Шарап

Алматыда карантин талаптарын жиі бұзатын мейрамханалар белгілі болды

92
Үйлену той, банкет өткізетін мейрамханалар мен түнгі клубтар карантин талаптарын жиі бұзатыны анықталды

АЛМАТЫ, 7 сәуір – Sputnik. Алматы қаласының санитарлық-эпидемиологиялық бақылау департаменті басшысының орынбасары Сәдуақас Байғабылов 2021 жыл басталғалы карантин талаптарын жиі бұзған дәмхана мен мейрамханаларды атады, деп хабарлайды Sputnik Қазақстан тілшісі. 

Байғабыловтың айтуынша, үйлену той, банкет өткізетін мейрамханалар мен көпшілікке арналған шаралар ұйымдастыратын түнгі клубтар карантин шараларын жиі бұзады.

2021 жылдың 1 қаңтар-6 сәуірі аралығында мониторинг топтар бірқатар нысандардың карантиндік шектеу шараларын сақтамағанын анықтады. Олардың арасында:

  • Алатау ауданында –   "Жақсылық",  "Центр шашлыка" дәмханалары, "Шамо" ЖШС бильярд клубы, "Эгоист" компьютерлік клубы, "Алатау" сауда ойын-сауық орталығы, "Alimus" бильярд клубы, "Алем" караоке клубы, "Лейла" дәмханасы.
  • Алмалы ауданында – Finik мейрамханасы, Fizika түнгі клубы,  Boohouse дәмханасы, "Пират" дәмханасы,  Endorphin дәмханасы,  "Где то" дәмханасы, Loto Club.         
  • Әуезов ауданында – "Рыба моей мечты" караоке-бары, "Ejelgi Arman" ЖШС лото клубы,  "Лабиринт" дәмханасы.
  • Бостандық ауданында – Sunset мейрамханасы , "Шмель" тавернасы,  Queer түнгі клубы, Alfa International Construction and Trade Company ЖШС жалға беруші, Queer түнгі клубы, Kango ЖШС спорттық батут паркі, Nino мейрамханасы, "Мята" лаундж бары, "Министры" караоке-клубы, Salam Bro дәмханасы, "Ориент" караоке клубы, "Стронг" компьютерлік клубы.
  • Жетісу ауданында – жеке тұлға Ниязова Ж.А. компьютерлік клубы, Gameclub ойын клубы, жеке тұлға Қуандыкова Ж.С. ойын алаңы, "Ломатик" ойын залы, SKY SPORT компьютерлік клубы, "ГринККМ" ЖШС лото клубы.
  • Медеу ауданында – Виктория бинго клубы, Ordagamecenter ЖШС компьютерлік клубы, "Манана" мейрамханасы,  "Пугасов" мейрамханасы, "Бармаглот" бары, Hookan Dreems кафебары,  "Айлина" мейрамханасы,  "Небо" бары, Rush7gill pub бильярд клубы, "Loto" клубы, "AVANGARD" ойын клубы,  "Лауреат" мейрамханасы, "Мята" бары, Avangard ойын клубы, Bacha бары. 
  • Наурызбай ауданында – "Премьера" дәмханасы, "Таужолы" дәмханасы, Baqsarai мейрамханасы (банкет залы), "Байтерек" мейрамханасы.
  • Түрксіб ауданында – "БекАр" ойын клубы қоғамдық ұйымы, Erbil мейрамхана-қонақ үй кешені, ВAZA ойын клубы, Talavi мейрамханасы,  "Нинигри" дәмханасы.

Байғабыловтың айтуынша, мониторингтік топтардың құрамына әкімдіктердің, "Атамекен" кәсіпкерлер палатасының өкілдері мен полицейлер кіреді.

Тәртіп бұзушылықтар анықталған кезде мобильді топ өкілдері өтіп жатқан шараны фото және бейне таспаға түсіріп алады. Одан кейін хаттама толтырып, әкімшілік іс қозғау үшін санитарлық-эпидемиологиялық қызметке жібереді.

