Профессор Шерубай Құрманбайұлы

Белгілі ғалым Қоянбаев пен Қабатовтың сөйлеу мәнерін сынға алды  

9249
(Жаңартылды 08:20 29.01.2020)
Ғалым Шерубай Құрманбайұлы рейтинг қуған бағдарламалар көрермен талғамын төмендетіп жатқанын мәлімдеді

НҰР-СҰЛТАН, 20 мамыр – Sputnik, Дәурен Ерболат. Профессор Шерубай Құрманбайұлы Sputnik Қазақстан тілшісіне берген сұхбатында   терминдерді қазақ тіліне сапалы аудару мәселесін қозғай отырып, рейтинг қуған бағдарламалардың қоғамға қауіпті екенін айтты. Ғалым сондай-ақ кейбір тележурналистер мен танымал әзілкештердің сөйлеу мәнерін сынға алды.

Термин жасау шығармашылықты талап етеді

Профессордың айтуынша, ғалымдар термин жасау үшін көп ізденіп, оны өзара талқыға салады.

"Бұл мәселеге біржақты қарауға болмайды. Термин-эпонимдерді, таңба терминдер мен цифрмен жазылған, кейбір қысқартылған терминдерді аударуға болмайды. Жалпы термин жасау – шығармашылық процесс. Оны мамандар сараптамадан өткізеді, асылын жасығынан ажыратады. Аударылған терминдердің бірін жұртшылық қабылдап, екіншісін қабылдамауы мүмкін. Бұл – табиғи құбылыс", – дейді маман.

Сонымен қатар Шерубай Құрманбайұлы тәуелсіздік жылдары заңгер (юрист), қаржыгер( финансист), демеуші (спонсор), отбасы (семья), жекешелендіру (приватизация), құзыреттілік (компетенция), құжат (документ), келісімшарт (контракт), мәтін (текст), ғарышкер (космонавт), жеделхат (телеграмма), зейнетақы (пенсия), салым (вклад), салымшы (вкладчик), әнұран (гимн), елтаңба (герб), хаттама (протокол), әуежай (аэропорт), ұшақ (самолет) сияқты сәтті аударылған, жаңадан туындаған сөздерді жасаудан және тағы басқа көптеген жаңа сөздерді қолданысқа енгізуден ұлт тілі ұтпаса, ұтылмағанын жеткізді.  

Мамандар күш біріктіре алмай отыр

Профессор бүкіл салалық терминдерді аудару, іріктеу, өзге тілдерден ұлт тіліне икемдеп қабылдау өте ауқымды жұмыс екенін, асығыстықты, атүсті қарауды көтермейтінін атап өтті. Оның пікірінше, жұмысты сапалы әрі жүйелі жүргізу үшін түрлі сала мамандары шоғырланған арнайы орталық құру керек.

"Терминологиялық жұмыстардың сапалы, жүйелі, үйлесімді жүргізілмеуінің себебі – олардың жұмысын қамтамасыз ететін білікті мамандардың басы бір орталыққа шоғырланбай отыр. Соның салдарынан кемшіліктерге жол берілуде. Мысалы, аударылған терминдер қайта-қайта бекітіледі. Салдарынан адамдар шатасады. Терминді аудару уақыт пен тәжірибені талап етеді. Оған білікті мамандар қажет. Бүгінде бір маман жоғары оқу орнында сабақ берсе, енді  біреуі ғылыми зерттеу институтында жұмыс істейді. Ал үшіншісі мемлекеттік қызметте, енді бірі мүлдем басқа салада жүр. Бар мамандар шашырап, күштерін біріктіріп, ортақ іске жұмыла алмай келеді. Мұндай ауқымды жұмысты жүргізу үшін олар үнемі өзара байланыста болып, шаруаны бірлесіп атқаруы тиіс. Сондықтан арнайы орталық құру керек", – дейді Шерубай Құрманбайұлы.

