Концерт, иллюстрациялық сурет

Некесіз туған немере мен алданған әнші: 2020 жылы ел аузынан түспеген кімдер?

545
2020 жылы коронавирус пандемиясына байланысты шектеулер қойылғанымен, мәдениет пен өнер саласындағылар үшін жемісті жыл болды. Бірнеше қазақстандық өнерпаз шетелдік байқауларға қатысып, топ жарды

АЛМАТЫ, 1 қаңтар – Sputnik. Оның арасында "Грэмми" сыйлығына ұсынылғаны да бар. Сонымен қатар былтыр әлеуметтік желіде ұтыс ойнатып, полиция алып кеткен әншілер мен ескі жазбалары үшін айыппұл төлегендер де болды.

2020 жылы фонограммаға қатысты шектеулерді жылдың маңызды жаңалығы десек артық айтпаспыз. Sputnik Қазақстан тілшісі осы және өзге де елді елең еткізген оқиғаларға шолу жасады.

Бесбаев пен Бәлиева арасындағы жанжал

Жыл танымал әнші Мейрамбек Бесбаев пен мәжіліс депутаты Зағипа Бәлиеваның арасындағы жанжалмен басталды. Мейрамбек Бесбаев Қазақстан орындаушылар одағының басқарма төрағасы болып сайланғаннан кейін мәжіліс депутаты жұмысына кедергі келтіріп, қысым көрсетіп жатқанын айтты.

Осы қызметке заңды түрде сайланғанын айтқан әнші бұрынғы басшылықтың жаңа басшылыққа қарсы қоқан-лоқы көрсетіп жатқанын жеткізді.

"Бұрынғы басшылықтың артында сіздің ұлыңыз және өзіңіз тұр екенсіз. Сіз заңды түрде сайланған маған, басқарма мүшелеріне қысым көрсетіп, әртүрлі мемлекеттік және құқық қорғау органдарына телефон шалып жатыр екенсіз. Мұныңыз мүлде дұрыс емес деп білеміз!", - деді Бесбаев Бәлиеваға қаратып жазған мәлімдемесінде.

Ал Бәлиева бұл іске өзінің еш қатысы жоқ екенін айтқан еді. Сонымен қатар әншіден телефон қоңырауын күтіп жүргенін мәлімдеді. Бірнеше күннен кейін әнші істің екі жақтың келісімі негізінде шешілгенін хабарлады.

"Бір елдің балалары болғандықтан, сөзге тоқтаған текті халықтың ұрпағы болғандықтан, біз ортақ мәмілеге келдік. Сол себептен, қазақтың көрнекті мемлекет қайраткері, құрметті апайымызға қатысты кеше жариялаған постымды алып тастаймын", - деп жазды әнші.

Осылайша жаңа қызметке сайланған "МузАрт" тобының әншісі көпшілікті бір дүрліктіріп алған еді.

Марат Омаровтың некесіз туған немересі

Көктемде белгілі композитор Марат Омаровтың отбасында дау туды. Отандық бағдарламалардың бірі түркістандық бойжеткеннің Марат Омаровтың ұлы Азамат Омаровтан қыз тапқанын хабарлады. Бойжеткеннің отбасы нәрестеге Омаровтардың тегін беруді сұрады. Алайда Азамат Омаров баланың өзінен емес екенін айтты. Ал оның өз отбасы, балалары бар.

Бағдарламаға қатысқан Марат Омаров "Бірден маған келмей ме? Біз өзі аз халықпыз. Мен жалпы қазақ қыздарының жылағанын қаламаймын. Ұлым екеуміздің арамызда ешқашан құпия болған емес. Ал бұл жағдайды маған айтпауы, оның сенімсіздігінен туып отыр. Мен үнемі өз жолың бар деп айтып отырамын. Әкенің малы балаға мал болмайды", - деді әнші. 