Алматыда жыл басынан бері карантин шараларын бұзған 3 мыңнан астам адамға 200 миллион теңгеден астам айыппұл салынды.

Жыл басынан бері 13 500-ден жоғары нысан тексерілді, 1 573 ереже бұзушылық анықталды. Карантинді бұзғандарға қатысты 3018 хаттама толтырылды, айыппұлдың жалпы сомасы 202 миллион теңгеден асты.

92
Кілт сөздер:
шектеу, карантин, Алматы
Тақырып бойынша
Қайрат Нұртастың басы тағы да дауға қалды
Нұр-Сұлтандағы "ZOLOTO" мейрамханасы бір айға жабылды
Нұр-Сұлтанда карантин күшейтілді – жаңа қаулыда не айтылған
Коронавирус өршісе, қалалар карантинге жабыла ма – министрлік жауабы
Полиция түнгі клубта түсірілген видеоны жариялады
Алматы облысы Іле ауданы Ақши ауылының жанындағы шаруа қожалығы

"Мұқтаж адам көп": Алматыдан 140 шақырым жердегі қожалықта шұбат қалай өндіріледі

90
Алматы облысы Іле ауданы Ақши ауылының жанында шаруа қожалығында Сүлеймановтар отбасы түйе сүті мен шұбат кәсібін жүргізіп отыр. Ешқандай заманауи техниканың көмегінсіз жүргізілетін кәсіптің қыр-сырын Sputnik Қазақстан тілшісі біліп қайтты

АЛМАТЫ, 24 маусым – Sputnik. Осыдан 18 жыл бұрын екі түйемен басталған кәсіп бүгінде жүйеге түсіп, Қазақстан мен алыс-жақын шетелге түйе сүтінің өнімін ұсынып отыр. Алматы облысының тұрғыны Абай Сүлеймановтың отбасы алдымен ішкі сұранысты қанағаттандырып, содан кейін отандық өнімді экспорттауға ден қоймақ.

Sputnik Қазақстан тілшісі Алматыдан 120 шақырым жердегі Ақши ауылына барып, әрі қарай ауылдың сыртындағы шаруа қожалығының жұмысымен, шұбаттың жасалу жолымен танысты.

Негізгі өнім – түйенің сүті мен шұбат

Түйе малының пірі "Ойсылқара" атымен аталатын мал шаруашылығы 2003-2004 жылдар аралығында Ақши ауылы ішінде дамыды. Мал басы көбейген соң ауылдан жиырма шықырым жерге көшірілген. Иен далаға ел қондырып, қора соққан. Шаруашылықтың жұмысымен бізді Абай Сүлеймановтың ұлы Ердәуіт таныстарды.

Алматы облысы Іле ауданы Ақши ауылының жанындағы шаруа қожалығы
© Sputnik / Тимур Батыршин
"Ойсылқара" мал шаруашылығы

"Әкем малды жақсы көреді, ішінде түйе шаруашылығына жақын болды. Достары да осы кәсіппен айналысатын. Содан кейін өзі екі түйе алып, жұмыс істеді. Ол кезде біз бала едік. Көзімізді ашқалы түйе көрдік, бала күнімізден түйемен ойнадық. Ол кезде Ақшиде түйе аз болатын. Әкемді осы ауылға алғашқылардың бірі болып түйені алып келген деп айтуға болады. Ал қазір ауылда түйе кәсібімен айналысатын үлкен-үлкен шаруашылықтар бар", - дейді Ердәуіт.

Қазір отбасының 70 түйесі бар, оның ішінде 16 түйені күнделікті екі мезгіл сауады. Қожалық иесінің сөзінше, әр түйе сауған сайын 3-6 литр шамасында сүт береді. Ал жаңадан боталаған түйелер күніне үш рет сауылады. Осылайша күн сайын 52-53 лирт сүт айналымға түседі.

