Вакцина

Шетелде салдырған вакцина Қазақстанда қабылдана ма?

58
Өмірзақованың айтуынша, вакцина егудің екінші кезеңінен бастап Қазақстанда өндірілген ресейлік вакцина қолданылады

АЛМАТЫ, 19 ақпан – Sputnik. Нұр-Сұлтан қаласы қоғамдық денсаулық сақтау басқармасы өкілі шетелде коронавирусқа қарсы салдырған вакцинаның Қазақстанда жарамды болатынын айтты. Мұндай жағдайда вакцина салдырғаны туралы анықтама болуы қажет, деп хабарлайды Sputnik Қазақстан.

"Егер азаматтың коронавирусқа қарсы вакцина алғаны туралы құжат түріндегі анықтамасы болса, әрине ол қабылданады. Мұндай жағдайда оның Pfizer немесе басқа вакцина екені маңызды емес", – деді Нұр-Сұлтан қаласы қоғамдық денсаулық сақтау басқармасы басшысының орынбасары Әсия Рүстемова.

Айтуынша, елордада вакцина егудің үшінші аптасы аяқталды. Қала бойынша тиісті контингент ішінде 1 980 адам вакцина алды. Олардың арасында вакцинадан кейін асқынулар анықталмаған.

Вакцина егудің екінші кезеңі қашан басталады

Вакцинаның екінші компонентін егу 22 ақпанда жалғасын табады.

"Вакцинаның келесі жеткізілімі ақпанның соңына жоспарланған. Вакцинаның жаңа партиясы келген уақытта медицина қызметкерлерін егуді жалғастырамыз. Сондай-ақ, педагогтар, күштік құрылым қызметкерлері, созылмалы ауруы бар адамдарға вакцина салынады", – деді Нұр-Сұлтан қаласы алғашқы медициналық санитариялық көмекті ұйымдастыру бөлімінің басшысы Әлия Өмірзақова.

Оның түсіндіруінше, вакцина егудің екінші кезеңінен бастап Қазақстанда өндірілген ресейлік вакцина қолданылады.

"Ресейлік вакцинамен қатар Қазақстанда өндірілген вакцина бірге қолданылады. Қазір ресейлік вакцина Қазақстанда өндіріледі. Екінші кезеңде қазақстандық вакцина бойынша ем-шара өткіземіз", – деді Өмірзақова.

Кімдерге вакцина салынбайды

Қазақстанда 1 ақпанда коронавирусқа қарсы жаппай вакцинация басталды. Екпе алдымен инфекцияны жұқтыру және тарату қаупі жоғары халықтың осал топтарына кезең-кезеңмен салынады. Олардың ішінде медицина қызметкерлері, педагогтар, құтқарушылар, полицейлер, әскерилер, созылмалы ауруы бар адамдар бар. Екпе тегін және ерікті түрде жүргізіледі.

Оқи отырыңыз: Бұрынғы денсаулық министрі Досқалиев COVID-ке қарсы вакцина туралы не дейді

Денсаулық сақтау министрлігінің мәліметіне сәйкес, адам соңғы алты айдың ішінде коронавируспен ауырып шықса, вакцина салудың қажеті жоқ. Бұдан бөлек, жүкті әйелдерге, ауыр аллергиясы мен вакцинаның құрамындағы заттарға жоғары сезімталдылығы бар адамдарға, 18 жасқа толмағандарға және 65 жастан асқандарға вакцина салынбайды.

58
Кілт сөздер:
коронавирус, екпе, вакцина
Тақырып:
COVID-ке қарсы вакцина (102)
Тақырып бойынша
Вакцина салдырмағандар ұжымдық иммунитетке сенім арта ала ма?
Коронавирус жұқтырған симптомсыз науқасқа вакцина салуға бола ма?
Коронавирусқа қарсы вакцина бедеулікке ұшыратпайды
Қазақстанда әскерилерге вакцина егу қашан басталатыны белгілі болды
Алматыда депутаттар вакцина салдырды – фото
Нұр-Сұлтан

Нұр-Сұлтан коронавирус бойынша "қызыл" аймаққа кірді

1622
Қазақстан астанасы коронавирус бойынша "қызыл" аймақта 11 ақпаннан бері болған жоқ

НҰР-СҰЛТАН, 28 ақпан — Sputnik. Қазақстанда коронавирустық инфекция бойынша эпидемиологиялық жағдайды бағалаудың мартицасы жаңартылды.

