Архивтегі фото

Баспана бағасы шарықтап кетті: депутаттар не дейді

1646
(Жаңартылды 11:11 18.02.2021)
Сұраныс көп болған сайын, баға шарықтай береді, нарықты реттеу оңайға соқпайды, дейді депутат Елнұр Бейсенбаев

НҰР-СҰЛТАН, 18 ақпан – Sputnik. Зейнетақы жинағын мерзімінен бұрын алуға рұқсат етілгеннен бері елде баспана бағасы күрт шарықтап кетті. Пәтер іздеген қазақстандықтар баға күн сайын өсіп, зейнетақы қорындағы ақша құнсызданып бара жатқанын айтып шағымдануда. Халықтың мұңын естіген президент Қасым-Жомарт Тоқаев жылжымайтын мүлік нарығында үй бағасын реттеуді тапсырған еді. Sputnik Қазақстан тілшісі мәжіліс депутаттарынан осы мәселеге қатысты пікірін сұрап қайтты.

Мәжіліс депутаты Елнұр Бейсенбаевтың айтуынша, нарықтағы сұраныс әрдайым бағаны өсіреді. Жылжымайтын нарықта бағаны реттеу өте қиын.

"Біріншіден, бағаның өсуіне көптеген фактор ықпал етеді. Бүгінгі таңда әр өңірде, банктерде әртүрлі бағдарламалар бар. Мысалы, "7-20-25" бағдарламасының іске қосылуы да тұрғын үй құнына белгілі бір дәрежеде әсер етті. Бірақ, бұл жылжымайтын нарықтың заңдылығы. Нарықта сұраныс көп болған сайын, баға шарықтай береді. Бұл нарық, сондықтан мұны реттеу оңайға соқпайды", - деп санайды ол.

Алайда, мәжілісменнің пікірінше, жаңа пәтерлердің бағасын қарапайым азаматтарға қолжетімді ету үшін құрылыс компанияларымен алдын ала келісу қажет. Бұл мемлекеттік деңгейде шешілетін мәселе, дейді ол.

"Екі жыл бұрынғымен салыстырғанда, құрылыс материалдарының көбі 30 процентке қымбаттады. Мұны бәрі біледі. Әлеуметтік баспана, эконом санаттағы тұрғын үйлер салатын компаниялар қандай жағдай болмасын бағаны ұстап тұруы тиіс. Өйткені олар қарапайым халықтың есебінен пайдаға кенеліп отыр. Мұндай құрылыс компаниялары, ең алдымен, пайданы емес, тұрмысы төмен азаматтарға, жас отбасыларға көмек көрсетуді ойлауы керек. Сол себепті белгілі бір лимит болғаны жөн шығар", - дейді Бейсенбаев.

Тоқаевтың тапсырмасы толық орындалмады: депутат шенеуніктерді жазалауды ұсынды

Мәжілісменнің ақпаратынша, қазір Қазақстанда 14-35 жас аралығындағы 6,2 миллион жас тұрады. Яғни, Қазақстанның әрбір үшінші тұрғыны – жас адам. Ажырасу көрсеткіші де дәл осы жастар арасында өте жоғары. Бейсенбаевтың сөзінше, ажырасудың басты себептерінің бірі – баспананың жоқтығы.

"2016 жылы Алматы қаласын Бауыржан Қыдырғалиұлы (Байбек – Sputnik) басқарған кезде, біз "Алматы жастары" бағдарламасын іске қостық. Ол күні бүгінге дейін бар. Сол кезде жас отбасының жасын 35-ке дейін ұзарттық, соның арқасында бағдарлама аясында көбі баспаналы болды. Қазір бұл бағдарламаны аздап кеңейтіп, жыл сайын тағы 300 адамға пәтер алуға мүмкіндік беріп отыр. Бізге осындай бағдарламалар қажет. Бүгін жас отбасының мәселесін шешу арқылы біз оның ұрпағының мәселесін шешеміз. Сол себепті әр жерде жас отбасыларға арналған аймақтық бағдарлама болуы керек", - деді мәжіліс депутаты.

Елнұр Бейсенбаев әзірге зейнетақы шотындағы ақшаны шешпегенін айтты.

