Платные дороги в Казахстане

Ақылы жолдар мәселесі: көлік жүргізушілерінің наразылығы немен аяқталды

3882
Индустрия және инфрақұрылымдық даму министрлігі "ҚазАвтоЖол" ұсынған 18 жолдың бесеуінде ғана биыл ақылы жүйені енгізуге рұқсат берді

НҰР-СҰЛТАН, 9 маусым - Sputnik. Бүгін индустрия және инфрақұрылымдық даму министрлігінің биыл тек бес жол учаскесінде ғана ақылы жүйені енгізуге рұқсат бергені туралы ақпарат тарады. Бұған дейін "ҚазАвтоЖол" ұлттық компаниясы 2021 жылда 18 учаскені ақылы қыламыз деген, кейбір жолдарда ақша алу жүйесін сынақтан өткізуді де бастап кеткен. Бірақ осы жоспарды кейінге шегеруге тура келді. Sputnik Қазақстан тілшісі көлік жүргізушілерінің наразылығынан кейін тағы қандай өзгерістердің болатынын зерделеп шықты.

Әліповтың жоспары

Биыл ақпан айында Sputnik Қазақстан тілшісіне сұхбат берген "ҚазАвтоЖолдың" экс-басшысы Ұлан Әліпов республикалық маңызы бар 18 жолда ақылы жүйенің енгізілетінін айтқан. Соның ішінде 10 учаскеде тесттік режим іске қосылды. Олар:

  • Шымкент – Өзбекстан шекарасы (Ташкентке баратын жол);
  • Орал – Ресей шекарасы (Саратовқа қарай);
  • Орал – Ресей шекарасы (Самараға баратын жол);
  • Ақтөбе – Ресей шекарасы (Орынборға қарай);
  • Щучинск - Петропавл;
  • Шымкент - Қызылорда;
  • Шымкент - Тараз;
  • Тараз - Қайнар;
  • Қапшағай – Талдықорған;
  • Қостанай – Ресей шекарасы (Троицк).

Осы жолдарда ақылы жүйені енгізілетін инвестор да анықталған. Ол - Computer Vision Technologies. Компания әлемдік тәжірибе негізінде тиімді әрі арзан жүйені ұсынды. Оған сәйкес, бұрынғыдай шлагбаум қойып, барлық көлікті тізіп қоюдың қажеті жоқ. Ақылы жол толығымен ашық болады. Арнайы камералар өткен-кеткен көлікті тіркеп, төлемақыны автоматты түрде есептейді. Көлік иесі оны жолда немесе үйде отырып, аудара салады.

Бұдан бөлек, тесттік режимді тағы бірнеше жолда енгізу жоспары болған. Олар:

  • Нұр-Сұлтан-Павлодар;
  • Ақтөбе-Орал;
  • Қарабұтақ-Қызылорда;
  • Атырау-Бейнеу-Өзбекстан шекарасы;
  • Ақтау-Бейнеу;
  • Нұр-Сұлтан-Қостанай;
  • Павлодар-Омбы;
  • Павлодар-Семей-Қалбатау.

Осылайша, "ҚазАвтоЖол" ұлттық компаниясы биыл біраз жерде ақылы жүйені енгізуді жоспарлаған. Алайда сәуір айында президент Қасым-Жомарт Тоқаев компания басшысын қызметінен босатты. Негізгі себеп – жұмысты дұрыс орындамау. Мемлекет басшысы үкіметке республикалық және жергілікті жолдардың сапасын жақсартуды тапсырды. Өйткені дұрыс жөнделмеген жолдың шығыны екі есе көп болып тұр. Соның салдарынан бюджет қаржысы да тиімсіз жұмсалады.

Көлік жүргізушілерінің реакциясы

Тоқаевтың сынынан кейін мердігер компанияларға тиісті тапсырмалар берілді. Бақылау шаралары да күшейтілген шығар. Дегенмен, ол кезде тесттік режимге енгізілген жолдарға қатысты ешқандай шешім болмады. Ал мамырдың соңында жүк көліктерінің наразылығы бұрқ ете түсті. Бас кезінде жүргізушілер арасында жол ақысын енгізуге қатысты ақпарат тарап кеткен. Бәлкім, біреулер оны көлік иелерінің реакциясын білу үшін әдейі жіберген шығар. Дегенмен, реакцияның күші қатты болды. Батыста басталған наразылық Нұр-Сұлтанға дейін жетті. Жүздеген жүк көліктерінің жүргізушілері жолды жауып, ақылы жүйені алып тастауды талап етті. Жол ақысын енгізе берсе, тасымалдың бағасы, артынан азық-түліктің бағасы да көтерілетінін мәлімдеді. Оларға шенеуніктер мен ҚазАвтоЖолдың басшылары басу айтты.