Сонымен қатар Омаров баланың немересі екені дәлелденсе, тегін беруге дайын екенін, материалдық жағынан да көмек көрсететінін айтты. Бағдарлама барысында ДНҚ сараптамасының нәтижесі хабарланды. Осылайша, кішкентай ғана Көзайым есімді сәби Омаровтар отбасының мүшесі атанды.

Біраз уақыт өткен соң Марат Омаров Sputnik Қазақстан тілшісіне сұқбат беріп, немересінің жағдайы жақсы екенін хабарлады.

Коронавирус пандемиясы кезінде композитор Марат Омаровтың есімі жиі аталып жүрді. "Коронавирус, кет" әні лезде тыңдарман жинап, хит болды. Сол әні үшін Омаров АҚШ-қа шақырту алды. Алайда әлемге тараған індетке байланысты әншінің Америкаға қашан баратыны белгісіз.

Лотерея ойнатқан Ернар Айдар

Карантин кезінде әнші Ернар Айдар он екі адам болып жиналғаны үшін әкімшілік жауапкершілікке тартылды. Ол тікелей эфирде ұтыс ойынын ұйымдастырып жатқан жерінен ұсталды.

Кейіннен Алматы қаласы экономикалық тергеу департаменті Ернар Айдардың таныстарымен бірге әлеуметтік желіде жалған лотерея ұйымдастырғанын хабарлады. Жүлдеге қымбат бағалы екі седан көлігі мен екі джип, Алматыдан пәтер, сондай-ақ, түрлі тұрмыстық техникалар қойылған. 

Кейін ұтысты ұйымдастырғандардың меншігінде мұндай жүлде болмағаны анықталды. Олар адамдарды алдап, қатысушыларды сендіру үшін төрт автокөлікті жалға алған. Жарнама арқылы жиырма мың билет сатылған, әр билеттің құны – 9 900 теңге. Ұтыстан жеңетін нөмір де алдын ала белгіленіп қойған.

Полициядан босап шыққан соң Ернар Айдар жарнама жасаймын деп алданып қалғанын айтты. Содан кейін әнші әлеуметтік желіде бірнеше ай бойы белсенді болмады.

"Бұл нәрсе маған ауыр тиді, себебі қаның түгіл ойыңда жоқ нәрсе саған бәле болып жабысқанда не істеріңді білмей қалады екенсің", - деп жазды әнші Айдар.

Фонограмма туралы заң

Былтыр парламент мәдениет мәселелері бойынша кейбір заңнамалық актілерге өзгерістер мен толықтырулар енгізу туралы заңды қабылдады.

Ол бірнеше бағытты қамтиды. Соның ішінде кітапхана мен баспа ісі, мәдени-көпшілік іс-шараларды реттеу және шығармашылық одақтарды қолдау мәселелері бар. Сондай-ақ осы құжатта фонограмманы қолдануға шектеу енгізу қарастырылған.

"Концерттік-ойын-сауық іс-шараларын өткізу кезінде туындайтын бірқатар проблема бар. Орындаушылар тарапынан концерттер өткізу кезінде әдепсіз мінез-құлық көрсету, сахнада мас күйінде өнер көрсету үрдісі орын алған, жоспарланған концерттерді бұзу, әдепсіз сөздері бар репертуар таңдау, көрермендерді хабардар етпей, фонограмманы пайдалануға жол берілген бірқатар фактілер де бар", - деді мәдениет және спорт министрі Райымқұлова.

Заңға сәйкес, әншілер концерт алдында фонограмманы қолдану туралы көрермендерге хабарлайды.

"Барлық жарнамалық өнімдер мен кассаларда фонограмма пайдаланылатыны туралы міндетті түрде хабарланады. Бұл көрермендің фонограммамен өтетін концертке билет сатып алу немесе алмауына қатысты таңдау жасауына мүмкіндік береді және ол билеттің бағасына да әсер етеді", - деп атап көрсетті Райымқұлова.

