Пәтердің техпаспорты

"Сапалы материал аламын": Үй жөндейтін құрылысшылар халықты қалай алдайды?

184
(Жаңартылды 15:17 06.04.2021)
Электрші барлық жұмысты екі-үш күннің ішінде бітіріп беремін деген. Бірақ электрмонтаж бір жарым аптаға созылды, дейді астаналық Нұрлан Жақиянов

НҰР-СҰЛТАН, 2 сәуір — Sputnik. Биыл зейнетақы жинағының бір бөлігін алдын ала пайдалануға рұқсат берілуінің арқасында біраз адам баспаналы болды. Біреулер ескі үйден пәтер алса, енді біреулер жаңасын таңдап жатады. Дегенмен көбісі пәтерге кіргеннен кейін ішкі дизайнын өзгертіп, күрделі жөндеуді бастайды. Әрине оны өз қолымен жасаса, біраз мәселе шешіледі, ақша да үнемделеді. Ал ондай өнерің болмаса, маман іздеуге тура келеді. Содан электрші, сантехник, сылақшы, ағаш шебері және тағы басқасын іздеу басталады. Бірақ олардың ішінде халықты алдайтын мамандар, тіпті алаяқтар да кездеседі. Sputnik Қазақстан тілшісі зейнетақы қорының ақшасына пәтер алғандармен сөйлесіп, күрделі жөндеудің машақатын білді. 

Электрші алдап кетті

Астаналық Нұрлан Жақиянов биыл алғашқы пәтерін алды. Ол зейнетақы жарнасының бір бөлігін пайдаланып, қалған ақшаны ипотекаға рәсімдеді. Сөйтіп су жаңа бір бөлмелі пәтеріне қол жеткізді. Алайда оған кіру үшін алдымен жөндеу жұмыстарын жүргізу қажет.

"Бастапқыда құрылыс мамандарына "под ключке" берейін деген едім. Бірақ оған ақшам жетпей қалды. Өйткені материалдың бәрін бірден сатып алу қажет. Сосын бригадаға алдын ала төлем жасау керек. Ақша жетпегесін жөндеуді бөлек-бөлек істеуге шешім қабылдадым", - дейді Жақиянов.

Ол алдымен үйдің электр желілерін жасатуға кірісіпті. Содан маман іздеп, бір электршіні тапқан. Егде жастағы кісі өз ісін біледі екен. Бәрін көрсетіп, ақыл-кеңесін де айтады. Сосын құрылыс материалдарын жазып берген.  

"Базарға барып, бәрін алып бердім. Розеткаларға 100 метр кабель, шамдарға 70 метр сым, сосын ұсақ-түйегі бар, барлығы 64 мың теңгеге шықты. 41 шаршы метрлік пәтеріме ақша аяған жоқпын. Оған қоса, көбісі электрмонтажды жақсылап істеу керек, ақша аямау керек дейді. Мен де солай істедім", - деп атап өтті қала тұрғыны.

Электрші барлық жұмысты екі-үш күннің ішінде бітіріп беремін деген. Бірақ электрмонтаж бір жарым аптаға созылады. Біресе жұмысы шығып қалады, біресе отбасы жағдайымен кетіп қалады. Ақыр соңында бітіріп, ақшаны бірден мобильді қосымшамен жіберуді сұраған.

"Мен келіскен жоқпын. Пәтерде кездесейік, жұмысты көрейік дедім. Ол кісі алдында сымның бәрін жауып тастаймын деп, сылақ әкеліп беруді қайта-қайта сұраған. Оған қолым тимеді. Содан кабельдер ашық қалды. Мен ерінбей, бәрін өлшеп, санап шықтым. Сөйтсе, розеткаларға 60 метр, ал шамдарға 40 метр ғана кеткен. Қалғаны жоқ. Өзінен сұрасам, шыж-быж болады, ренжіп қояды. Үлкен кісі болғасын ештеңе айтқан жоқпын", - дейді Жақиянов. 

