тұрғын үй құрылысы

Депутат тұрмысы төмен отбасылардың неге баспана ала алмай жүргенін айтты

1954
(Жаңартылды 12:23 15.10.2020)
Депутат үш тұрғын үй бағдарламасы да әлеуметтік әлжуаз отбасыларға жеңілдетілген ипотека алуға мүмкіндік бермейді деп санайды

НҰР-СҰЛТАН, 15 қазан – Sputnik. Сенат депутаттары баспана бағдарламалары бойынша жеңілдетілген ипотека ала алмай жүрген тұрмысы төмен қазақстандықтардың проблемасын көтерді, деп хабарлайды Sputnik Қазақстан тілшісі.

Сенатор Ләззат Сүлейменнің пікірінше, тұрмысы төмен азаматтардың баспана алуына бағытталған үш бағдарламаның аясын кеңейту қажет. Депутат үш бағдарлама да әлеуметтік жағынан осал топтарға жеңілдетілген ипотека алуға мүмкіндік бермейді деп санайды.

"5-10-20" – "Шаңырақ" бағдарламасы

"Нұрлы жер" бағдарламасына кіретін "Шаңырақ" – "5-10-20" пилоттық жобасы әкімдіктерде кезекте тұрғандарға ипотекалық несие беруді қарастырады. Несие алу шартының бірі –  соңғы алты ай ішінде зейнетақы қорының үзінді көшірмесін тапсыру.

"Алайда қазір I, II топтағы мүгедектігі бар адамдар еңбек табысын растай алмауына байланысты жеңілдетілген осы ипотекалық кредитке қол жеткізе алмай отыр", - деді Сүлеймен үкіметке жолдаған депутаттық сауалында.

"7-20-25" бағдарламасы

Ал "7-20-25" бағдарламасы, оның айтуынша, көптеген қазақстандық үшін едәуір қолжетімді. Бірақ, бір кемшілігі – ол тек бастапқы тұрғын үй нарығына ғана бағытталған.

"Тұрғын үй салынып, пайдалануға берілген кезде одан пәтер табу қиын. Себебі бастапқы тұрғын үй нарығы алыпсатарлар қызметінің объектісі. Олар бір уақытта бірнеше пәтер сатып алады. Осыған байланысты азаматтар тұрғын үйді алдын ала брондау шартымен сатып алуға мәжбүр. Бұл азаматтарды қосымша шығындарға алып келеді", - деді сенатор.

Яғни, бағдарламада мемлекет тарапынан көзделген 20% бастапқы жарна 30%-ке дейін өседі.

Осыған байланысты депутат "7-20-25" бағдарламасы бойынша тұрғын үйді екінші нарықта алуға рұқсат ету тиімді әрі арзандау болар еді деп есептейді. 

"Баспана хит" бағдарламасы

"Баспана хит" бағдарламасы екінші нарықтан пәтер алуға мүмкіндік береді. Бірақ, Сүлейменнің айтуынша, оның несие бойынша пайыздық мөлшерлемесі жоғары, қарыз мерзімі де аз және ай сайынғы кірісі 180 мың теңгеден төмен адамдарға қолжетімсіз.

Сол себепті депутат "Нұрлы жер" бағдарламасы бойынша сатып алу құқығынсыз жалға берілетін тұрғын үй салудың ауқымын кеңейтуді ұсынды.

Жалғыз үйінен мәжбүрлеп көшіру

Сенат депутаты көтерген тағы бір мәселенің бірі – азаматтарды жалғыз тұрғын үйінен мәжбүрлеп көшіру.

"БҰҰ экономикалық және әлеуметтік-мәдени құқықтары жөніндегі комитетінің талаптарына сәйкес, мәжбүрлеп көшіру адам құқығының бұзылуы тұрғысынан үйсіз адамдардың көбеюіне әкелмеуі тиіс. Бұл жағдайда балама тұрғын үй ретінде арнайы баспаналарда орын беруді немесе сатып алу құқығынсыз жалға берілетін әлеуметтік тұрғын үй беруді қарастыру керек", - деді Сүлеймен.

Ол коронавирус пандемиясына байланысты қазақстандықтардың экономикалық жағдайының нашарлауын ескеріп, мәжбүрлеп шығаруға тыйым салу негіздерінің тізбесін жан-жақты қарауды ұсынды.