Сейфуллин Жолбарыс кіммен соттасты

Шілде айында әлеуметтік желіде әнші Сейфуллин Жолбарыстың шулы видеосы тарады. Ол жерде Жолбарыс дүкен ішінде бір ер адаммен сөзге келіп қалғаны түсірілген. Ал әнші өзінің видеодағы дөрекі әрекетіне карантиннің әсер еткенін жасырмады.

Ол Sputnik Қазақстан тілшісіне видеоны жариялаған адамның оқиғаның қалай басталғанын қоспағанын айтты.

"Алдымен мен ренжіп қалдым. Ол жерін видеодан алып тастапты. Жүйкем тозғаннан кейін ғана айғайға көштім", - дейді ол. Алайда екі жақ жанжалға не себеп болғанын айтпауға өзара келіскен.

Осы видеоға байланысты іс сотқа жолданған. Әнші дөрекі сөзі үшін әкімшілік айыппұл арқалауға дайын екенін жеткізген еді.

Оқи отырыңыз: "Сөзбен жеткізу қиын" Мұхамедиұлы президенттер алдында өнер көрсетті

Сондай-ақ, қазіргі кезде айтылған сөз үшін де заң жүзінде жауапкершілік барын ескертіп, басқаларды сақ болуға шақырды.

"Бәріміз өлеміз": Кенталдың төрт жыл бұрынғы видеосы

Шілдеде Алматы қалалық полиция департаменті Кентал атымен танымал әнші Талғат Кенжеболатовты ұстап әкетті. Әлеуметтік желілерге мониторинг жасау кезінде полиция формасын киген ер адамның видеосы анықталған. Онда автор орыс тілінде "күйзеліске ұшыраған және қиындыққа тап болғандарға" үндеу жолдайды.

"Бәріңе сәлем, достар! Кім күйзеліске душар болса, жүрегі ауырса, жұмыста, отбасында қиындықтар туындаған болса... Біреуді несие қинауы мүмкін. Уайымдамаңыз. Бәрібір бәріміз өлеміз", - дейді ол.

Алматы полициясы видеодағы ер адамның ішкі істер органында қызмет етпейтінін, сондай-ақ, коронавирус инфекциясының таралуына және қайғылы оқиғаларға байланысты үндеу жасауға болмайтынын айтты. Сондықтан полицейлер әншінің видеосын адамның қайғы-қасіретін мазақ ету деп атады. 

Әнші Кентал өзінің Instagram парақшасында мәселенің мән-жайын түсіндірді. Оның айтуынша, видео төрт жыл бұрын түсірілген.

Осы іске байланысты төрт сот отырысы өтті. Sputnik Қазақстан тілшісі онлайн форматтағы сот отырысына қатысқан болатын. Ол жерде Кенталдың мүддесін үш адвокат қорғады. Нәтижесінде Талғат Кенжеболатовқа құқық қорғау органы қызметкерінің формасын кигені үшін 13 890 теңге көлемінде айыппұл салынды.

Данэлия "America's Got Talent" финалына шықты

Қазақстандық жас әнші Данэлия Төлешова маусымда АҚШ-тың "America's Got Talent" шоуына қатысты. Содан кейін байқаудың финалына өтіп, өнер көрсетті.

Әлемдік шоудың жартылай финалында Данэлия Jessie J-дің – Who you are әнін орындады.

Қазылар алқасының құрамындағы актер Хоуи Мэнделл көрермендерді Данэлияға дауыс беруге шақырып, әншінің қабілетін жоғары бағалады.

"Менің ойымша, көрермендердің дауысы сенің үздік бестікке енуіңді қамтамасыз етуі тиіс. Өзімді таланттар шоуында қазылық етіп емес, тура бір сенің концертіңде отырғандай сезіндім. Ән орындау шеберлігің мен сахнадағы тұрысың, өзіңді көрсетуің, бәрі-бәрі тамаша әрі өз орнында болды. Сен қазірдің өзінде жұлдызсың", – деді Мэнделл.