Терминкомның құзыретін неге күшейту қажет?

Сондай-ақ ғалым бұл саладағы мәселені шешу үшін терминологиялық комиссияның құзыреті мен мәртебесін көтеру керек деген пікірде.

"Үкімет жанында терминологиялық комиссия бар. Ол тоқсанына бір рет жиналып, әртүрлі саладан ұсынылған терминдерді қарайды. Бүгінгі таңда бекітілген терминдердің барлығы осы терминологиялық комиссиядан өтеді. Бұл комиссия – кеңесші орган. Тек кеңес берумен, ұсынумен шектеледі. Оның өзі бекіткен терминдерді міндеттеуге, бірізді қолданылуын талап етуге құқығы жоқ. Сол себепті бекітілген терминдердің басым бөлігі қолданысқа енбей қалады. Жұрт бекітілген терминдерді әркелкі қолдана береді. Бірі – мұражай, екіншісі –музей, үшіншісі – сынып, төртіншісі – класс дейді. Мұндай ретсіздікке жол бермес үшін терминкомның шешімі орындалатын, онымен жұрт санасатын, шешімдері орындалатын болуы керек. Сондықтан терминологиялық комиссия мәртебесін күшейтіп, оның қарауына ұсынылатын терминдерді мұқият сүзгіден өткізе алатын кәсіби мамандар тобы қажет", – дейді профессор.

Латын әліпбиін жетілдіру керек

Шерубай Құрманбайұлы латын графикасына негізделген қазақ әліпбиінің соңғы нұсқасымен әлі де жұмыс жүргізіп, жетілдіре түсу қажет деп санайды. Латын әліпбиінің соңғы нұсқасында Ь, Ъ, Э, Ю, Я, Щ, Ё, Ц әріптері мүлдем жоқ. Тіл мамандары "бұл қазақ тілінің төл дыбыстық жүйесін сақтап, иммунитетін қалыптастырады" дейді. Бұл пікірге ғалым толығымен қосылады.

"Қазақ тілінің өзіне тән дыбыстық жүйесі мен төл әріптері бар. Кеңес одағының құрамында болдық, кеңестік тіл саясатына бағындық. Сондықтан тілімізге орыс тілінен енген таңбалар мен сөздер дәл орыс тіліндегідей өзгеріссіз қабылданды. Тіл маманы ретінде мен де қазақ тілінің заңдылығын бұза отырып алынған дыбыстардың әліпбиімізден алынып тасталуын қолдаймын. Сондықтан жоғарыда айтылған әріптестеріміздің пікірі дұрыс деп ойлаймын. Ал латын әліпбиінің де емле ережесін жетілдіретін тұстары бар. Оны біз айтып жүрміз. Мысалы, "і" мен "и" бас әріптерінің ноқатсыз  бірдей берілуі, "Һ", "х" дыбыстарының бір ғана "H" таңбасымен берілуі, диграфтардың қалдырылуы қиындық тузығады. Мұны реттеу керек", – дейді ғалым.

Тележурналистер қазақ тілінің заңдылығын бұзып сөйлейді

Әңгіме барысында профессор телеарналарда жұмыс істейтін кейбір журналистердің қазақ тілінің заңдылығын бұзып сөйлейтінін атап өтті. Ғалым  бұл мәселе жайлы республикалық басылымдарда бірнеше көлемді мақала жазған. Журналистерге арнап шеберлік сыныптарын, семинарлар да өткізген. Оның пікірінше, аталған мәселе осы күнге дейін өзекті.