"Зейнетақы жинағым соншалықты көп те емес. Шамамен 800 мың теңгені алуға болады. Бірақ, әзірге қызығушылық танытпадым", - деді ол.

Бейсенбаевтың әріптесі Жанарбек Әшімжанов та зейнетақы жинағының бір бөлігін мерзімінен бұрын алуға асығар емес.

"Шотымды тексеріп көрдім. Осыған дейін 24 жылдай еңбек етіппін. Сондықтан артылып тұрған ақшам бар, алуға құқығым да бар. Бірақ, әзірше жоспар жоқ", - деді халық қалаулысы.

Мәжілісмен пәтерлердің қымбаттауына қатысты да бір-екі ауыз пікір білдірді.

"Президент тапсырма берді, енді үкіметтік ведомстволар қадағалауы керек. Зейнетақы қорынан ақша алуға болады деген әңгіме шыққалы бері үйдің бағасы да, жалдамалы пәтерлердің бағасы да кенеттен өсіп кетті. Үй бағасының кенеттен көтерілуі халыққа өте қолайсыз деп санаймын. Демек, менің ойымша, бұл жерде қайта қарайтын мәселелер бар", - деді ол.

Баспана қаншаға қымбаттады

Соңғы бес айда Қазақстанда жаңа үйлердің бағасы 5%-ке өскен. 2019 және 2020 жылдың сәйкес кезеңінде ол 3%-тен аспаған еді.

Ал өткен жылдың қыркүйегінен бері қолданыстағы үйлер 12,5%-ке қымбаттады.

Мұндай мәліметтер Бәсекелестікті қорғау және дамыту агенттігінің төрағасы Серік Жұманғариннің депутаттардың сауалына берген жауабында келтірілген. Оның айтуынша, баспананың қымбаттауына сұраныстың күрт өсуі себеп болып отыр.

Жұманғарин жылжымайтын мүлік нарығында бағаны алдын ала сөз байласып көтеру фактілерінің бар-жоғы тексерілетінін айтты.

Қазақстанда тұрғын үйге шекті баға белгілеу ұсынылды

3 ақпанда мәжілісмен Аманжан Жамалов мемлекеттік ипотекалық бағдарламалар бойынша салынатын баспананың шаршы метріне шекті бағасын енгізуді ұсынды. Парламентарийдің пікірінше, ипотеканы мемлекеттік субсидиялау өскен сайын баспана бағасы да шарықтап барады.

Депутаттың айтуынша, зейнетақы жинағына үй сатып алуға рұқсат етілгеннен бері құрылыс компаниялары тұрғын үйдің сапасын емес, бағасын көтеруге кіріскен.

Жамалов үкімет пен Бәсекелестікті қорғау агенттігінен жылжымайтын мүлік нарығында бағаның өсуін шектеу бойынша тиісті шаралар қабылдауды сұрады.

16 ақпанда Ұлттық банк төрағасы зейнетақы жинағын мерзімінен бұрын шешіп алу бойынша 1 триллион 855,9 миллиард теңгеге 115 608 өтінім қабылданғанын мәлімдеді. Оның ішінде 423,6 миллиард теңгеге 78 074 өтінім мақұлданған.

Қазақстандықтар жинақтың 87%-ін тұрғын үй мәселесін шешуге, оның 45,5%-ін – баспана сатып алуға (ипотекасыз); 28,3%-ін – ипотекалық қарыз бойынша берешекті өтеуге; 10,5%-ін екінші деңгейлі банктерге бастапқы жарна үшін және Отбасы банкінде ипотека алуға; 2,3%-ін жеке тұрғын үй салуға, ипотеканы қайта қаржыландыруға, сатып алу құқығымен жалдау шарты бойынша берешекті өтеуге және өзге де мақсаттарға жұмсауды жоспарлап отыр.

1646
Кілт сөздер:
депутаттар, баспана
Тақырып:
Зейнетақы қорындағы ақшаны мерзімінен бұрын алу (76)
Қасым-Жомарт Тоқаев

Тоқаев ауыл мұғаліміне хат жазды

0
Тәжірибелі оқытушы зейнетке шыққаннан кейін Кемел Тоқаев атындағы қайырымдылық қорын басқарған, қор көпбалалы отбасыларға қолдау көрсетеді

НҰР-СҰЛТАН, 7 наурыз – Sputnik. Қазақстан президенті Қасым-Жомарт Тоқаев Үштөбеде тұратын білім саласының ардагерін Халықаралық әйелдер күнімен құттықтады, деп хабарлайды Алматы облысы әкімдігінің баспасөз қызметі.