"Негізгі өнім –түйенің сүті мен шұбат. Одан бөлек түйенің жүні өтеді. Бізге Қазақстанда ғана емес, шетелден де түйенің жүнін сұрайды. Жүнінен киім тігетіндер, дамыған шаруашылықтар хабарласады. Ғаламторға өзіміз жайлы ақпарат енгізіп қойғанбыз, сол арқылы табады", - дейді ол.

Қыста түйенің жүні түлейді. Сол кезде оны жұлып, қапқа салып, орайды. Салмағы көрсетіліп, тұрақты тапсырыс берушілерге жолданады. Алайда бұл қосымша табыс. Ал шығынды түйенің сүті мен шұбат өтеп отыр.

Алматы облысы Іле ауданы Ақши ауылының жанындағы шаруа қожалығы
© Sputnik / Тимур Батыршин
Ердәуіт Айтбай "Ойсылқара" мал шаруашылығы жұмысымен таныстырды

"Қазір түйенің зәріне де сұраныс бар. Науқастығы бар кісілер түйенің зәрін сүтімен араластырып ішеді. Қант диабеті, асқазан аурулары бар адамдар, гепатит секілді аурулары бар кісілер жиі хабарласады. Кейбірі осында келіп, түйенің сүтін сауған күйде ішкісі келеді. Алайда оған дәл қазір мүмкіндік жоқ. Арасында қалада өсіп, малдың қандай болатынын көрмеген балаларын алып келетіндер бар. Оларға да ауыл тіршілігін, мал шаруашылығының бір күнін көрсетеміз, кішігірім туризм деп айтуға келетін шығар", - дейді Ердәуіт.

Шаруашылыққа берілетін несиенің шикілігі

Кәсіп иелері шаруашылықтың көлемін арттыруға ниетті. Алайда мемлекет тарапынан қолдау көрмей отырғандарын, ауыл шаруашылығына берілетін несиенің жарнамасына сай келмейтінін айтты. Бірнеше рет несие алу үшін банктің есігін қаққанымен, талаптары тиімсіз шыққан.

"Бізге хабарласып, түйе ұстап отырған жердің басына барып сүт ішсек дейді. Қызығып, көргісі келеді. Осы маңға демалыс орнын салу жоспарымызда бар. Емделуге, демалуға келушілердің барлық жағдайын жасап қойғымыз келеді. Ал оны іске асыруға уақыт пен қаражат қажет. Әрине, қажырлы еңбекті талап етеді. Мемлекеттен гранттар, тиімді талап пен төмен пайызбен несие берілсе, бұл ойымыз да жүзеге асып қалар", - дейді Ердәуіт Айтбай.

Алматы облысы Іле ауданы Ақши ауылының жанындағы шаруа қожалығы
© Sputnik / Тимур Батыршин
Шаруа қожалығында қазір 70 түйе бар, оның ішінде 16 түйені күніне екі мезгіл сауады

Оның пікірінше, бұл бағыттағы жұмыстар ел ішінде дамыса, әрі қарай шет елден де қызығушылық болады. Алайда кәсіпкерлер ең алдымен жергілікті тапсырыс берушілердің сұранысына өнімнің көлемі жағынан жауап беруді ойлап отыр. Қазір бұл жерде күнінен 53 литр сүт алынса, келер жылы бұл көрсеткішті екі есе арттыру жоспарланған.

"Сүтке деген сұраныс жақсы. Күнделікті сауылатын 50-53 литр жетпей жатыр. Дайын болған соң бірден сатылып кетеді. Кей тұтынушы үлгере алмай, ренжиді. Бергің-ақ келеді, себебі көп адам мұқтаж. Біреу қонаққа алып барады. Бұл жерде қазақы дәстүр де бар, қазір той-томалаққа шұбат қояды. Істі адал атқарған соң қайта іздеп келетіндер көп", - дейді ол.