"Көптеген тележурналист қазақ тіліндегі сөйлемді орыс тілінің құрылысы бойынша айтады. Етістікті сөйлемнің басына шығарып жібереді. "Мен ойлаймын" деп сөйлейді. "Мен бұл жөнінде бұлай ойлаймын" демейді. Қазақ тілінің сөйлеу заңдылықтары мен сөйлем құрылымын сақтамайды. Фразеологизмдерді дұрыс қолданбайды. Сөйлеу барысында ілгерінді, кейінді ықпалды дұрыс айтпайды. Кейбір дикторлар "сонымен қатар" деген тіркестегі "қ"-ны анық айтқысы келеді. "Сонымең ғатар" деп айтылуы бойынша жатық сөйлейтіндер көп емес. Мұны журналистер қаперіне алып жатса, жақсы болар еді", – дейді Шерубай Құрманбайұлы.

Нұрлан Қоянбаев пен Тұрсынбек Қабатов жайлы

Ғалым мақалаларының бірінде еліміздің танымал әзілкештері Тұрсынбек Қабатов пен Нұрлан Қоянбаевтың да сөйлеу мәнерін сынға алған еді. Осы мәселеге қатысты пікір білдірді.

"Нұрлан Қоянбаев пен Тұрсынбек Қабатовты сырттай танығанмен, олармен бетпе-бет кездесіп, сөйлескен емеспін. Олармен алты аласы бес бересім жоқ. Тіл маманы ретінде мақаламда тек олардың сөйлеу мәнеріндегі кемшіліктерді айттым. Алайда бүгінгі "жұлдыздар" мамандар сөзіне аса құлақ аса бермейтін сияқты. Қазір Нұрлан Қоянбаев телеарнадан кетті-ау деймін. Ал Тұрсынбек Қабатов әлі де жұмыс істеп жүр. Қазір теледидарды өте сирек көремін. Оған уақыт жоқ. Қабатовтың хабарларын сүйсініп қарайтындардың қатарынан емеспін. Анда-санда бір көзің шалып қалғанда әзілкештің тілі жақсарып кеткенін байқамайсың. "Жатырған" сияқты жергілікті сөздерді немесе жаргондар мен орыс сөздерін араластырып сөйлеп жатады. Ол ғана емес, ел алдында шыққан соң,  кім де болса, әдеби тіл нормаларын сақтап, көпшілікті, сахнаны сыйлауы тиіс қой.  Телеарналар бұл істе жұртқа үлгі болуы керек еді, әзірге олай болмай тұр", – дейді Шерубай Құрманбайұлы.

Рейтинг қуған бағдарламалар жарға жығады

Әңгіме барысында ғалымнан бұрын ашық айтылмай келген төсек қатынасы, зорлау, қыздың пәктігін сату сияқты тақырыптардың қазақ тілді бағдарламаларда еркін талқылана бастауына көзқарасы қандай екенін сұрадық. Ол мұндай арзанқол, анайы дүниелердің ұрпақ тәрбиесі мен саламатты қоғам қалыптастыруға қызмет етпейтінін атап өтті.

"Атың шықпаса, жер өрте" деп кез келген жолмен жұртты қаратып, ашық-шашық киім үлгісі мен ардың-гүрдің сөйлеу үлгісін, беттен алып, төске шауып тұрған, "еркін өскендік", "өжеттік", "қайсарлық" деген ұғымдарды "көкбеттікпен", күлдіріп отырып жылататын, ойлы, салмақты әзілді бос сөз, дөрекі, арзан қалжыңмен  шатастырып жүргендерді ел алдында сайратып қойғаннан  ешкім ұтпайды", - дейді профессор.

Шерубай Құрманбайұлының айтуынша, рейтинг қуып, талғамы ортадан да төмен  көрермендерге бағытталған бағдарламаларды көбейту – болашақ ұрпақтың, жалпы жұртшылықтың, көрермендердің талғамын төмендетеді. 

"Керісінше, телеарана көрерменді тұщымды, мағыналы, мазмұнды да сапалы бағдарламалармен, сараптамалық хабарлармен,  білім, ғылым, әдебиет, тарих, өнер туындыларының озық өнімдері мен ұлт құндылықтарын дәріптейтін бағдарламалармен тартса ғой дейміз. Телеарналар көремен талғамын өсіретін, тағлымы мол, құнды ақпараттар беретін бағдарламаларды көбейтсе, олар халық талғамының өсуіне және өресі биік көрерменнің көбеюіне жол салар еді деген пікірдеміз", – деді ол.