Сантехник сан соқтырды

Қала тұрғыны Әлия Жұмағұлова да құрылыс компаниясынан жаңа пәтер алған. Ипотека рәсімдегесін қымбаттау шыққан. Дегенмен зейнетақы жинағын пайдаланып жатқаннан кейін қалтаға көп салмақ түспейтін сияқты. Ең бастысы алғашқы пәтер алынды.

"Біз электр желілері мен сантехника сияқты жұмыстарды кәсіби мамандарға жасатып алғанды жөн көрдік. Өйткені "под ключ" жасайтын кейбір бригадалар оны дұрыс істемейді. Артынан розетка істемей қалады, я болмаса, су ағып кетеді. Содан алдымен сантехниканы жасатуға кірістік", - деді Жұмағұлова. 

Әлия жолдасы екеуі сантехникті хабарландырумен іздеген. Біраз сайттарды ақтарады. Ақыры Инстаграммнан жас сантехниктің жұмысын көріп, соны шақыруға шешім қабылдайды. Жұмыс ақысы – 50 мың теңге. 

"Жас жігіт жүзі жылы, адамды алдамайтын сияқты болып көрінді. Сантехника мен вентиляция бойынша білім алдым, дипломым бар деді. Оны естіп, қуанып кеттік. Бірақ біз дайындап қойған құрылыс материалдарын пайдаланбаймын деп шықты. Өзінің "сапалы" бір материалдары бар екен. Соны алып келемін деді. Жарайды, оған да сендік. Бізге алдын ала ақы алмайтыны да ұнады. Жұмысты бітіргеннен кейін көріп, ақшасын бересіз деді. Біз бірден кілт пен лифт картасын бердік те, дүйсенбі күні бастайды деп келістік", - дейді Жұмағұлова. 

Бірақ сантехник жігіт сөзінде тұрмаған. Алдымен құрылыс материалдарына 26 мың теңге сұрайды, артынан материалдың тізімі мен түбіртекті көрсетемін деген. Сосын өз жұмысына алдын ала 15 мың теңге сұрап алыпты. Әлия оны да аударып жіберген.

"Ертесінде дүкенге бара жатсам, тағы қоңырау шалды. "Тәте, бензинім бітіп, көлігім от алмай жатыр, бес мың теңге жібере аласыз ба?" дейді. Жарайды дедім. Сөйтіп тағы ақша аудардым. Кешке қарай жұмысты бітіріп берді. Күйеуім жұмыстан шыға алмағаннан кейін өзім бардым. Бәрі дұрыс сияқты. Өзім де асығып тұрғанмын. Қалған 30 мың теңгесін аудардым да, жібере салдым", - деп атап өтті Жұмағұлова.  

Келесі күні Әлия пәтерге жолдасымен бірге барады. Сол жерде сантехникке алданғанын бір-ақ түсінген. Ол жаңа материал алмаған болып шықты. Оған қоса, пәтер иелері дайындап қойған құрылыс материалдарын да алып кеткен. Енді телефонын көтермейді.

184
Вакцина

Мамин президентке ай сайын 2 миллион адамға вакцина салынатынын айтты

30
Премьер-министрдің мәліметіне сәйкес, қыркүйек айында жалпы 10 миллион азаматқа екпе салынып, вакциналау жұмысы аяқталады

НҰР-СҰЛТАН, 13 сәуір — Sputnik. Қазақстан президенті Қасым-Жомарт Тоқаев премьер-министр Асқар Маминді қабылдады, деп хабарлады Ақорда.  

Қасым-Жомарт Тоқаевқа биылғы қаңтар-наурыз айларындағы еліміздегі әлеуметтік-экономикалық дамудың қорытындылары және санитарлық-эпидемиологиялық ахуал жөнінде есеп берілді.

Премьер-министрдің мәліметіне сәйкес, аталған кезеңде экономиканың нақты секторында орнықты дамудың оң қарқыны байқалады.

Асқар Мамин Қасым-Жомарт Тоқаевқа еліміздегі санитарлық-эпидемиологиялық ахуал жайында баяндады. Ауруханалардағы жұқпалы дертке шалдыққандарға арналған бөлімдердің – 41 пайызында, жан сақтау бөлімдердің – 27 пайызында науқастар ем қабылдап жатыр. Сәуір айынан бастап өңірлерде ай сайын 2 миллион адамға вакцина салынады. Қыркүйек айында жалпы 10 миллион азаматқа екпе салынып, вакциналау жұмысы аяқталады.

