Даниал Ахметовтің өкімімен Нұрымбет Сақтағанов жаңа әкім болды. Оның кандидатурасы қалалық мәслихаттың кезектен тыс екінші сессиясында мақұлданды.

Ахметов экс-әкім Ермак Сәлімовке жұмысы үшін алғыс білдіріп, оның бұдан әрі облыс әкімінің тұрғын үй және құрылыс мәселелері жөніндегі кеңесшісі болып қала беретінін атап өтті.

0
Кілт сөздер:
Семей, жаңа қызмет
Тақырып бойынша
Семей медицина университетінің басшылығы билікке үндеу жасады
"Бір көзді баланы ертіп жүрдім": Семей өңірінің тұрғыны полигонның зардабы жайлы айтты
Семей полицейлері тұрғындарды ұйқыдан оята алмай, үйге көршінің қақпасы арқылы кірді
Абайдың отаны Семей туралы қызықты деректер
Сұлулық байқауы жеңімпазының жансыз денесі табылды – қылмыстық іс қозғалды