НҰР-СҰЛТАН, 3 қараша – Sputnik. Батыс Қазақстан облысы Ақжайық ауданы Ақжол ауылдық округінің әкімі Татжан Өтемісов пандемия кезінде ұлына ұлан-асыр үйлену тойын жасағаны үшін қызметінен кетеді, деп хабарлайды "Мой город" порталы.
3 қараша күні COVID-19-дың таралуына жол бермеу жөніндегі жедел штабтың кезекті отырысы өтті.
Жиын барысында БҚО әкімі Ғали Есқалиев Ақжайық ауданына қарасты Ақжол ауылдық округінің әкімі Татжан Өтемісовтың ұлына той жасағаны расталып-расталмағанын сұрады. Әкім аппаратының басшысы Берік Батаев ауыл әкімі 9 қазаннан 9 қарашаға дейін кезекті еңбек демалысында жүргенін мәлімдеді.
"Бұл фактіге қатысты тексеріс жүргізілді. Татжан Өтемісов 9 қарашаға дейін еңбек демалысында. 10 қарашадан бастап ол қызметінен босатылады. Бұған қоса карантиндік шектеулерді бұзғаны үшін Өтемісовке қатысты әкімшілік хаттама толтырылып, 41 мың теңге айыппұл салынды", -деді Батаев.
Басылым ауыл әкімі 10 қарашада мемлекеттік қызметтен кететінін атап өтті.
Той Орал қаласындағы мейрамханалардың бірінде өткен. Видеоны жолдаған адамдардың айтуынша, той иесі – Ақжайық ауданы Ақжол ауылдық округінің әкімі. Шенеуніктің өзі бұған қатысты түсініктеме берген жоқ. Өңір басшысы Ғали Есқалиев Өтемісовке қатысты тиісті шара қабылдауды тапсырды.
