АСТАНА, 4 ақпан — Sputnik. Қазақстан президенті әкімшілігінің бұрынғы басшысы Аслан Мусин қаза болған ұлы Асылбектің қырқы өткеннен кейін мәлімдеме жасады.
Мусин үлкен ұлының ғылыми мұрасын мақтан тұтатынын мәлімдеді.
"Асылбектің жетекшілігімен Голландияда адам қызметінің барлық философиялық, гуманитарлық саласын жүйелендірумен, зерттеумен айналысатын монотеизм институты құрылып, жұмыс істеп жатыр. Ол Израиль, Ресей, Қытай, Жапония, Еуроодақ елдеріндегі ниеттестерімен бірге адамның бүгінгі күнге дейінгі барлық ой-пікірін жинақтайтын 114 том шығарды", — деді Мусин өз үндеуінде.
Аслан Мусин қазір Құран, Тора, Библия және өзге де қасиетті кітаптарды зерттеу бойынша әмбебап сөздік жасау жұмысы басталғанын, сондай-ақ әлемдегі қасиетті жерлерді аралауға қатысты жүздеген сағат аудио-, видеоматериал түсірілгенін атап өтті.
Қазақстан президенті әкімшілігінің бұрынғы басшысы Аслан Мусиннің ұлы өткен жылдың желтоқсанында Ригада 15-қабаттан құлап, қаза болған еді. Полицияның мәліметінше, Асылбек Мусин суицид жасаған болуы мүмкін.
