АСТАНА, 29 қар — Sputnik. Баланы ұрып-соғу сәті түсірілген аты шулы бейненің кейіпкері Нұргүл Докуова судьяның алдына тізерлеп тұрып, өзін кішкентай баларына қатысты ата-аналар құқығынан айырмауды өтінді, деп хабарлайды Sputnik Қазақстан тілшісі.
Павлодар облысының жасөспірімдер ісі бойынша мамандандырылған ауданаралық сотында 28 қарашада білім беру бөлімінің қала тұрғыны Нұргүл Докуованың қыздары үш жасар Айлин мен тоғыз жастағы Айғанымға қатысты ата-ана құқығынан айыру туралы талап-арызы бойынша іс жалғасты.
Жауап беруші, оның адвокаты Гүлмира Сұлтанбекова және сәби әкесінің өкілі Гүлбахыт Бижанова ата-аналық құқықтан айыру туралы сот отырысының жабық өтуін сұрауына қарамастан, процесс ашық тәртіпте өтіп жатыр.
Жауап беруші Нұргүл Докуова өткен отырыстарда секілді өзін өте эмоциялы ұстады. Үнемі жылап отырды. Судья бірнеше рет одан тынышталуын сұрады. Кейіннен әйелдің есірігі ұстап, тізерлеп отырып алып, өзін балаларынан айырмауды сұрады.
"Мен өмір сүргім келмейді! Мені кешіріңіздер, Құдай үшін! Өтінемін сіздерден!" – деп жылады әйел. Жауап беруші өзіне келіп, тынышталғанша сот отырысын тоқтауға тура келді.
