Алматыда 25 мамырдан бастап ашылатын нысандарға қандай талап қойылды
(Жаңартылды 18:43 22.05.2020)
Жұмыс берушілер бір ай ішінде қызметкерлердің 10%-ін тексеруден өткізуі қажет. Ал базарларда әр 30 метр сайын санитайзер қойылуы қажет. Әрбір сатушы қолғап және бетпердемен жұмыс істейдіАЛМАТЫ, 21 мамыр – Sputnik. Алматы қаласының бас санитар дәрігері Жандарбек Бекшин 25 мамырдан бастап ашылған нысандарға қандай талап қойылғанын айтты, деп хабарлайды Sputnik Қазақстан тілшісі.
Бекшиннің айтуынша, сауда үйлері мен халыққа қызмет көрсету орталығындағы қызметкерлердің дене қызуы жұмысқа келген кезде өлшенетін болады. Сонымен қатар жұмыс берушілер қызметкерлерін коронавирус инфекциясына тексеруден өткізуі қажет.
"Әр нысанның есігінде бетпердесіз кіруге болмайтыны жазылған жарнама болуы тиіс. Үлкен нысандарда дезинфекциялау туннелін орналастыруды ұсындық. Сонымен қатар жұмыс берушілер бір ай ішінде қызметкерлердің 10%-ін ПТР тексеруден өткізуі қажет", - деді Бекшин.
Ал сауда үйлеріндегі дүкендерде сатып алушылар арасындағы арақашықтықты көрсететін таңбалар қойылуы тиіс.
"Жабық сауда орындарында, басқа да қызмет көрсету орталықтарында қызмет көрсету кезінде әлеуметтік арақашықтық таңбалары қойылуы керек. Сатып алушылардың арасында ең кемінде бір жарым-екі метр болуын талап етіп отырмыз", - деді Алматының бас санитар дәрігері.
Ал базарларда әр 30 метр сайын санитайзер қойылуы қажет. Әрбір сатушы қолғап және бетпердемен жұмыс істейді. Сатып алушылар да базар ішіне міндетті түрде бетпердемен жүруі керек.
Ал қоғамдық тамақтану орындарындағы адам санына шектеу қойылмайды, тек әр үстелде төрт адамнан артық бірге отыруға болмайды.
"Қоғамдық тамақтану орындарына бірнеше талап қойып жатырмыз. Бір үстелдің басында төрт адамнан артық отыруға болмайды. Бұл бір отбасының мүшесіне қатысты емес. Екіншіден, үстелдердің аралығы екі метр болуы керек. 20, 30, 50 адам деп шектемейміз, арақашық екі метр болса, ол жерге 50-60 адам сияды. Әрбір дәмхана, мейрамхана иесі нормалардың сақталуын қадағалауы қажет", - деді Бекшин.
Кілт сөздер:
- Тақырып бойынша
- Арнайы дайындық қажет емес - астаналықтарға жұмыс ұсынылды
Қазақстанның жеті облысында дабылды ескерту жарияланды
НҰР-СҰЛТАН, 19 қаңтар – Sputnik. Қазақстанның жеті облысында 20 қаңтар дабылды ескерту жарияланды, деп хабарлайды Қазгидромет.
Ақмола облысында күндіз басым бөлігінде қар жауады деп болжанып отыр. Кей жерлерде бұрқасындатып, тұман түседі. Шығыстан соғатын желдің бағыты оңтүстік-батысқа ауысады, күші кей жерлерде 15-20 м/с дейін барады. Көкшетау қаласында таңертең және күндіз бұрқасын соғады, тұман басады, желдің екпіні 15 м/с болады.
Қостанай облысында кей жерлерде – тұман және бұрқасын. 15-20 м/с жылдамдықпен жел соғады.
Қарағанды облысында кей жерлерде бұрқасындатады деп күтілуде. Оңтүстік-батыстан, батыстан соғатын жел 15-20 м/с дейін күшейеді. Қарағанды қаласында күндіз жел күшейеді, екпіні – 18 м/с.
Тағы оқыңыз: Қазгидромет: желтоқсан айында соңғы 8 жылдағы ең қаһарлы қыс болды
Солтүстік Қазақстан облысының басым аумағында күндіз қар жауады. Кей жерлерде тұман түсіп, бұрқасындатады. Желдің күші 15-20 м/с, екпіні 23-28 м/с дейін жетеді деп болжануда. Петропавл қаласында да бұрқасын соғады, желдің екпіні 23-28 м/с дейін күшейеді.
Түркістан облысында кей жерлерде – тұман және жел (15-20 м/с).