Финалда он төрт жастағы әнші Сианың "Alive" әнін орындады.

"Бұл өте қиын композиция, бірақ біз дайындыққа өте аз уақыт берілгеніне қарамастан осы әнді таңдадық. Қолдау білдіріп, ілтипат сөздерін жолдап жатқандарға рахмет, бұл мен үшін өте маңызды", – деді Данэлия Төлешова. 

Финалда өнер көрсеткен өнерпаздарға көрермендер бір күн бойы дауыс берді. Нәтижесінде қазақстандық әнші үздік бестікке енбей қалды.

Балалар Евровидениесінде екінші орын алды

"Балалар Евровидениесі – 2020" байқауында қазақстандық жас әнші Қарақат Башанова 2-орынды иеленді. 12 жасар әнші байқауда 7 жасар кезінде өмірден озған әкесіне арнаған Forever әнін орындады.

Ұлттық қазылар алқасы мен онлайн дауыс беру нәтижесіне сәйкес қазақстандық қатысушы 152 ұпай жинады. Франциялық әнші 200 ұпаймен жеңімпаз атанды. Үшінші орын испаниялық әншіге бұйырды (133 ұпай).

Содан кейін Қазақстан президенті Қасым-Жомарт Тоқаев Қарақат Башанованы жеңісімен құттықтады.

"Қарақат Башанованы "Балалар Евровидениесі – 2020" байқауында керемет өнер көрсетуімен құттықтаймын. Ол осы беделді халықаралық сайыста Қазақстанның абыройын асырып, жүлделі 2-орынды иеленді", - деп жазды Тоқаев.

Грэммиге ұсынылған қазақстандық

Қарашада сүйінші жаңалық хабарланды. Павлодар облысы Ақсу қаласының 20 жастағы тұрғыны Иманбек Зейкенов (Imanbek) "Грэмми" музыкалық сыйлығының номинанты қатарына кірді. Оның Saint JHN-нің Roses атты әніне жазылған ремиксі әлемдік хиттердің алдыңғы қатарында тұр.

Иманбек Зейкенов
© Sputnik / Абзал Калиев
DJ Иманбек

Иманбек Павлодар облысында теміржолшы болып жұмыс істеген. Бос уақытында ремикс жазады.

"Мен үйде Saint JHN-нің әуенін естідім. Осы әнге екі сағатта ремикс жаздым. Кейін ол видеоны интернетке жүктедім. Достарыма ұнады, бірақ айтарлықтай еш нәрсе болған жоқ. Үш айдан соң трек бір миллион жазылушысы бар топта жарияланыпты. Адамдар әуенді сол жерде тыңдай бастады. Бір немесе бір жарым айдан соң маған түрлі продюсерлер хабарласа бастады", - деді Зейкенов. 

YouTube желісінде видео миллиондаған қаралым жинады, ән U. S. Billboard Hot 100 рейтингінің бестігіне кірді және мамыр айында британдық хит-шеруде алдыңғы қатарда тұрды.

Ал "Грэмми" музыкалық сыйлығының жеңімпаздары 2021 жылдың 31 қаңтарында анықталады.

Қос қазақ әйелі сұлулық байқауында бақ сынайды

2007 жылдан бері өтетін "Әлем ханымы" сұлулық байқауына екі қазақстандық қатысып жатыр. Бірі – отандық танымал әнші Қайрат Нұртастың жары Жұлдыз Әбдікәрімова. Екіншісі – астаналық келіншек Аяна Сұлтанбекова Орталық Азия атынан бақ сынауда.

"Әлем ханымы" байқауы қатысушыларға онлайн дауыс беру арқылы өтіп жатыр.

