АЛМАТЫ, 10 тамыз – Sputnik. Алматыда екінші модульді жұқпалы аурулар ауруханасының құрылысы басталды. Бұл туралы мегаполис басшысы Бақытжан Сағынтаев хабарлады.
"COVID-19-ға қарсы іс-қимыл шаралары аясында төсек санын арттырып, қуаттылықты күшейтуді жалғастырамыз. Бұл ретте 300 төсек-орынға арналған, оның 30-ы реанимациялық, екінші модульді жұқпалы аурулар ауруханасының құрылысы басталды", - деп жазды Сағынтаев Instagram парақшасында.
Мекеме медициналық газ жүйесімен, сондай-ақ КТ, УДЗ және рентген аппараттарымен қамтамасыз етіледі.
Посмотреть эту публикацию в Instagram
Сонымен қатар госпиталь толығымен цифрлық негізде болады. Яғни, тексеру байланыссыз әдіспен, ал бақылау – видеобайланыс арқылы жүргізіледі.
Айтуынша, автоматтандырылған жүйе науқастың жағдайын жедел бақылауға, сондай-ақ "жасыл" және "қызыл" аймақтар бойынша қызметкерлердің қозғалысын бақылауға мүмкіндік береді.
Бұған дейін Алматы әкімі жаңа аурухана шамамен 10-15 қыркүйекте пайдалануға берілетінін мәлімдеген болатын.
Айта кетейік, бұл – Алматыдағы екінші модульді аурухана. Біріншісі 2020 жылдың сәуір айында 18 күнде салынды. Ол жерде коронавируспен ауыратын науқастар емделіп жатыр.