НҰР-СҰЛТАН, 30 сәуір — Sputnik. Қазақстан астанасының халықаралық әуежайы жолаушылардың рейске өту ережесін жариялады.
- Енді Т2 терминалына вокзал маңы алаңынан кіру керек. Терминалға COVID-19 жұқтырмағанын растайтын анықтамасы (берілген күннен бастап 7 күн жарамды) бар жолаушылар ғана өте алады;
- шығарып салуға келген адамдарға терминалға кіруге тыйым салынды;
- анықтама мен дене қызуы терминалға кірер кезде тексеріледі;
- терминалда жолаушылар бетперде және қолғаппен жүруі тиіс;
- қолға дезинфекция жасау үшін терминалда санитайзерлер орнатылған;
-
рейске тіркеуден өту және тексеру кезінде адамдардан 1,5 метрден кем емес қашықтықты сақтау керек, арнайы белгілер қойылған;
-
рейске балаларын шығарып салушы ата-аналарда да коронавирус жұқтырмағанын растайтын анықтама болуы шарт. Құжат болмаса, баланы кіреберісте әуе компаниясының өкілі қарсы алып, тіркеуге апарады;
-
мүмкіндігі шектеулі жандарды тіркеуге дейін шығарып салатын адамдарда да анықтама болуы керек. Құжат болмаса, терминалға кіреберістегі арнайы батырманың көмегімен санитарды шақыру қажет.
Сондай-ақ, астаналық әуежай жолаушылардан рейске онлайн режимде тіркеліп, алдын ала келуді өтінді.
Еске сала кетсек, 1 мамырдан бастап астана мен Алматы арасында әуе рейстері ашылады. Ал 4 мамырдан Нұр-Сұлтан мен Алматыдан Қызылорда, Петропавл, Өскемен және Семейге ұшақтар қатынайды.
Бұған дейін санитарлық қауіпсіздікті сақтау үшін бортта тамақ берілмейтіні хабарланған болатын.
Билет құны 10-30 мың теңге аралығында. Сатып алу күніне байланысты болады.
