Сот, судья

Қарағандыда судья түсіп қалған видеоға қатысты тың ақпарат шықты

843
Видео бір ай бұрын түсірілген болып шықты, бірақ осы уақыттың ішінде мобильді топтар бұл туралы тіс жармаған

НҰР-СҰЛТАН, 22 ақпан — Sputnik. Қарағанды санитарлық-эпидемиологиялық бақылау басқармасы желіде тараған той видеосына қатысты түсініктеме берді. Кадрде судья Естай Исабеков көзге түскен болатын.

Ведомствоның хабарлауынша, жиынды Исабековтың бауыры өткізген.

"Естай Исабековтың 2021 жылдың 12 ақпанындағы жазбаша арызына сәйкес, тойды туысы А.Исабеков ұйымдастырған. Оған әкімшілік құқық бұзушылық туралы кодекстің 425-бабына сәйкес, айыппұл тағайындалды. Жеке тұлғалар үшін айыппұл сомасы 30 айлық есептік көрсеткіш шамасында (87 510 теңге)", – деді ведомствода.

Сондай-ақ, карантин талабын бұзғандардың жұмыс орнына тәртіптік жазаға тарту жөніндегі хат жолданды.

Еске сала кетсек, мобильді топ мүшелері отбасылық мерекенің үстінен түскен. Видеода Исабеков тексерушілермен "сен" деп сөйлесіп тұр, полицейден кім екенін білу үшін маскасын шешуді талап етеді, сонымен қатар мейрамханада прокурорлар да демалып жатқанын айтқан.

Видео бір ай бұрын түсірілген болып шықты, бірақ осы уақыттың ішінде мобильді топтар бұл туралы тіс жармаған.

843
Кілт сөздер:
видео, той, судья, Қарағанды
Тақырып бойынша
Әкімнің тойдағы даулы мәлімдемесі желіде қызу талқылануда – видео   
Қарағандыда тойда түсірілген видео желіде тарап кетті
Ақтауда паркингте той жасағандар кім екені анықталды – видео
Екі судья мен полицейге қатысты тергеу басталғаны хабарланды
Қарағанды облысында судья ұсталды
Алматы көрінісі

Төтенше жағдайлар министрі алматылықтарға ескерту жасады

5745
(Жаңартылды 13:03 02.03.2021)
Ильин енгізілетін шектеу шараларына түсіністікпен қарауды сұрады. Себебі құрылыс жұмыстарының нәтижесінде Алматы қаласының қауіпсіздігі қамтамасыз етіледі

НҰР-СҰЛТАН, 2 наурыз – Sputnik. Төтенше жағдайлар министрі Юрий Ильин Үлкен Алматы шатқалында шектеу шараларының енгізілетінін мәлімдеді, деп хабарлайды Sputnik Қазақстан тілшісі.

"Биыл біз екі сел тоқтату бөгетін салуға кірістік. Біреуі – Аюсай шатқалында, екіншісі – Ақсай шатқалында. Жақында ғана сол жаққа жұмыс сапары ұйымдастырылды. Негізгі мақсат – басталып кеткен жұмыстарды бақылау. Осы орайда Алматы тұрғындарына және туристерге қауіпсіздікті сақтау мақсатында Үлкен Алматы шатқалына баруға бірқатар шектеу енгізілетінін ескерткіміз келеді", - деді Ильин орталық коммуникациялар қызметінде өткен онлайн брифингте. 

Министрдің айтуынша, қазіргі кезде Алматы қаласына қауіп төніп тұрған жоқ.

"Сел түсу кезеңі шілде-қыркүйек аралығында болады. Сол кезде біздің мамандарымыз таудағы көлдердің деңгейін бақылап, суды түсіру шараларын жүргізеді", - деді Ильин.

Осы орайда министр Үлкен Алматы шатқалында енгізілетін шектеу шараларына түсіністікпен қарауды сұрады. Себебі құрылыс жұмыстарының нәтижесінде Алматы қаласының қауіпсіздігі қамтамасыз етіледі.

5745
Кілт сөздер:
министр, Алматы, төтенше жағдай
Тақырып бойынша
Алматыда бес баласы бар отбасы қоғамдық моншада уланды
Астанада мешіт құрылысы кезінде төтенше оқиға болды – видео
Жезқазғанда жергілікті ауқымдағы төтенше жағдай жарияланады
Дәретханаға сұранған: Алматыда ер адам тергеу изоляторынан қалай қашып кетті
Алматыда коронавируспен күрескен дәрігерлерге ескерткіш қойылады
Полицей, құжат

Түсінен шошып оянған павлодарлық полицияны әбігерге салды

753
(Жаңартылды 13:04 02.03.2021)
Павлодар қаласының тұрғыны полицияға хабарласып, әйелін белгісіз біреудің ұрлап кеткенін айтқан

АЛМАТЫ, 2 наурыз – Sputnik. Павлодарлық мас күйінде полицияға хабарласып, әйелін ұрлап кеткенін мәлімдеді. Ал әйел ол уақытта жұмыста болған, деп хабарлайды Polisia.kz.

