НҰР-СҰЛТАН, 6 сәуір – Sputnik. Екінші деңгейлі банктер төтенше жағдайға байланысты кірісінен айырылған азаматтарға төленетін 42 500 теңгеден қандай да бір қарызды ұстап қала алмайды. Жәрдемақыға салық та салынбайды. Бұл туралы еңбек және халықты әлеуметтік қорғау министрі Біржан Нұрымбетов мәлімдеді, деп хабарлайды Sputnik Қазақстан тілшісі.
"Екінші деңгейлі банктерге 42 500 теңгеден, коммуналдық қызмет, кредит қарызы болсын, қандай да бір берешекті ұстап қалуға тыйым салынды. Тіпті қарыз болған күннің өзінде құқығы жоқ. Әлеуметтік төлемге салық та салынбайды. Яғни, бұл ақшаға тиісуге болмайды. Азаматтар 42 500 теңгені толық көлемде алуы тиіс", - деді Нұрымбетов онлайн брифингте.
Министр 42 500 теңге бір рет тағайындалғанымен, ай сайын төленетінін атап өтті.
"Әлеуметтік төлем алу үшін арнайы есепшот ашудың қажеті жоқ. Кез келген карталық шотыңызға аударылады", - деді ол.
Бұған дейін Нұрымбетов декретте отырған аналар да өтініш бере алатынын айтқан болатын. Ол үшін әйелдің декреттік демалысқа шыққанына бір жыл толуы керек.