1954
Кілт сөздер:
баспана
Зертхана қызметкері

Қазақстанда коронавируспен ауырғандар көбейіп жатыр

64
(Жаңартылды 09:03 25.10.2020)
Республика бойынша індетке шалдыққандар саны 110 402 адамға жетті. Оның ішінде 105 618 науқас жазылып шықты

НҰР-СҰЛТАН,  25 қазан – Sputnik. Қазақстанда өткен тәулікте 152 адамның коронавирус жұқтырғаны ПТР арқылы расталды, деп хабарлайды ведомствоаралық комиссия.

"Коронавирус жұқтырудың ең көп жағдайы Шығыс Қазақстан облысында (27) тіркелді. Содай-ақ, Алматы қаласында – 20 және Нұр-Сұлтанда – 15 науқас анықталды", – делінген хабарламада.

Қалалар мен өңірлер бойынша:

  • Нұр-Сұлтан қаласы - 14410 (+15)
  • Алматы қаласы - 14647 (+20)
  • Шымкент қаласы - 5225 (+3)
  • Ақмола облысы - 3620 (+12)
  • Ақтөбе облысы - 3281 (+1)
  • Алматы облысы - 5081 (+12)
  • Атырау облысы - 11254 (+5)
  • Шығыс Қазақстан облысы - 9142 (+27)
  • Жамбыл облысы - 4169 (+4)
  • Батыс Қазақстан облысы - 6961 (+8)
  • Қарағанды облысы - 10490 (+10)
  • Қостанай облысы - 3581 (+6)
  • Қызылорда облысы - 3252
  • Маңғыстау облысы - 3384 (+6)
  • Павлодар облысы - 4144 (+13)
  • Солтүстік Қазақстан облысы - 4355 (+9)
  • Түркістан облысы - 3406 (+1).

Айта кетейік, бүгінге дейін республика бойынша ауырғандар саны 110 402 адамға жетті. Оның ішінде 105 618 науқас жазылып шығып, 1 796 адам қайтыс болды.

64
Кілт сөздер:
індет, коронавирус
Тақырып:
Коронавирус эпидемиясы
Тақырып бойынша
Ғалымдар COVID-19-ға қарсы ұжымдық иммунитет қай жағдайда қалыптасатынын айтты
Ғалымдар шілдеде коронавирустың неліктен күшейіп кеткенін анықтады
Қара бұрыш коронавирустан қалай қорғайды – ғалымдар жауабын айтты
Ғалымдар ауадағы коронавирусты анықтайтын құрылғы ойлап тапты
COVID-19-бен байланысты қауіпті синдром байқала бастады: ғалымдар дабыл қақты
Сыртқы істер министрлігінің ғимараты

"Дүрліктіруге ниетті": министрлік атышулы фильмге қатысты түсініктеме берді

190
Сыртқы істер министрлігінің мәлімдемесінде ел азаматтары ашық нәсілшіл шабуылдарға наразы екені айтылады

НҰР-СҰЛТАН, 24 қазан – Sputnik. Фильм авторлары арандату жолымен Қазақстанның мемлекеттік рәміздерін мазақ етіп, дүрліктіруге ниетті, деп хабарлады сыртқы істер министрлігі.

"Арандатушылық мақсатта Қазақстан халқы да, оның мемлекеттік рәміздері де мазаққа ұшыруда. Наразылық нота жолдау мағынасыз, өйткені оның адресаты жоқ. Неғұрлым дүрліктіре берсек, соғұрлым фильм авторлары пайда табады. Үлкен пайда табу авторларды фильмді жалғастыруға итермелейді. Негізінде, фильмде нәсілшілдік пен ксенофобияның айқын формасы бар. Біздің азаматтарымыз ашық нәсілшіл шабуылдарға әділ наразы", – делінген хабарламада.

Айта кетейік, 23 қазанда бір топ жас АҚШ Бас консулдығына жиналып, "Борат-2" фильмінің шығуына қарсы шықты. Олар фильмге тыйым салуды талап етіп, петициясын ұсынды.
Ұйымдастырушылар бұл петиция арқылы қоғамда теріс реакция тудырған фильмнің көрсетілуіне тыйым салуды сұрайды, олардың пікірінше, ол бүкіл мемлекеттің беделін түсіреді.

Бұған дейін Қазақстанның мәдениет және спорт министрі Ақтоты Райымқұлова британдық актер және режиссер Саша Барон Коэннің атышулы "Борат-2" фильмі туралы пікір білдірген еді. 