Полицияның хабарлауынша, Павлодар қаласының тұрғыны тәртіп сақшыларына хабарласып, әйелін белгісіз біреудің ұрлап кеткенін айтты. Оның сөзінше, бәз біреулер хабарласып, төлем талап еткен. Оқиға орнына барған полиция қызметкерлері ешқандай адам ұрлау әрекеті болмағанын анықтады.

Әйелі таңертең жұмысқа кеткен, күні бойы жұмыста болған. Күйеуі біраз ішімдік ішкеннен кейін оянып, әйелін таппай, полицияға қоңырау шалған.

"Түсімде көрген сияқтымын", - деді павлодарлық полиция қызметкерлеріне.

Айта кетейік, Павлодар қаласы бойынша полицияға күн сайын 300-500 қоңырау түседі.

753
Архивтегі фото

АҚШ пен Сауд Арабиясының қарым-қатынасы шиеленісті ме?

0
Серіктестік екі тараптың да стратегиялық мүдделеріне сәйкес келеді. Алайда демократия мен адам құқықтары мәселесінде қос мемлекеттің жолы қақ айырылады

НҰР-СҰЛТАН, 2 наурыз – Sputnik. Сауд Арабиясы мен АҚШ қарым-қатынасы күрделі кезеңнің алдында тұр. АҚШ-тың Ұлттық барлау қызметі 2018 жылы журналист Джамал Хашукджиді өлтіру туралы баяндаманы жариялағаннан кейін Ақ үй жаңа стратегия жариялады: америкалықтар Йемендегі соғысты тоқтатып, адам құқықтарын сақтауды талап етті, деп жазды РИА Новости.  

Мемлекеттік департамент басшысы Энтони Блинкен 76 саударабиялық азаматқа визалық шектеу енгізу туралы мәлімдеді. Блинкеннің ақпаратына сәйкес, бұл азаматтардың диссиденттерді қорқытып-үркітуге және Хашукджи өліміне қатысы бар көрінеді. Дербес санкциялар Жалпы барлау қызметінің басшысы Ахмад әл Асириге де қатысты болмақ. Барлау баяндамасында Сауд Арабиясы билігін өткір сынға алған The Washington Post газетінің авторын қинап өлтіруге мұрагер ханзада Мұхаммед бен Салманның да қатысы бар екені айтылған. Ханзаданың мақұлдауынан кейін журналисті ұрлап әкетіп, оны мүшелеп өлтірген. СІМ бұл айыптауды толығымен жоққа шығарды. Әйтсе де, ханзадаға қатысты жеке шектеулер енгізілген жоқ. Бірақ жаңа президент Джо Байден Эр-Риядты қатаң жазалайтынын мәлімдеген болатын.

"Бір адаммен емес, бүкіл мемлекетпен арадағы қарым-қатынас әлдеқайда маңызды. Біз корольдікті қорғауға тырысамыз", - деген Блинкен Эр-Рияд әрекеттері АҚШ мақсаттары мен құндылықтарына сәйкес келуі маңызды екенін атап өтті.

Корольдіктің қорғанысын қамтамасыз еткені үшін америкалықтарға мұнайға қолжетімділік беру аталған екі мемлекеттің қарым-қатынасының негізі десе де болады. Оның үстіне Сауд Арабиясы Америка қару-жарағына ең ірі тапсырыс беруші. Серіктестік екі тараптың да стратегиялық мүдделеріне сәйкес келеді. Алайда демократия мен адам құқықтары мәселесінде қос мемлекеттің жолы қақ айырылады.

Корольдің жеке кеңесшісі Салман атап өткендей, Барак Обама президент болған соңғы жылдарда пікірлер қайшылығы туындады. Бұл көбіне Сауд Арабиясының басты қарсыласы – Иранға деген АҚШ-тың қарым-қатынасында байқалды. Екі елдің барлау қызметі қауіпсіздік саласында сәтті әріптестік орнатқанымен, арабтардың монархияны сынаушылармен күресу әдістері АҚШ-тың көңілінен шықпады. Оған Йемендегі проблемалар қосылды. Ақ үй Америка қару-жарағы қолданылған соғыс әрекеттерінің құрбандарына алаңдады.

Ақ үйге Дональд Трамп келгеннен кейін қарым-қатынас біршама жақсарды. Трамп президент қызметіне кіріскенге дейін корольдікті аса жақтырмағанымен, ол өзінің ең бірінші іссапарын дәл осы Эр-Риядтан бастады. Хашукджи өлімі туралы баяндама алдыңғы президент кезінде әзірленген. Бірақ құжат сол уақытта жарияланбады.