Оқи отырыңыз: Вакцина салдырған соң бетпердесіз жүруге бола ма – сарапшы пікірі 

Премьер-министрдің айтуынша, денсаулық сақтау жүйесі қажетті мөлшерде дәрі-дәрмектермен және медициналық жабдықтармен толық қамтамасыз етілген. Медициналық мекемелерде дәрі-дәрмектің бір айлық, ал "СҚ-Фармация" қоймалары мен дәріханаларда екі айлық қоры жинақталған. Еліміздің барлық өңірінде дәрі-дәрмектердің, қорғаныш құралдары мен шприцтердің үш айға жететін тұрақты қоры бар.

Сонымен қатар кездесу барысында мемлекеттік бағдарламаларды, Қазақстанның Еуразиялық экономикалық одаққа төрағалығының басым бағыттарын жүзеге асыру және инвестиция тарту, экономика саласын одан әрі цифрландыру, Үкіметтің жұмысына озық цифрлық шешімдер енгізу, халықты жұмыспен қамтуды қолдау, әлеуметтік маңызы бар тауарлардың бағасын тұрақтандыру жөнінде қабылданып жатқан шаралар туралы мәселелер талқыланды.  

Президентке 1 сәуірде өткен ОПЕК+ министрлер кездесуінің қорытындылары туралы мәлімет берілді. Онда Қазақстан үшін мұнай өндірудің тәуліктік көлемін қосымша 6 мың баррельге арттыруды көздейтін арнайы шарт келісілді. Тиісінше жыл қорытындысы бойынша мұнай өндірісінде едәуір серпін болуы тиіс.

30
Кілт сөздер:
коронавирус, вакцина
Тақырып:
COVID-ке қарсы вакцина
Касым-Жомарт Токаев - президент Казахстана

"Ол күн алыс емес": Тоқаев жамағатты сабырға шақырды

3167
(Жаңартылды 16:57 13.04.2021)
Президент эпидемиологиялық жағдайдың тұрақталатынына, мешіттердің толық ашылатын күні алыс емес екеніне сенім білдірді

НҰР-СҰЛТАН, 13 сәуір — Sputnik. Мемлекет басшысы Қасым-Жомарт Тоқаев Бас мүфти Наурызбай қажы Тағанұлын қабылдады, деп хабарлады Ақорда. 

Наурызбай қажы Тағанұлы Қасым-Жомарт Тоқаевқа Қазақстан мұсылмандары діни басқармасының жеті бағыт бойынша биылғы атқарып жатқан жұмыстары және алдағы жоспары туралы баяндады.

Мемлекет басшысына Қазақстан мұсылмандары діни басқармасының пандемия кезінде Оразаның ұйымдастырылу ерекшеліктері, жасап жатқан қайырымдылық шаралары жайында мәлімет берілді. Сонымен қатар елордада Ислам академиясын құру жұмыстарының басталғаны туралы айтылды.

Оқи отырыңыз: Тоқаев қазақстандықтарды Рамазан айының басталуымен құттықтады 

Қасым-Жомарт Тоқаев Қазақстан мұсылмандарын қасиетті Рамазан айының басталуымен құттықтап, бүкіл әлем бастан өткеріп отырған пандемия кезінде жамағатты сабырға шақырып, эпидемиологиялық жағдайдың тұрақталатынына, мешіттердің толық ашылатын күні алыс емес екеніне сенім білдірді.

ҚМДБ төрағасы, Бас мүфти президентті Рамазан айының алғашқы күнімен құттықтап, "Муфтият" баспасынан жақында жарық көрген "Тәпсірлердің таңдаулысы" атты Құран тәпсірлерінің қазақ және орыс тілдеріндегі 8 томдық аудармасын табыстады.