Осы орайда ғалым бүгінгі телерналардағы кейбір бағдарламаларға көңілі толмайтынын ашық айтты.

"Теледидар көруге уақытым аз. Ал енді көп бағдарламаны қарасақ, құнды ақпарат алып, қуанып қалудан гөрі жүйкеміз тозатын, көңіліміз қалатын сәттер жиірек болады. Алайда бағдарламаның барлығы сапасыз деуден аулақпыз. Аз да болса, сапалы бағдарламалар бар екенін де айту керек. Сондықтан телеарнадағы осындай жағымсыз, ұрыс-керіс, атыс-шабыс, адам өлтіру, зорлық-зомбылық, қорлау сияқты жағымсыз дүниелерді көрсету қоғамға пайдасыз, құнарсыз, мерзімі өтіп кеткен, улы, зиянды тамақ бергенмен бірдей. Менің ойымша, сапасыз, арзан, рейтинг қуған бағдарламалар бізге қажет емес", – деп түйіндеді Шерубай Құрманбайұлы.

 

9249
Кілт сөздер:
латын әліпбиі, сахна, Нұрлан Қоянбаев, Тұрсынбек Қабатов
Тақырып бойынша
Кандидат Еспаева қазақ тілінен емтихан тапсырған соң көзіне жас алды
"Қайда қарап отыр?!" Асылы Осман қазақ тілінің дамымай жатқанына кім кінәлі екенін айтты
"Табиғи әрі дұрыс процесс" Ресей елшісі қазақ тілі туралы ойын айтты
"Шаханов намысыма тиді" Танымал адамдар кімге ренжіп жүргенін ашып айтты  
Астана көшелеріндегі күлкілі аудармалар - фото
Шерубай Құрманбайұлы терминдердің неге сауатсыз аударылатынын түсіндірді
Nur Otan партиясының төрағасы Нұрсұлтан Назарбаев

Nur Otan мәжіліс депутаттығына 78 кандидатты бекітті

60
Саяси кеңесте сондай-ақ ұйымдастыру мәселелері қарастырылып, кезектен тыс ХХ съездің күн тәртібі талқыланды және  партияның соңғы 5 жылдағы қызметінің қорытындысы шығарылды

НҰР-СҰЛТАН, 23 қараша – Sputnik. Nur Otan-ның орталық аппаратында партия саяси кеңесінің отырысы өтті.

Отырыстың қорытындысы бойынша үкіметтің сайлауалды бағдарламасын іске асыру жөніндегі есебі алдын ала мақұлданды, партияның жарғысы мен саяси доктринасына енгізілетін өзгерістер қаралды. Праймериздің 78 жеңімпазы енген мәжіліске арналған партиялық тізім, сондай-ақ жұмыс органдарының құрамы мен партияның кезектен тыс XX съезінің күн тәртібі бекітілді.

Сонымен қатар партияның соңғы 5 жылдағы қызметінің қорытындысы қаралды. Партия төрағасының бірінші орынбасары Бауыржан Байбек партияның 234 қоғамдық қабылдау бөлмесі сайлауалды бағдарламаны бақылау мен "кері байланыстың" пәрменді тетігі болғанын атап өтті. 

"5 жыл ішінде партияға шамамен 1,2 миллион адам жүгінді, оның 30%-і өтініштерін онлайн жолдады. Өтініштердің 92%-і бойынша оң шешім қабылданып, тегін кеңес беріліп, құқықтық көмек көрсетілді", - деді Байбек саяси кеңестің отырысында.

Оның айтуынша, партия депутаттары, орталық және жергілікті атқарушы органдардың басшылары 180 мыңға жуық қабылдау өткізіп, 340 мыңнан астам азаматты қабылдады. Өтініштердің 72%-і оң шешімін тапты, 28%-і бойынша түсіндірмелер мен қажетті кеңестер берілді. 

