АСТАНА, 8 желтоқсан – Sputnik. Павлодар қаласының №2 сотында апалы-сіңлілі екі қызды қағып кетіп, біреуін мерт қылған отыз жастағы трамвай жүргізушісі Наталья Пекнич екі жылға бас бостандығынан айырылды, деп хабарлады агенттік тілшісі.
Сотталушыға сонымен қатар сот шығындарын өтеу міндеттелді.
"Мен зардап шегуші тараптан тағы да кешірім сұраймын. Ештеңені түзете алмайтынымды түсінемін, алайда мен шын өкініп тұрмын, мені бас бостандығымнан айырмауыңызды сұраймын. Менің де кішкентай қызым бар", — деді Наталья Пекнич соңғы сөзінде. Алайда сот оның өтінішін қанағаттандырмады.
Естеріңізге сала кетейік, жол-көлік оқиғасы 7 қыркүйек күні сағат 07.43-те Ломов және Катаев көшелерінің қиылысында болды. Тоғыз және сегіз жастағы екі қызды трамвай қағып кетті. Қыздардың үлкені көз жұмды, кішісі ауыр халде ауруханаға жатқызылды.