Алматы облысы Іле ауданы Ақши ауылының жанындағы шаруа қожалығы
© Sputnik / Тимур Батыршин
Мұнда күнделікті сауылатын 50-53 литр жетпейді. Себебі түйе сүті мен шұбатқа деген сұраныс жоғары

Ал сатып алушылар шаруашылық туралы Instagram желісінен біледі. Ол жақта күнделікті фотолар жарияланып, жарнамасы да жолға қойылған. Одан бөлек жарнама сайттарынан ақпарат алып, хабарласуға болады.

"Тапсырыстың 70-80%-і Алматы қаласынан түседі. Қалаға жақын болғандықтан 5 литрден көп тапсырыс берсе, өзіміз жеткізіп береміз. Қазақстанның барлық қаласынан сұрайды. Ақтауда түйе бар, басқа өңірдің бәрінен хабарласады. Тіпті Дағыстаннан, Татарстаннан хабарласады, Мәскеуге де жібереміз", - дейді ол.

Экспорттан ішкі нарық маңызды

Түйеге де арнайы бап керек. "Ойсылқара" мал шаруашылығында түйелерге қыста жем-шөбін беру, жазда жайылымға жіберумен, ауырса, дәрісін егумен түйеші Қуантай айналысады. Жары Қамажай екеуі екі жақтап түйе сауады. Он жылдан бері түйе бағумен айналысатын бес баланың ата-анасы бұл жерде бір жылға жуық уақыттан бері жұмыс істейді.

Алматы облысы Іле ауданы Ақши ауылының жанындағы шаруа қожалығы
© Sputnik / Тимур Батыршин
Қамажай түйе саууға кірісіп жатыр

Айтуынша, бұл шаруаның өз қиындығы бар. Мысалы жан-жағында көрші-қолаң болмаған соң азынап жел соғады, жазы ыстық, қыс – аяз. Алайда олар табиғаттың мұндай құбылысына үйренген. Бәрі өткінші екенін түсініп, оған мән бермейді.

Қуантай мен Қамажай түйені сауып, сүтін арнайы ыдысқа құйып қояды. Кәсіп иесі белгіленген уақытта келіп, алып кетеді. Шұбатты әзірлеумен отбасы мүшелері өздері айналысады. Сүтке ашытқы салып, тапсырыс берушінің талғамына сай әзірлейді. Шұбаттың толық дайын болуына 1-2 күн кетеді.

"Жұмыс көп болғандықтан малдың басында өзіміз отыра алмаймыз. Сол себепті отбасы аламыз. Мал шаруашылығымен он шақты жыл жүріп, тәжірибе жинаған кісілерді алдық. Ал жалпы түйе шаруашылығында ең көп шығын қыстыгүні жем-шөптен келеді. Бұл тек түйеде ғана емес, барлық шаруашылықта сондай шығар. Қысқа алдын ала дайындаламыз", - дейді Ердәуіт Айтбай.

Шаруашылықтағы қиындықтарға қарамастан ел ішінде отырған отбасы шұбат бағасын негізсіз көтермейді. Тіпті тұрақты бағасын сақтап тұрады.

"Түйе сүтінің, шұбаттың бағасы ауыса бермейді, тұрақтылығын сақтайды. Жеке кәсіп болғандықтан жан-жағымызға қараймыз. Жем қымбаттайды, шөп қымбаттайды. Соның бәрі ескеріледі. Бірақ халыққа да қараймыз, елдің де қалтасына салмақ түсірмейтін, бізге де тиімді етіп белгілейміз", - дейді ол.

Алматы облысы Іле ауданы Ақши ауылының жанындағы шаруа қожалығы
© Sputnik / Тимур Батыршин
Шаруа қожалығындағы түйеші отбасы тұратын үй

"Қазақстанда түйе көп, соны дамыту керек. Экспортпен айналыспай тұрып, өзіміздің елде жұмысты тиянақты істеп, жолға қойып алуымыз керек. Одан кейін экспортқа сұраныс өзі болады деп ойлаймын", - деді Ердәуіт.