28 ақпандағы жағдай бойынша Нұр-Сұлтан "қызыл" аймаққа кірді, бұған дейін қала "сары" аймақта еді.

"Сары" аймақтағы өңірлер – Ақмола, Атырау, Батыс Қазақстан, Қостанай, Павлодар облыстары.

Қалған өңірлер "жасыл" аймақта – Жамбыл, Алматы, Ақтөбе, Қызылорда, Маңғыстау, Қарағанды, Шығыс Қазақстан, Солтүстік Қазақстан, Түркістан облыстары және Шымкент пен Алматы қалалары.

Матрицаға сәйкес, Қазақстан "жасыл" аймақта тұр.

Оқи отырыңыз: ДДҰ COVID-19 пандемиясының аяқталу мерзімін атады

 

1622
Кілт сөздер:
Нұр-Сұлтан, коронавирус
коронавирус

Қазақстанда бір тәулікте коронавирус пен пневмониядан 15 адам қайтыс болды

28
(Жаңартылды 11:14 28.02.2021)
Қазақстанда өткен тәулікте 791 адамнан коронавирус табылды, 58 адам пневмонияға шалдықты

НҰР-СҰЛТАН, 28 ақпан – Sputnik. Қазақстанда өткен тәулікте коронавирус пен пневмониядан 15 адам қайтыс болды, деп хабарлады денсаулық сақтау министрлігі.

Өткен тәулікте 13 адам коронавирустан, 2 адам коронавирус белгілері бар пневмониядан көз жұмды.

28 ақпандағы мәлімет бойынша, 20 280 адам коронавирус инфекциясынан емделуде, олардың ішінде 4 483 науқас стационарда, 15 797 адам амбулаториялық деңгейде ем қабылдап жатыр.

249 науқастың жағдайы ауыр, 52 адамның жағдайы аса ауыр деп бағаланды. 42 адам жасанды тыныс алу аппаратына қосылған.

Өткен тәулікте 791 адамнан коронавирус табылса, 58 адам пневмонияға шалдыққан. 

Пандемия басталғалы Қазақстанда коронавирустан 2 756 адам, пневмониядан (тамыз айынан) 622 науқас қайтыс болды. 

 

28
Газовое отопление в доме в Туркестане, где погибли пять человек

Ұйықтап үлгермеген: полиция Түркістандағы қайғылы жағдай қалай болғанын айтты

0
(Жаңартылды 13:08 28.02.2021)
Отбасы өз меншігіндегі үш бөлмелі үйде тұрып жатқан, оның жанында үлкен үйдің құрылысы жүріп жатыр

АЛМАТЫ, 28 ақпан –  Sputnik. Түркістан қаласында иіс тиіп қайтыс болған бес адамның денесін отбасының таныстары тапқан. Әйел 27 ақпанда жұмысқа шықпаған соң әріптесі іздей бастайды. Полицияның хабарлауынша, қайғылы жағдай 26 ақпан кешкі сағат жетілер шамасында болған, деп хабарлайды Sputnik Қазақстан тілшісі.

"Аталған жайт туралы хабарлама 27 ақпан күні кешке 18:12-де түсті. 26 ақпан күні кешке дейін Болатова Гүлназ базарда жұмыс істеген. Оның базарда бірге істейтін әріптесі 27-сі күні жұмысқа шықпаған соң іздеп, түсте үйіне баласын жіберген. Баласы үйінде ешкім жоқ деп қайтып келген соң, жұмыстан кейін күйеуін жіберген. Себебі ол жұмысқа келмеген, өздерінің кездесетін жоспары болған екен. Күйеуі үйдің терезесінен іште жарық жанып тұрғанын және әйелдің жатқанын көріп хабарлаған", - деді облыстық полиция департаменті бастығының бірінші орынбасары Әбдуғани Сейдуәлиев өңірлік коммуникациялар қызметінде өткен онлайн-брифингте.