Оқи отырыңыз: "Ақ жол" партиясы мәжіліс депутаттығына кандидаттар тізімін жариялады 

Пандемияға қарамастан, қоғамдық қабылдаулардың жұмысы онлайн форматта жалғасып, электронды түрде 339 мың өтініш қабылданған.

"Соңғы 5 жыл ішінде партиялық басты органдар түрлі мемлекеттік және партиялық органдарға 800-ден астам ұсыным әзірледі. Мәселен, партиялық бақылау комитетінің араласуымен 9,3 мың медицина қызметкеріне өтемақы төленді", – деп атап өтті Бауыржан Байбек.

Жемқорлық жасағаны үшін 610 адам партиядан шығарылды

Сыбайлас жемқорлыққа қарсы іс-қимыл жөніндегі республикалық кеңес "Jas Otan" жастар қанатымен бірлесіп жоғары оқу орындары мен колледждерді тексерді. Нәтижесінде 10 мыңнан астам студенттің жатақханалардағы өмір сүру жағдайы жақсарды. 

"Жастар – Отанға!" бағдарламасы аясында соңғы 5 жылда 13 мыңнан астам жас буын жұмысқа тұрды. Жастар бастамаларының мемлекеттік әлеуметтік тапсырысын қаржыландыру 2,5 есе өсті.

"Партия қатарын тазарту" аясында жарғы мен этика кодексін сақтамай, партиямен байланысты жоғалтқаны үшін 240 мыңнан астам адам, сыбайлас жемқорлық құқық бұзушылығы үшін 610 адам партиядан шығарылды.

Nur Otan пандемияға қалай қарсы тұрды

Бауыржан Байбек "Nur Otan" партиясы қоғамдық-саяси ұйымдардың ішінен алғашқылардың бірі болып пандемияның әлеуметтік-экономикалық салдарына қарсы тұрғанын айтты.

Мысалы, "Birgemiz" қоғамдық қоры 2,2 милионнан астам адамға, Нұр-Сұлтан мен Алматы қаласындағы 2 мыңнан астам медицина қызметкеріне материалдық көмек көрсетті.

Сондай-ақ халықтың неғұрлым аз қорғалған топтарына жататын 100 мың отбасына 5 миллион медициналық маска тегін таратылды. 1 миллионнан астам адам 4,4 миллиард теңгеге бірінші кезекте қажетті тауарлармен қамтамасыз етілді. Мақтааралда су тасқынынан зардап шеккен азаматтарға арнап 32 үй салынып, 1 мың тоннадан астам гуманитарлық көмек жіберілді.

Партияның кезектен тыс ХХ съезі 2020 жылдың 25 қарашасында өтеді.

60
Кілт сөздер:
сайлау, Мәжіліс
Тақырып:
Мәжіліс сайлауы
Тақырып бойынша
Біз ұйықтап жатқан жоқпыз – "Ауыл" партиясы
"Қорықпау керек": мәжіліс сайлау туралы заңға өзгерістер енгізді
Перуашев зейнетақы мен жәрдемақыны басқаша есептеуді талап етті
Тоқаев қазақстандықтарға үндеу жолдады
Портфель

Экс-мәдениет министрі Ұлттық киноны қолдау орталығының басшысы болды

2234
(Жаңартылды 19:56 23.11.2020)
Ұлттық киноны қолдау мемлекеттік орталығын бұған дейін Гүлнәр Сәрсенова басқарған болатын. Ол мамыр айында аса ірі көлемде пара алды деген күдікке ілінді

НҰР-СҰЛТАН, 23 қараша – Sputnik. Есетжан Қосубаев Ұлттық киноны қолдау мемлекеттік орталығының басшысы болып тағайындалды, деп хабарлады ведомствоның сайты.