Алматы облысы Іле ауданы Ақши ауылының жанындағы шаруа қожалығы
© Sputnik / Тимур Батыршин
Алматы облысы Іле ауданы Ақши ауылының жанындағы шаруа қожалығында

Оның сөзінше, түйе шаруашылығына қызығушылар кейінгі жылдары көбейген. Себебі осы саланы бастауға кеңес сұрайтындар мен түйе сатып алу кезінде көмек сұрайтындар бар. Шаруашылығын бастап жатқандар бар, әлі де болады деп сенемін, деп түйіндеді сөзін кәсіп иесі.

Оқи отырыңыз: Қазақстандықтарға ауыл шаруашылығы жерлерін жалға алуға рұқсат етіледі

Шұбат кәсібі – кезеңдік емес, қысы-жазы жүргізілетін кәсіп. Тек шыдам мен өз ісін адал атқаруды талап етеді. Әрине, сенімді адамның шаруа қожалығына жауап беруі үлкен рөл атқарады. Мұнда қазақы болмыс, ескі мен жаңаның үндесуі байқалады. Көпшілік қалаға барып кәсіп ашуға ұмтылса, бұл қожалық иелері бір де бір заманауи техниканың көмегінсіз шалғайда кәсібін жүргізіп отыр. Мұндайда "мал өсірсең, түйе өсір, пайдасы оның көл-көсір" деген халық даналығы еріксіз ойға оралады.

90
Кілт сөздер:
Алматы облысы, Алматы, шұбат, ауыл шаруашылығы, шаруа қожалығы, мал шаруашылығы
Архивтегі сурет

Қазақстанның бірнеше облысында дабылды ескерту жарияланды

255
Кей өңірлерде ертең ауа температурасы 38-42 градусқа дейін көтеріледі деп болжанып отыр

НҰР-СҰЛТАН, 24 маусым – Sputnik. Қазақстанның басым аумағында аптап ыстық, бұршақ және қатты желге байланысты дабылды ескерту жарияланды, деп хабарлайды Sputnik Қазақстан.

Күндіз Атырау облысында кей жерлерде 42 градусқа дейін ыстық болады. Жоғары өрт қаупі күтілуде. Атырау қаласында да ауа температурасы күндіз 42 градусқа дейін көтеріледі.

Ақтөбе облысында сынап бағанасы 38 градусты көрсетеді, жоғары өрт қаупі сақталады.

Қостанай облысының кей жерлерінде найзағай жарқырап, бұршақ түседі, желдің жылдамдығы 15-20 м/с дейін барады деп болжанып отыр. Жоғары өрт қаупі сақталады. Қостанай қаласында таңертең және күндіз найзағай ойнайды.

Қызылорда облысында желдің күші кей жерлерде 15-20 м/с дейін барады. Күндіз өте жоғары өрт қаупі сақталады.

Шығыс Қазақстан облысының кей жерлерінде – найзағай, бұршақ, нөсер жауын. Батыстан, солтүстік-батыстан 15-20 м/с жылдамдықпен жел соғады.

Ақмола облысының кей жерлерінде найзағай, 15-20 м/с жел күтілуде.

Тағы оқыңыз: Қатты құрғақшылық болады – Қазгидрометтің маусым айына болжамы

Алматы облысында кей жерлерде найзағай жарқырап, бұршақ түседі. Желдің екпіні 23-28 м/с дейін күшейеді. Кей жерлерде төтенше өрт қаупі сақталады, түнде және таңертең нөсер жаңбыр жауады. Талдықорғанда түнде және таңертең найзағай ойнайды, желдің екпіні – 15 м/с.