3167
Тақырып бойынша
Қасиетті Рамазан айы басталды
Бірнеше елде Рамазан айының басталуы кейінге қалдырылды
Алматыда Рамазан айында күн сайын 500 адамға ауызашар қоржыны жеткізіледі
Бас мүфти: Рамазан – адамды тақуалыққа үйрететін ай
Рамазан-2021: маңызды 10 сұрақтың жауабы
Рамазан - 2021: Ораза кестесі
Ан-26 ұшағының апатқа ұшыраған жері

"Кез келген сәтте тұтануы мүмкін еді": дәрігерлер ұшақ апаты кезінде қалай жұмыс істеді

0
Осыдан тура бір ай бұрын оңтүстік астананың әуежайына жақын маңда Ан-26 ұшағы апатқа ұшырады. Оқиға жайлы толығырақ Sputnik Қазақстан материалынан оқыңыз

НҰР-СҰЛТАН, 13 сәуір — Sputnik. 13 наурызда Алматы маңында апатқа ұшыраған ұшақтағы адамдарға алғашқы көмек көрсеткен жедел жәрдем қызметкерлері оқиғаның қалай болғанын және сол сәттегі өз сезімдері жайлы Sputnik Қазақстан тілшісіне айтып берді.

Алматы жедел жәрдем қызметі директорының міндетін атқарушы Пархат Надыров жедел жәрдем қызметкерлері апат болған орынға дабыл бойынша шұғыл жөнелтілгенін айтты. Жедел жәрдем қызметінің басшылығы жеке автокөлікпен тез арада оқиға орнына жеткен.

И.О. директора службы скорой помощи Алматы Пархат Надыров
© Sputnik/ Ольга Тонконог
Алматы жедел жәрдем қызметі директорының міндетін атқарушы Пархат Надыров

"Біз өте жылдам жеттік. Ол үшін жол полициясы қызметкерлеріне алғыс айтқым келеді. Мен олардың көлігін көрген сәтте тоқтап, аты-жөнімді, қызметімді және шұғыл түрде әуежайға жету керек екенімді айттым. Дабыл бойынша біздің барлық ішкі қызмет жұмылдырылып, он бригада әуежайға бет алды. Жақын маңда орналасқан ауруханаларға апат салдарынан зардап шеккендерді жаппай қабылдауға дайын болуы туралы ескертілді. Себебі о баста түрлі ақпарат келді. Бірі ұшақ десе, екіншісі тікұшақ апатқа ұшырады деді, тіпті кейбірі ұшақ аспанда жанып кетті деді", - деп еске алды Пархат Надыров.

Қоршаудан секіріп өтіп, апат орнына жетті

Ол оқиға орнына жеткен кезде Алматы облысының жедел жәрдем қызметкерлері бірінші болып жеткенін көрген. Надыровтың айтуынша, олар қоршаудан секіріп өтіп, өрт сөндірушілер тілсіз жаумен күресіп жатқанда, фельдшерлер жанып жатқан ұшақтан екі зардап шеккен азаматты алып шыққан. Осыдан кейін қалалық жедел жәрдем қызметі жетіп, аман қалғандар №4 қалалық ауруханаға жеткізілген.

"Осы ретте фельдшерлердің ерлігін атап өткім келеді. Олар үйлесімді түрде әрекет етіп, ұшақпен бірге жарылып кетуден қорыққан жоқ. Айналада керосин төгіліп жатты. Ол кез келген сәтте тұтануы мүмкін еді. Өмірлерін қауіпке тікті. Мұның барлығы менің көз алдымда болып жатты", - дейді Алматы жедел жәрдем қызметі директорының міндетін атқарушы.

Ол дәл сол фельдшерлер бір кездері алматылық станциялардың бірінде жұмыс істегенін айтты. Алайда белгілі бір себептермен облысқа көшкен. Бірақ қайта ауысқылары келген.

"Мен оларды біздегі жедел жәрдем қызметіне шақырдым. Енді олар осында еңбек етіп жатыр. Бұл олар жайлы айтуға да, жазуға да тұрарлық батыр азаматтар", - деді Пархат Надыров.

Батыр фельдшерлер

Рахымжан Гаитов пен Абдрим Абдрашитов Алматының жедел жәрдем қызметінде бір айдан бері жұмыс істеп жатқандарын растады.