"Мәдениет және спорт министрінің бұйрығымен "Ұлттық киноны қолдау мемлекеттік орталығы" коммерциялық емес акционерлік қоғамының басқарма төрағасы болып Есетжан Қосубаев тағайындалды", - делінген хабарламада.

Бұған дейін бұл қызметті Гүлнәр Сәрсенова атқарды. Осы жылдың мамыр айында ол мемлекеттік бюджеттен қаржы бөлуге көмектесіп, орындалған жұмыстардың актілеріне қол қойғаны үшін аса ірі көлемде пара алды деген күдікке ілінді. Нұр-Сұлтан мен Алматыдағы кеңселерде тексеріс жүргізілді, нәтижесінде тергеу органдары жұмыс құжаттамасының бір бөлігін тәркілеп алды.

Оқи отырыңыз: Танымал тележүргізуші Назарбаевтың орынбасары болып тағайындалды

Есетжан Қосубаевтың өмірбаяны

1955 жылы Алматы қаласында дүниеге келген. 1980 жылы С. Киров атындағы Қазақ мемлекеттік университетінің тарих факультетін тәмамдаған.

Есетжан Мұратұлы Қосубаев мемлекеттік басқару органдарында қызмет еткен, Қазақстанның мәдениет, ақпарат және спорт министрлігін басқарған, медиакомпаниялар мен қоғамдық құрылымдарға басшылық етіп, мәдениет саласында түрлі жобаларды ұйымдастырған.

Әр жылдары "АРТ-Центр"продюсерлік орталығының бас директоры, "Алматы – моя первая любовь" ретро фестивалінің продюсері және жүргізушісі болған, "Азия дауысы" халықаралық музыкалық фестивалінің іргетасын қалағандардың бірі.

"Асыл мұра" қамқоршылық кеңесінің құрамында болған, соның арқасында көрнекті қазақ композиторларының шығармалары бар бір жарым мыңнан астам мұрағаттық жазбалар қалпына келтірілген.

Бірнеше жыл бойы мәдени-қоғамдық институттарды басқарған. Коммерциялық және қаржы құрылымдарын басқару тәжірибесі бар.

Қазақстанды мәдени, әлеуметтік және ғылыми-техникалық дамыту қорының бас директорының орынбасары,  "Бөбек" балалар қайырымдылық қорының вице-президенті,  "Kazenergy" қоғамдық қорының президенті лауазымдарында қызмет еткен.

"Алтын-Алма" АҚ басқарма төрағасы, "Атамекен" Одағы" Қазақстанның Ұлттық экономикалық палатасының басқарма мүшесі болған.

2002 жылы мемлекет басшысы әкімшілігінің баспасөз орталығының басшысы лауазымына тағайындалған.

2004 жылы — президент әкімшілігі ішкі саясат басқармасының БАҚ және қоғамдық байланыс бөлімінің жетекшісі. 

2004 жылдан 2006 жылға дейін – Қазақстан Республикасының мәдениет, ақпарат және спорт министрі.  

Есетжан Мұратұлы отандық медиақұрылымдардың, кино мен телевизияның аяққа тұруына және дамуына зор үлес қосқан. "Рауан Медиа Групп" компаниясының директорлар кеңесін басқарған.

1998 жылы Орталық Азиядағы ең ірі кинофорум – "Евразия" Бірінші халықаралық кинофестивалінің бас директоры болып тағайындалған. Еуразия телевизия академиясының мүшесі (Мәскеу қаласы).

2001 жылы Қазақстандағы алдыңғы қатарлы медиакорпорацияның – "Қазақстандық телевизия және радио" Республикалық корпорациясын»" ЖАҚ басқарма төрағасы болып тағайындалған.

Қосубаевтың шығармашылық өмірбаянында жеке актерлік тәжірибесі бар, соның ішінде атақты кеңес режиссері Юрий Чулюкиннің  "И в шутку, и всерьёз..." фильмінде (1963 ж.) басты рөлді сомдаған.  