Қарағанды облысының кей жерлерінде найзағай, бұршақ болжануда. Кей жерлерде 15-20 м/с жылдамдықпен жел соғады, өте жоғары өрт қаупі сақталады.

Батыс Қазақстан облысында 34-39 градус аптап ыстық болады, төтенше өрт қаупі бар.

Солтүстік Қазақстан облысының кей жерлерінде күндіз найзағай жарқырайды, тұман түседі, желдің күші 15-20 м/с дейін жетеді.

Түркістан облысының кей жерлерінде шаңды дауыл болжануда. Күндіз кей жерлерде желдің жылдамдығы 15-20 м/с-ті құрайды. Кей жерлерде төтенше өрт қаупі сақталады.

255
Кілт сөздер:
дабылды ескерту, ауа райы болжамы
Полицейлер киетін кроссовка

"Полицейлер кроссовка киеді": министрлік жаңа форманы көрсетті фото

6
Жаңа үлгідегі форма патрульдік полицейлерге, сыртқы қызмет қызметкерлеріне және ішкі істер органдарының басқару аппараттарына арналып тігілді

НҰР-СҰЛТАН, 24 маусым – Sputnik. Ішкі істер министрлігі полицейлер киетін жаңа  форманы көрсетті, деп хабарлады Polisia.kz.

Ресми мәліметке сәйкес, форманы дайындау кезінде полиция қызметкерлері үшін барынша ыңғайлы киім жасауға баса назар аударылды, əр түрлі климаттық жағдайлар ескерілді. Әлемдік тәжірибе де зерделенді.

Жаңа үлгідегі форма дизайны мен құрылымына қарай патрульдік полиция қызметкерлеріне, сыртқы қызмет қызметкерлеріне және ішкі істер органдарының басқару аппараттарына арналып тігілген.

Новая форма полицейских
© Photo : polisia.kz
Полицейлердің жаңа формасы

Мемлекет басшысының тапсырмасы аясында учаскелік полиция инспекторлары үшін жаңа киімнің жеке желісі әзірленді. Осының арқасында халық оларды бірден тани алады.

Надпись Polisia
© Photo : polisia.kz
Формадағы Polisia жазуы

Ал полиция басқармалары аппараттарында жұмыс істейтін әйелдерге  жазда киетін қосымша көйлек те беріледі.

Жазғы, маусымдық және қысқы киім үлгілерінің бәрінде "POLISIA" жарық шағылыстырғыш жазуы бар.

Полицейская форма
© Photo : polisia.kz
Полицей формасы

Қызметкерлердің аяқ киімі алғаш рет өзгертілді. Кроссовкалар түрінде ұсынылған тактикалық аяқ киім ыңғайлы, аяқты жарақаттанудан, сырғанаудан қорғайды.

Кроссовки, обувь полицейских
© Photo : polisia.kz
Полицейлер киетін кроссовка

Қалалар мен облыстардың эмблемаларының негізінде киімнің оң жеңіне өңірлік жапсырмалар әзірленді. Бұйымдардағы жиектің түсі қызылдан көкшіл түске ауыстырылды.

Нашивка, форма патрульного полицейского
© Photo : polisia.kz
Патрульдік полицей формасы

Ал металл бұйымдар – жетондар, эмблемалар, жұлдыздар тоқыма бұйымдарына ауыстырылып отыр.

Жарық шағылыстырғыш элементтерге ерекше назар аударылды.

Жетоны, эмблемы, звезды и кокарды теперь текстильные
© Photo : polisia.kz/
Металл бұйымдар – жетондар, эмблемалар, жұлдыздар тоқыма бұйымдарына ауыстырылды

"Жаңа форманы енгізу қосымша қаржыландыруды қажет етпейді. Оған ауысу ағымдағы бюджеттік бағдарламалар шеңберінде және ескі форманың тозуына қарай кезең-кезеңімен жүзеге асырылады",- дейді министрлік мамандары.

6