Гаитов Рахимжан Аркинович
© Photo : из личного архива фельдшеров
Фельдшер Рахымжан Гаитов

Рахымжан Гаитов сол күні апат туралы қоңырау 17.50-де болғанын еске алды. Ең алдымен оның досы әрі әріптесі Абдрим Абдрашитов 10 бригада құрамында жолға шыққан. Одан кейін Гаитов мінген көлік жеткен.

"Ол келіп, зардап шеккен азаматқа көмек көрсетті. Пациентті алып кетті, мен сол жерде қалдым. Ұшақ құлаған орынға барып, тағы да зардап шеккендер бар-жоғын білу үшін кабинаға кірдім. Ол уақытта зардап шеккендердің бірін Алматы жедел жәрдемі, екіншісін менің досым мінген медицина көлігі алып кеткен болатын. Ол жерде тағы төрт адамның мәйіті жатты. Біз жеткен кезде Пархат Талғатұлы сонда болды, ол көмектесіп, нұсқау беріп отырды", - дейді фельдшер.

Рахымжан Гаитов түнгі сағат 10-ға дейін оқиға орнында кезекшілікте болған.

Абдрашитов Абдрим Зунунбекович
© Photo : из личного архива фельдшеров
Абдрим Абдрашитов

"Апат жайлы хабарлама келген кезде біз қайда бара жатқанымызды және не істеу керек екенімізді білдік. Сондықтан жедел іске кірісіп, ештеңені ойламастан, алғашқы көмек көрсетіп, адам өмірін құтқару керек болды. Осыны ғана ойладым", - деп еске алды Рахымжан Гаитов.

Өз кезегінде Абдрим Абдрашитов ол келген кезде ұшақтағы өрт сөндірілгенін айтты. Ол зардап шеккен азаматты ауруханаға жеткізген. Қалған бригадалар апат орнында жұмыс істеу үшін қалған.

"Әдеттегідей қоңыраудан кейін жеттік. Ұшақ күнде құлап жатпаса да, біз көңіл-күй  мен сезімді екінші орынға ысырып қоямыз. Біз Пархат Талғатұлының жетекшілік етуімен өте жылдам әрекет еттік. Көмек көрсеттік. Мен өз көңіл-күйім жайлы ойлаған жоқпын. Мен үшін ең бастысы кәсіби міндетімді атқару болды", - деді фельдшер.

Айта кету керек, фельдшерлер толық жазылғаннан кейін ұшқыштармен кездескілері келетінін айтты.

Алматы маңындағы ұшақ апаты

Сенбі, 13 наурызда Алматы әуежайының маңындағы Қызыл Ту ауылының іргесіне әскери ұшақ апатты жағдайда қонуға мәжбүр болған. Алайда Ан-26 ұшағы қону алаңына жақындағанда отқа оранып құлады.

Оқи отырыңыз: Әскери ұшақ апаты: оқиға орнынан түсірілген видео

Ұшақ бортында алты адам болған. Төрт әскери қызметші оқиға орнында қаза тапты. Олар: аға лейтенант Досжан Баймұратов, сержант Евгений Васильков, лейтенант Мұхтар Сағынбаев және майор Ғабит Барлықбаев.

Екі әскери ғана аман қалды. Олар апат орнынан №4 қалалық клиникалық ауруханаға шұғыл түрде жеткізілді. ық қауіпсіздік комитеті апатқа ұшыраған әуе көлігі ведомствоның авиация қызметіне қарасты екенін растады. Қазір ҰҚК оқиғаның анық-қанығын анықтап тергеу жүргізуде.

0
Кілт сөздер:
Алматы, ұшақ апаты
Тақырып бойынша
Алматы маңында құлаған ұшақ "қара жәшігін" тексеру басталды
Қазақстанда ұшақ апатынан көз жұмған әскерилерді жерлеу рәсімі өтті
Алматы түбіндегі ұшақ апаты: аман қалған екі әскери қызметкер есін жиды
Алматы түбінде ұшақ апатынан қаза болған әскеридің жұбайы: Әлі есеңгіреп тұрмын