Полицияның болжамына сәйкес, қайғылы жағдай әйел жұмыстан келген соң болды. Отбасы үш бөлмелі үйде тұрған.

"26 ақпанда ұйықтауға үлгермеген. Өйткені шешініп, төсекке де жатпаған. Кешкі уақытта пешті қосып, тамақтанып болған соң қайғылы жағдай болды деп болжап отырмыз. Әрқайсысы әр бөлмеде қимылдап жүріп, осы жағдайға тап болған. Байқамаған. Оқиға шамамен 26 ақпан кешкі сағат жеті-сегіз шамасында болды деп отырмыз. Оның дәл уақытын сараптама анықтайды", - деді Сейдуәлиев.

Түркістан облысы әкімінің бірінші орынбасары Арман Жетпісбайдың айтуынша, отбасы өз меншігіндегі үйде тұрып жатқан. Уақытша үш бөлмелі баспанада тұрған, жанында үлкен үйдің құрылысы жүріп жатыр.

"Қаза болған азаматтардың денесі сот-медициналық сараптамадан өткізіліп, туыстарына табысталды. Жергеу орнына жеткізу үшін көліктер ұйымдастырылды. Қазір Қызылорда облысы Жаңақорған ауданында Түркістан қаласының әкімі Рашид Аюпов жерлеу рәсіміне қатысып жатыр. Зардап шеккен отбасыға қаржылай көмек көрсетіледі", - деді Арман Жетпісбай.

Айтуынша, облыстағы мемлекеттік қызметкерлер отбасыға көмек ретінде бір күндік жалақысын беруге ниет білдіріп отыр.

"Бұл жерде ашық өрт шықпаған, мүлікке зиян келмеген. Бәрі орнында тұр. Сол себепті демеушілер арқылы 7 миллион теңге қаржылай көмек көрсетеміз деп отырмыз", - деді облыс әкімінің орынбасары.

Алдын ала болжам бойынша, оқиғаға үй ішіндегі пеш себеп болған.

"Төтенше жағдай департаментіне 18:35-те жедел жәрдем бөлімінен хабарлама түсті. Түркістан қаласы Сұлтан Бейбарыс көшесінде орналасқан жеке үйден әйел мен төрт баланың денесі табылды. Жеке тұрғын үй табиғи газбен жабдықталған. Иран пешінің орнатылғаны анықталды. Алғашқы болжам бойынша иісті газбен уланып қайтыс болған", - деді облыстың төтенше жағдай департаментінің бастығы Нұрғали Жүнісов.

Айта кетейік, бұл оқиғаға байланысты қылмыстық іс қозғалды. Облыстық полиция департаменті бастығының бірінші орынбасары Әбдуғани Сейдуәлиевтің айтуынша, ҚК 292-бабы 3-бөлігі "Абайсызда екі немесе одан да көп адамның өліміне әкеп соққан өрт қауіпсіздігі талаптарын бұзу" бойынша іс біріңғай тізілімге тіркелді.

"Қазір өлім себебін анықтау үшін сот-медициналық сараптама белгіленді. Пештің талапқа сай немесе сай еместігін анықтау үшін сот-техникалық сараптама жасалады. Тергеу жүргізіліп жатыр", - деді Сейдуәлиев.

Түркістандағы қайғылы жағдай

27 ақпанда Түркістан қаласындағы жеке тұрғын үйлердің бірінен әйел мен төрт баланың мәйіті табылды. 40 жастағы әйел және 2004, 2006, 2013, 2016 жылы туған балалары иіс тиіп қайтыс болды. Үйде газбен жылытатын жабдық қойылған. Отағасы кәсіпкерлікпен айналысады, ол емделу үшін Шымкент қаласына кеткен.

0