"Алғашқы күннен-ақ мені халық қолдай кетті. Оған қоса көршілес Қырғызстан, Өзбекстан, тіпті өз елінен қатысушы шығып жатса да, Ресейден де дауыс беріп жатыр. Әрине, мұның бәрі мені қуантады, келесі қадамдарыма күш береді. Әлеуметтік желіге дауыс беру туралы жазба жариялаған кезде белсенділік пайда болды, бірден 9-10 мыңнан астам адам кіріп, сайт көтере алмай қалды", - дейді Әбдікәрімова Sputnik Қазақстан тілшісіне берген сұқбатында.

Байқауда әлем елдерінен 86 әйел қатысуда. Жылдың соңында қазақстандық Жұлдыз Әбдікәрімова онлайн дауыс беру бойынша көш бастап тұрды.

545
Кілт сөздер:
өнер жұлдыздары, өнер
Тақырып бойынша
Димаштың жеке концерті: 2020 жылы әнші қай елдерде өнер көрсетеді
"Сақтықта қорлық жоқ" : өнер адамдары карантин кезінде Наурызды қалай атап өтті
"Хит ән шығармаймын": Өнер адамдары қалай күн көріп жүргендерін айтты
Әртістер өнер көрсету кезінде он метрлік биіктіктен құлап кетті – фото
Тоқаевтың алдында өнер көрсеткен Imanbek: қатты ұялдым
ADAM BOL Аwards жүлдесі

Дәрігерден ұялған: үйінде босанған келіншекке көмектескен ақтөбелік әйелдің әңгімесі

25
(Жаңартылды 19:31 04.03.2021)
Ақбота Аманғалиева 8 жыл бұрын үйінде босанған көрші келіншекке көмектесіп, нәрестені аман алып қалған. Бастапқыда дауыс шығарып жыламаған сәбидің бет-аузын сүрткен ол, табанынан ұрып, жедел жәрдем келгенше бала мен ананың жағдайын жасаған

АЛМАТЫ, 4 наурыз – Sputnik. Қазақстанда биыл алғаш рет қиын сәтте батыл қадам жасаған азаматтар марапатталды. Әлия Назарбаеваның бастамасымен ADAM BOL сыйлығы табысталды. Халықтың дауыс беруі арқылы лауреат атанған 12 азаматқа 1 миллион теңгеден берілді. Әр батырдың оқиғасы әртүрлі. Бірі өрттен бір топ адамды аман алып қалса, енді бірі зорлық әрекеттің алдын алып, балаларға көмектескен. Соның бірі – ақтөбелік кәсіпкер Ақбота Аманғалиева. Ол 8 жыл бұрын үй ішінде әйел босандырып, жыламай туған нәрестенің бетін бері қаратқан.

Қазір сол баланың денсаулығы жақсы, екінші сыныпта оқып жүр.

Sputnik Қазақстан тілшісі Ақбота Аманғалиевамен және 2013 жылы үй ішінде босанған әйелмен әңгімелесті.

Дәрігерге бармаған...

Ақбота Аманғалиеваның бір ұл, бір қызы бар. Кенжесі мектеп жасына жеткен жылы отбасымен бірге Ақтөбеден 25 шақырым жерге көшкен. Қаладағы үйін бос қалдырып, жанындағы уақытша тұруға арналған үйді жалға берген.

2013 жылдың 3 наурызында әйел бос тұрған үйін жинау үшін қалаға келеді. Сол сәтте үйін жалдап тұрып жатқан Гүлбаршын Оразғалиеваның толғағы қысқан.

"2013 жылы 3 наурызда боран соғып, қар жауып тұрды. Үйде қызымыз екеуміз ғана едік. 43 жаста болған соң дәрігерге баруға ұялдым. Ауруханаға бармай, үйде босанып қалдым. Ақбота көршім ғой, бір аулада тұрдық. Үйін жалдап тұрдым. Кешкі сағат 7-8 шамасында толғағым келді. Жедел жәрдем жоқ. Күн суық. Хабарластық, келмей жатыр. Қызым жалаңаяқ жүгіріп барып, Ақботаны шақырды", – дейді Гүлбаршын Оразғалиева.

