НҰР-СҰЛТАН, 5 қараша – Sputnik. Сот Қарағанды қаласының тұрғынына емханадан анықтама сатып алғаны үшін айыппұл салуға және қоғамдық жұмыстарға тартуға үкім шығарды, деп хабарлайды Қарағанды облысы бойынша қылмыстық атқару жүйесі департаментінің баспасөз қызметі.
Әйелдің айтуынша, ол жұмыстан екі күнге сұранған, бірақ басшылық жібермеген. Содан кейін ол жалған еңбекке жарамсыздық парағын жасатуға шешім қабылдайды. Алайда кадр бөлімі оның жалған екенін байқап қалған. Жұмыс беруші әйелді кешірмей, сотқа шағым түсірді.
Оқи отырыңыз: Астанада емхананың екі қызметкері ұсталды
Әйел Қазақстан Қылмыстық кодексінің 385-бабының 3-бөлігі бойынша (жалған құжаттарды, мөртабандарды, мөрлерді, бланкілерді қолдан жасау, дайындау немесе сату) кінәлі деп танылды. Ол 60 сағатқа қоғамдық жұмыстарға тартылды.
Қазір мас болып көлік жүргізгендермен, бұзақылармен және басқа да құқық бұзушылармен бірге жазасын өтеп жатыр. Олар "Қоғам алдындағы қарызыңды өте" деген жазуы бар күртешелер киіп, көше сыпырып жүр.