"Трамп Вашингтон міндеттерін азайту үшін одақтастарға инвестиция салды. Оның серіктестері, соның ішінде Сауд Арабиясы бұрынғыдан да көп қару-жарақ сатып алып, аймақтағы жағдайда өз бақылауына алуы керек болды. Есесіне АҚШ әәскери-саяси қолдау көрсетіп, одақтастары үшін маңызды бастамаларды мақұлдап отырды", - дейді Мәскеу мемлекеттік халықаралық қатынастар институты Халықаралық зерттеулер институты Перспективалы америкалық зерттеулер орталығының директоры Максим Сучков.

Жаңа президент сайлануымен қатар бұл бағдар өзгереді деп болжанған және алғашқы қадамдар жасалып қойды. Байден Йемендегі шабуылдау операцияларын қолдау тоқтатылатынын хабарлады. Оның ішінде қару-жарақ экспорты да бар. Бұл өткен жылдың желтоқсанында мақұлданған 290 миллион долларға дәлдігі жоғары үш мың GBU-39 бомбасы мен сомасы 478 миллион долларды құрайтын жеті мың Paveway IV бомбасын жеткізуге қатысты болып отыр. Вашингтон Йемендегі қақтығысты дипломатиялық жолмен шешетінін мәлімдеді. Оның үстіне ақпан айынан бастап хуситтерді террористік топтар тізімінен алып тастады.

Бірақ сарапшылар екі елдің қарым-қатынасы түбегейлі өзгереді деп күту орынсыз деп санайды. Яғни, стартегиялық жоспар сол күйінде қалады.

"Америкалықтар сонау Обама кезінен бері өз энергетикасы мәселесінде едәуір өсіп, мұнай өндірісінде әлемдегі жетекші орынға ие болды да, Сауд Арабиясына деген қажеттілік азайды. Аймақішілік динамикада көп мәселе ирандық ядро келісіміне тәуелді болып тұр. Эр-Рияд – Тегеранмен қарым-қатынастағы АҚШ-тың басты серіктестерінің бірі. Егер Сауд Арабиясына тым қатты қаталдық танытса, бұл Иран үшін тиімді болады. Хашукджиді өлтіргендерді жазалау үшін АҚШ бұл әрекетке бара қоймайды", - деп санайды Ресейдің халықаралық істер жөніндегі кеңесінің таяушығыстық жобалар менеджері Руслан Мамедов.

Таяу Шығыс жөніндегі маман Алексей Хлебников соңғы он жылда аймақта бірнеше жаңалық болғанын еске салды.

"Тунис пен Египеттегі көтеріліс, Мысырда төңкеріс болды және соның салдарынан америкалықтардың Каирге әскери көмегі тоқтатылды. Иранмен келісім тағы бар. Осының барлығы корольдіктерді, соның ішінде Сауд Арабиясын, дипломатиялық байланысты әртараптандыруға және Ресей мен Қытай сияқты басқа да ірі державалармен қарым-қатынасты нығайтуға итермеледі", - дейді саясаттанушы.

Мәскеу де Эр-Риядқа қару-жарақ сатады. Алғашқы партияларды жеткізу 2019 жылы басталды. Содан кейін корольдік Ресеймен ауыр отшашар жүйелері, танкке қарсы кешендер, гранатометтер мен автоматтар сатып алу туралы меморандумға қол қойды. 2021 жылдың басында саудтықтар орыстың С-400 зениттік-зымыран кешендері мен Су-35 жойғыштарын сатып алуы ықтимал екені хабарланды.

"Мәскеу мен Эр-Рияд қарым-қатынасында ОПЕК+ мәмілелерінің де маңызы зор. Бұл екі тараптың да табыс көзін арттыруына септігіни тигізді", - дейді Руслан Мамедов.

Оның айтуынша, Эр-Риядтың Вашингтоннан теріс айналып, оған көптеген проблема туындату мүмкіндігі бар. Бірақ бұл екі мемлекеттің бір-бірі үшін маңызы жоғары.

"Сауд Арабиясы АҚШ-пен қарым-қатынас Ақ үйде қай президент отырғанына байланысты өзгермейді. Себебі екі елдің байланысы бірнеше онжылдық бұрын қалыптасқан. Оны онша-мұнша дүрбелеңдер бұза алмайды", - деп санайды сарапшы.

Онжылдықтарға созылған серіктестік көп салада нәтиже берді. Мысалы, Сауд Арабиясы элитасының басым бөлігі АҚШ-та білім алған, саудтық риал долларға жіпсіз байланып тұр, ал қару-жарақ пен әскери дайындық негізінен америкалықтар тарапынан орындалып жатыр. Мұны өзгерту үшін көп жыл қажет. Сондықтан сыртқы саяси байланыстарды әртараптандыру көпполярлы жаңа әлемнің талаптарына жауап беретін тактикалық қадам.

0