Мемлекет басшысы құттықтау хатты 74 жастағы орыс тілі және әдебиеті пәнінің мұғалімі Валентина Спиридоноваға жолдады.

Валентина Григорьевнаның педагогикалық қызметі 1963 жылдан басталады. Спиридонова 1995 және 2009 жылдар аралығында Кемел Тоқаев атындағы жалпы білім беретін мектепті басқарған.

"Құрметті Валентина Григорьевна! Сізді Халықаралық әйелдер күнімен құттықтаймын. Көктемнің сұлулық пен нәзіктік мерекесінде мейірімділігіңіз, түсіністігіңіз бен жемісті еңбегіңіз үшін шынайы ризашылығымды білдіремін. Әр күн сізге және жақындарыңызға қамқорлық пен махаббат сыйласын. Зор денсаулық, жан тыныштығы мен бақыт тілеймін", - деп жазды Тоқаев өз құттықтауында.

Президенттің құттықтау хатын Алматы облысының әкімі Амандық Баталов табыстады. Өңір басшысы да блім саласының ардагерін 8 наурызбен құттықтады.

Валентина Спиридонова и Амандык Баталов
© Photo : Акимат Алматинской области
Валентина Спиридонова мен Амандық Баталов

"Мен ауыл мұғалімімін. Президент Қасым-Жомарт Тоқаевтың жұмысбастылығына қарамастан мені және біздің мектепті ұмытпайтыны қатты қуантады. Оған үлкен алғысымды айтамын. Қазақстанымыз әрқашан гүлдене берсін",  - деді Валентина Спиридонова.

Ардагер педагог "Алтын барыс", "Ыбырай Алтынсарин", "ҚР Білім беру ісінің құрметті қызметкері" төс белгілерімен, сондай-ақ "Шапағат" медалімен марапатталған.

Зейнетке шыққаннан кейін 2009 жылы Кемел Тоқаев атындағы қайырымдылық қорын басқарды. Қор көпбалалы және тұрмысы төмен отбасыларға қолдау көрсетеді. Соңғы бірнеше жылда отандық және шетелдік жоғары оқу орындарына елуден астам грант ұсынған.

0
Кілт сөздер:
Халықаралық әйелдер мерекесі, мұғалім, Қасым-Жомарт Тоқаев
Алматы әуежайында жолаушыларды тексеру

Қазақстан ПТР-тест тапсырмаған жолаушылар үшін 2 млн теңге төлейді

23
Сенбі күні ел аумағына 307 азамат анықтамасыз келді, қазір олар коронавирусқа тест тапсырып, карантиндік стационарда нәтижесін күтіп отыр

НҰР-СҰЛТАН, 7 наурыз – Sputnik. 6 наурызда Қазақстанға Германия, БАӘ, Мысыр, Түркия, Ресей, Беларусь, Өзбекстан және Қырғызстаннан 17 халықаралық әуе рейсі келді, деп хабарлайды санитарлық-эпидемиологиялық бақылау комитеті.

Қазақстан аумағына 2 561 жолаушы ұшып келді. Оның ішінде 2 254 адамның теріс нәтиже көрсетілген ПТР анықтамасы бар. 307 азамат анықтамасыз келген. Олар COVID-19 инфекциясына тест тапсырып, карантиндік стационарда нәтижесін күтіп отыр.

Тағы оқыңыз: Қазақстанда коронавирус жұқтырғандар туралы мәлімет жарияланды

Бұған дейін 3 наурыздан бір ПТР-тестке мемлекеттік зертханалар жеті мың теңге (17 долларға жуық) жұмсайтыны хабарланған еді. Бұл бағаға қонақ үй мен тамақтандыру төлемі кірмейді.

307 жолаушы үшін билік 2 149 000 теңге төлейді.

5 наурызда шет елдерден 316 қазақстандық анықтамасыз ұшып келді. Барлығында ПТР-тест теріс нәтиже көрсетті.

23
Кілт сөздер:
анықтама, коронавирус
Тақырып:
Коронавирус эпидемиясы