Қызылорда облысында кей жерлерде тұман, көктайғақ болады. Қызылорда қаласында – көктайғақ.
Батыс Қазақстан облысында кей жерлерді тұман басады, бұрқасындатады. Орал қаласында да тұман және бұрқасын болжанып отыр.
Кілт сөздер:
Түркістан облысында демалыс күндері бірқатар нысан жұмыс істемейді
(Жаңартылды 18:03 19.01.2021)
Батыс Қазақстан облысы Орал қаласының аумағында 21 қаңтардан карантиндік шаралар қатаңдатылады. Сондай-ақ, Нұр-Сұлтан қаласында да шектеу шаралары күшейтілдіАЛМАТЫ, 19 қаңтар – Sputnik. Түркістан облысындағы базарлар демалыс және мереке күндері жабылады, деп хабарлайды Sputnik Қазақстан.
Түркістан облысы тұрғындары арасында коронавирус инфекциясының таралуына тосқауыл болу мақсатында карантин мен шектеу шаралары ұзартылды. Өңірдің бас санитар дәрігерінің қаулысына сәйкес, 15 қаңтардан бастап жабық базарлар демалыс және мереке күндері жұмыс істемейді. Жұмыс күндері сағат 09.00-ден 19.00-ге дейін қызмет көрсетеді.
Сондай-ақ, үй жанындағы дүкендер сағат 09.00-ден 23.00-ге дейін жұмыс істейді. Мал базарлар санитариялық-дезинфекциялық режимді күшейте отырып, тек сәрсенбі ашық болады.
Демалыс және мереке күндері қоғамдық тамақтану объектілерінің қызметі тоқтатылады. Олар дүйсенбі-жұма 09.00-ден 23.00-ге дейін ашық. Нысандарда санитариялық-дезинфекциялық режим, 2 метр әлеуметтік арақашықтық сақталуы керек.
Құрылыс, оптика, гүл дүкендері мен зоомагазиндердің қызметі жұмыс күндері сағат 09.00-ден 18.00-ге дейін, демалыс және мереке күндері жұмысы тоқтатылды.
Сұлулық салондары, шаштараздар, СПА-орталықтар, косметологиялық қызмет көрсететін объектілер қызметі сағат 09.00-ден 21.00-ге дейін шектеледі. Міндетті түрде алдын ала жазылу арқылы қабылдайды.
Мектепке дейінгі балалар мекемелерінің кезекші топтарында 15 баладан аспайды.
Айта кетейік, Батыс Қазақстан облысы Орал қаласының аумағында 21 қаңтардан карантиндік шаралар қатаңдатылады. Сондай-ақ, Нұр-Сұлтан қаласында да шектеу шаралары күшейтілді.
Кілт сөздер:
Тақырып:
Президент мемлекеттік қызметшілерді қысқартуға қатысты тапсырма берді
НҰР-СҰЛТАН, 19 қаңтар — Sputnik. Қазақстан президенті мемлекеттік қызмет істері агенттігінің төрағасы Анар Жайылғанованы қабылдады, деп хабарлайды Ақорда.
Кездесуде мемлекет басшысына агенттіктің 2020 жылы атқарған жұмыстарының негізгі қорытындылары туралы егжей-тегжейлі есеп берілді.
Анар Жайылғанова ведомствоның мемлекеттік қызметке орналасу рәсімдерін жетілдіруге, саяси қызметті кәсібилендіруге, қызметкерлерді ынталандыруға және дамытуға бағытталған жұмыстар туралы айтты. Президенттік жастар кадрлық резерві, сондай-ақ, мемлекеттік қызметтің ұйымдастыру мәдениетін өзгертуге қатысты атқарылған шара жайлы ақпарат берді.
Агенттік төрағасы мемлекеттік қызметті цифрландыру, оның ішінде, "Е-қызмет" жүйесінің интеграция аясын кеңейту және i-Qyzmet жүйесін әзірлеу барысына да тоқталды.
Жайылғанованың айтуынша, өткен жылы агенттіктің штаты 10 процентке қысқарған, ал биыл ақпан айының соңына дейін тағы да 15 процентке оңтайландырылмақ.
Қасым-Жомарт Тоқаев агенттік төрағасына орталық және жергілікті деңгейдегі мемлекеттік қызметшілерді қысқарту үдерісінің ашықтығы мен тиімділігін бақылауды қамтамасыз етуді тапсырды. Сонымен қатар президент мемлекеттік басқару тұжырымдамасын әзірлеу және жүзеге асыру аясында ведомствоның жұмысын жандандыруға нұсқау берді.
Кілт сөздер: