ПЕТРОПАВЛ, 8 қыркүйек — Sputnik. Петропавлда кәсіпкерлерге жалпы сомасы үш миллиард теңгеден астам салықты төлеуден қашқақтауға көмектескен ұйымдасқан қылмыстық топ анықталып, қолға түсті, деп хабарлады Солтсүтік Қазақстан облысы бойынша мемлекеттік кірістер департаменті басшысының орынбасары Нұрымжан Абатов брифингте.
"Бірнеше жылдар бойы жалған есеп-фактуралар шығарып, кәсіпкерлерге салық төлемеуге жағдай жасап келген қылмыстық топ әшкереленді", — деп мәлімет берді Абатов.
Ол атап өткендей, ұйымдастырушы мен орындаушы уақытша ұстау абақтысына қамауға алыныпты.
Қылмыстық топтың кеңсесі мен тұрғын үйлерінен ноутбуктер, жүйелік блоктар, принтерлер, флэшкалар, ЭЦП кілттер, мөрлер мен штамптар, ақшалай қаржы мен іске қатысы бар басқа да заттар тәркіленді. Тергеу жүріп жатыр.