Министрдің айтуынша, сенсациялық фильмнің Қазақстанда пайда болуы фактісін елемеуге болмайды. 

"Борат" тарихы

"Журналист" Борат Сагдеевтің Америкаға сапары туралы 2006 жылы шыққан фильм хитке айналды. Бұл фильмді шығаруға 18 миллион доллар жұмсап, оны дайындағандар 261,5 миллион доллар пайда тапты. Тіпті, "Алтын глобус" иегері атанды және "Оскарға" ұсынылды.

Ал Қазақстанда фильм қоғам тарапынан наразылық тудырды. Фильм түсірушілерге елді қорлады деген айып тағылды.

Екінші бөлімнің сюжеті бойынша, ойдан шығарылған кейіпкер, қазақстандық журналист Бораттың тағы да АҚШ-қа жолы түседі. Ол америкалықтардың әдеттегі өмір салтын гротеск тәсілімен мазақ ете келе, президенттік сайлау қарсаңындағы елдің саяси өмірін зерттейтін болады.

Оқи отырыңыз: АҚШ-тың Қазақстандағы елшісі "Борат" фильміне қатысты пікір білдірді

Жаңа трейлер шыққаннан кейін көптеген қазақстандық фильмді теріс бағалады. Осыдан кейін әлеуметтік желіде "Бораттың" жалғасының шығуына қарсы флешмоб ұйымдастырылды. Оған әлемнің түкпір-түкпіріндегі қолданушылар қосылды, олар #СancelBorat хэштегімен фильмге қарсы шығып жатыр.

190
Кілт сөздер:
сыртқы істер министрлігі, Борат
Ли Гон Хи

Әлемге әйгілі компанияның бас директоры қайтыс болды

0
(Жаңартылды 13:15 25.10.2020)
Ол 1987 жылы өзінің әкесі мен компанияның негізін қалаушы Ли Бен Чхолдың орнына Samsung-тің екінші төрағасы атанған болатын

НҰР-СҰЛТАН, 25 қазан – Sputnik. Әлемге әйгілі Samsung компаниясының төрағасы Ли Гон Хи 25 қазанда 79 жасқа қараған шағында Сеул ауруханасында көз жұмды. Кәсіпкердің мұрасына Оңтүстік Корея прокуратурасы алаяқтық жасады деп күдіктенген оның ұлы Ли Чжэ Ен ие болды.

Атақты кәсіпкердің өлімі туралы Ренхап агенттігі хабарлады.

Өлімнің себебі нақтыланбаған.

Ли Гон Хи 1942 жылы дүниеге келген. Ол 1987 жылы өзінің әкесі мен компанияның негізін қалаушы Ли Бен Чхолдың орнына Samsung-тің екінші төрағасы атанған.

2014 жылы Ли Гон Хи жүрек талмасына ұшырады. Содан кейін корпорацияны бақылау іс жүзінде оның ұлы мен топтың еншілес компаниясы – Samsung Electronics-тің вице-президенті Ли Чжэ Енға өтті. Өйткені, ол компанияның мұрагері саналатын.

Оқи отырыңыз: "Тірідей өртейді": әйгілі француз актрисасы Тоқаевқа хат жазды

Алайда оңтүстіккореялық ақпарат агенттіктерінің хабарлауынша, Ли Чжэ Ен концернде билікке қол жеткізу мақсатында корпорация құрамындағы компанияларды біріктіруде заңсыз алаяқтыққа барғаны туралы прокуратура тарапынан күдікке ілінген.

Айта кетейік, Ли Гон Хидің Ли Чжэ Еннан басқа Ли Бу Чжин және Ли Со Хен есімді екі қызы бар. Тағы бір қызы Ли Юн Хен 2005 жылы өзіне қол жұмсап, қайтыс болған.

0
Тақырып бойынша
Димаш Құдайберген әлемге әйгілі екі әншімен бірге өнер көрсетті - видео
Әлемге әйгілі футболшы қамауға алынды
"Әлемнің халық әртісі": Димаш Ресейдің әйгілі әншілерін гүлсіз қалдырды - видео
Әйгілі Голливуд актері әйелі екеуі коронавирус жұқтырғанын мәлімдеді
Әлемге әйгілі әнші карантиннің қандай пайдасы бар екенін айтты