Бұл күнді Ақбота Аманғалиева да ұмытпаған. Оқиға күні кеше болғандай, бәрі де көз алдында.

"Ол күн әлі есімде. Бала жыламай туды. Сол оқиға болардан бір ай бұрын келінім босанған кезде жанына серіктес болып кірдім... Менің сол жерге барғаным да, көршілердің дәл біздің үйге көмек сұрап келгені – бәрі-бәрі баланың көрейін деп тұрған жарығы болар... Бала көкпеңбек болып туған соң перзентханада көргенімді істеп, екі аяғынан ұстап, табанынан шапалақпен ұрдым", – дейді ол. 

Посмотреть эту публикацию в Instagram

Публикация от @adambolawards

Алайда ол кездегі жағдай оңай болмаған. Ақботаның айтуынша, келіншек қатты толғатып жатқанда қорыққан. Жедел жәрдем келгенше шыдайды деп үміттенген.

"Әйелдің ыңғайланып жатқанын байқаған соң босануға көмектесуден басқа амал жоқ екенін түсіндім. Өзімді қолға алдым. Оған оның алдында серіктес болып кіргенімнің көмегі тиді", – дейді Ақбота Аманғалиева.

"Баланың жыламағанын көріп, қатты уайымдадым. Қызым ол кезде кішкентай еді, ол да өліп қалған екен деп қорқып кетті. Ақбота сәбидің аузы-мұрнын сүртіп, екі аяғын аспанға көтерді де, табанынан ұрып, баланы жылатты. Сол сәтте "уф" дедім", – дейді келіншек.

Үйде босанған әйел бала дүниеге келген соң әлсірей бастаған. Ұйқы қысып, демалғысы келген. Алайда Ақбота Аманғалиева дәрігерлер келгенше ояу болуын қадағалаған.

"Менің ұйықтап қалмасын деп шапалақпен ұрып отырды. Содан жарты сағат өткен соң жедел жәрдем келіп, мені мен баламды алып кетті. Оны осы күндері "борандатып туған балам" деп айтамын", – дейді Гүлбаршын.

Боранда туған бала

Бала қазір 8 жаста. Ақтөбеде екінші сыныпта оқып жатыр. Аты – Ербол. Бір кездері пәтер жалдап тұрған отбасы 2 қабатты үй салып, көшіп кеткен. Алайда баласының өмірін сақтап қалған әйелмен байланыс үзілмеген.

Гүлбаршын Оразғалиева мен ұлы Ербол
© Photo : Гүлбаршын Оразғалиеваның жеке архивінен
Гүлбаршын Оразғалиева мен ұлы Ербол

"Анда-санда Наурыз секілді мейрамдарда рақмет айтып, хабарласып тұрамыз. Әр туған күн сайын Ерболдың фотосын жібереміз. Көшеде көріп қалса, "менің балам қалай?" деп сұрайды. Ақботаның үйінде 2016 жылға дейін тұрдық", – дейді ақтөбелік әйел.

Ақботаның айтуынша, екі отбасы телефон арқылы сөйлескенімен, бір-бірінің үйіне бармаған. Алайда кәсіпкер жақында баланы көріп қайтатынын айтты.

"Біз ол жерден көшіп кеттік. Олар да басқа жерде тұрады. Қаланың екі жағында тұрамыз, бірақ әлі күнге дейін хабарламыз. Басында 2-3 жыл баланың туған күніне шақырып, келіншегі хабарласып жүрді. Баруға бір реті келмепті", – дейді Ақбота Аманғалиева.

Ол баланы әлі көрмесе де, жыл сайын туған күнімен құттықтап тұрады.