"Құрмет" және 2 дәрежелі "Достық", Ресейдің Чернобыль ардагерлер комитетінің "Долг и честь" ордендерімен, сонымен қатар, түрлі төсбелгілермен және медальдармен марапатталған, оның ішінде БЛКЖО ОК "Еңбек ерлігі" белгісі, "ЧАЭС апаттың салдарын жоюдың қатысушысы" құрмет белгісі, "Шапағат" медалі, "Қазақстан Республикасының тәуелсіздігіне 10 жыл" медалі, "Қазақстан Республикасының Конституциясына 20 жыл" медалі және Қазақстан президенті атынан бірқатар алғыс хат берілген. 

2234
Тақырып бойынша
Сәдуақас Байғабылов жаңа қызметке тағайындалды
Қазақстанның мемлекеттік бас санитар дәрігері ауысты
Әділ Ахметов басшылық қызметке тағайындалды
Тоқаевтың бұрынғы кеңесшісі экономика министрлігіне жұмысқа орналасты
Алматы, архивтегі фото

Алматы полициясы күшейтілген жұмыс тәртібіне көшті

0
Тәртіп сақшылары мен әскери қызметкерлер көшелер мен аулаларда, саябақтарда, саяжайларда және өзге де қоғамдық орындарда рейд жүргізеді

НҰР-СҰЛТАН, 23 қараша – Sputnik. Алматы полициясы күшейтілген жұмыс тәртібіне көшірілді, деп хабарлады Polisia.kz.

Қазақстан аумағында осы жылдың 23 қарашасында басталған "Құқық тәртібі" жедел алдын алу іс-шарасы 30 қараша айына дейін жалғасады. Осыған байланысты Алматы полициясы күшейтілген жұмыс тәртібіне көшірілді. 

Қалалық полиция департаменті жергілікті полиция қызметінің бастығы Манап Саттаровтың айтуынша, аталған іс-шараға полиция қызметкерлерімен қоса Ұлттық ұлан сарбаздары да жұмылдырылады.

"Іс-шара барысында қоғамдық тәртіпті қадағалау үшін полицияның жеке құрамы күшейтілген жұмыс тәртібіне көшірілді. Қала бойынша полиция жасақтары көбейтіліп, "Құқық бұзушылыққа мүлдем төзбеушілік" қағидасы бойынша тәртіп сақшылары мен әскери қызметкерлер көшелер мен аулаларда, саябақтарда, саяжайларда және өзге де қоғамдық орындарда рейд жүргізеді", - дейді ол.

Сондай-ақ көші-қон заңдарын бұзатын келімсектерді анықтау үшін құрылыс алаңдары мен тамақтану орындары тексеріледі. Арнайы есепте тұратын адамдар мен азаматтық қару иелері де полицияның назарынан тыс қалмайды.

"Ал жедел басқарма қызметкерлері пәтер тонау, көлік ұрлығы сияқты қылмыстарды жасайтын қылмыстық топтар мен із-түзсіз жоғалған адамдарды және бұрын қылмыс жасап іздеу жарияланған адамдарды анықтауға бағытталған жұмыстарды атқарады", – деп түйіндеді Саттаров.

Алматыда 10 адамды өлтірген қылмыскерге сот үкімі шықты

Айта кетейік, кең көлемде ұйымдастырылып отырған аталған іс-шара қылмыстық ахуалды тұрақтандыруға, қылмыстар мен құқық бұзушылықтардың алдын алуға бағытталған.

0
Кілт сөздер:
полиция, Алматы
Тақырып бойынша
Жалған 900 мың долларды сатпақ болған Алматы тұрғыны ұсталды
Алматылық ағайындылар қылмысы әшкере болды
Дәретханада қыздарға порно көрсеткен ер адам 10 жылға сотталды
Нұр-Сұлтанда әйелдерге шабуыл жасаған шетелдік ұсталды