ADAM BOL AWARDS

Айта кетейік, бірінші наурызда Алматыда ADAM BOL жүлдесінің жеңімпаздары марапатталды. Сыйлық ерлік жасаған, басқа адамдардың өмірін құтқарған адамдарға берілді.

ADAM BOL AWARDS жүлдесінің құрылтайшысы – Қоғамдық маңызды бастамалар қорының жетекшісі, әдебиет пен өнер саласындағы мемлекеттік сыйлықтың лауреаты Әлия Назарбаева.

Жеңімпаздар тізімін мына сілтемеден оқуға болады.

25
Кілт сөздер:
сыйлық, ерлік
Тақырып бойынша
"Ондай сәтте ештеңе ойламайсың". Үш мәрте ерлік жасаған жас полицей нені армандайды?
Нұр-Сұлтандағы апат: автобус жүргізушісі ерлік жасағаны белгілі болды
Соғыста ерлік көрсеткен қазақ қыздары туралы не білеміз?
Ресейлік дипломат Тоқаев қытай тілінің арқасында қандай ерлік жасағанын айтты
Корея тұрғындары ерлік жасаған қазақ жігітін мемлекеттік марапатқа ұсынды
Кісен, архивтегі сурет

Солтүстік Қазақстанда ер адам бастығынан тірі анасын "жерлеуге" ақша сұраған

100
Аудан полицейлері тонау қылмысын ашу кезінде күдіктінің тұрғындарды алдап, алаяқтық жасағанын анықтады

НҰР-СҰЛТАН, 4 наурыз – Sputnik. Солтүстік Қазақстан облысында тірі туыстарын "жерлеу" үшін тұрғындардан ақша алған алаяқ ұсталды, деп хабарлайды Polisia.kz.

Шал ақын ауданының полицейлері тонау қылмысын ашу кезінде екі алаяқтық фактісін анықтады.

15 ақпанда Сергеевканың 29 жастағы тұрғыны дүкен тонады деген күдікпен тергеу изоляторына қамалды. Ер адам бұған дейін істі болған.  

"Тергеу барысында күдіктінің былтыр желтоқсанда жергілікті тұрғындардың бірінен апасын "жерлеуге" 50 мың теңге алғаны анықталды. Алайда оның  ешқашан апасы болмаған", - делінген хабарламада.

Қаңтар айында күдікті аудандағы шаруа қожалығына қара жұмысшы болып кіреді. Екі апта жұмыс істегеннен кейін бастығынан материалдық көмек сұрайды. Бұл жолы ақша анасын "жерлеуге" қажет болған.

Тағы оқыңыз: Дәретханаға сұранған: Алматыда ер адам тергеу изоляторынан қалай қашып кетті

Әйелдің тірі және аман-сау екенінен хабарсыз кәсіпкер қарамағындағы қызметкеріне 62 мың теңге берген. Осыдан кейін ер адам жұмысқа шықпаған.

Екі факті де Қылмыстық кодекстің 190-бабы "Алаяқтық" бойынша сотқа дейінгі тергеулердің бірыңғай реестріне енгізілді.

100
Кілт сөздер:
алаяқ, Солтүстік Қазақстан облысы

"Спутник V" вакцинасын шығарып жатқан Қарағанды зауытының қызметкерлері не дейді

0
Қарағанды фармацевтикалық кешені коронавирусқа қарсы ресейлік "Спутник V" вакцинасының қазақстандық үлгісінің өндірісі бойынша жұмысты өз мойнына алды

Вакцинаның алғашқы партиясы Қазақстан аймақтарына жеткізілді. Ең алдымен медицина қызметкерлеріне, мұғалімдер мен полицейлерге екпе салынып жатыр.

Sputnik Қазақстан тілшілері фармзауытта болып, қауіпті вирусқа қарсы вакцинамен күн сайын жұмыс істейтін адамдардың өмірі қалай өзгергенін көріп қайтты.

0