Оқи отырыңыз: "ҚазАвтоЖол" ұлттық компаниясының жаңа басшысы тағайындалды

Артынан жүк көліктеріне жеңіл автомобильдер де қосылды. Қарапайым жүргізушілер ақылы жолдың қауіпсіздігін сынға алды. Ақша төлесе де, тиісті белгелер мен электронды таблолардың әлі күнге дейін орнатылмағанын айтты. Үй мен жабайы жануарлар да жолға шығып кетеді. Соның салдарынан жол-көлік апаты болып жатады. Ал көлік жүргізушілері жануардың кесірінен апатқа ұшыраса да, темір тосқауылдарды және тағы басқа белгілерді қиратып кеткені үшін қыруар қаржыны төлеуге мәжбүр.

Бүгін көлік жүргізушілерінің нарызылығы біршама басылды. Индустрия және инфрақұрылымдық даму министрлігі "ҚазАвтоЖол" ұсынған 18 жолдың бесеуінде ғана биыл ақылы жүйені енгізуге рұқсат берді. Олар:

  • Батыс Еуропа – Батыс Қытай (Қайнар – Тараз, Тараз – Шымкент, Шымкент – Қызылорда, Шымкент – Ташкент);
  • Щучинск – Көкшетау;
  • Қапшағай – Талдықорған (Талдықорғанның айналма жолымен бірге);
  • Нұр-Сұлтан – Павлодар;
  • Ақтау – Жетібай – Жаңаөзен, Нұр-Султан, Қарағанды мен Павлодардың айналма жолдары.

Айта кеткен жөн, ақылы жүйе бірден енгізілмейді. Жұмыс тобы әрбір учаскеге барып, жолдың сапасын тексереді. Техникалық талаптар толығымен орындалғаннан кейін ғана жолақысы алынады.

Жаңа жолдарда ақының көлемі қандай болады

Ақылы болатын бес жолда бұрынғы тарифтер қала береді. Бұл дегеніміз, бүгінде "Нұр-Сұлтан - Щучинск", "Нұр-Сұлтан - Теміртау", "Алматы – Қапшағай" мен "Алматы –Қорғас" жолдарында қандай төлем болса, биыл енгізілетін ақылы жолдарда тура сондай ақы алынады. Атап айтқанда:

  • жеңіл көліктер үшін 1 шақырымға - 1 теңге; Ал жолдың бойында орналасқан елді мекендердің тұрғындары 1 000 теңгеге бір жылдық абонемент ала алады;
  • автобустар үшін 1 шақырымға - 5-15 теңге (автобустағы орынның санына қарай); Қалааралық және жергілікті рейстік автобустар төлемақыдан босатылған;
  • жүк көліктері үшін 1 шақырымға – 5-25 теңге (жүк көтеру категориясына қарай).

Осылайша, ақылы болатын бес жол I-ші категорияға жатқызылды. Ал қалған 13 жол учаскесі II-ші және III-ші санатқа енгізіледі. Ол жерде жеңіл көліктер тегін жүреді. Ал автобустар мен жүк көліктері ақы төлейді. Бірақ оның мөлшері I-ші категориямен салыстырғанда төмен болады.

"Қазіргі кезде арнайы жұмыс тобы құрылды. Оған министрлік өкілдері, "Атамекен" ұлттық кәсіпкерлер палатасы, көлік тасымалдаушыларың қоғамдық ұйымдары кіреді. Жұмыс тобының отырыстарында II-ші және III-ші санатқа жататын ақылы жолдарда төлемақының мөлшерін бекіту мәселесі қаралып жатыр", - дейді "ҚазАвтоЖол" ұлттық компаниясының өкілі Бауыржан Қамалитден.

3882
Кілт сөздер:
ақылы жол, Қазавтожол
Ақорда ғимараты

Тоқаев екі әкіммен телефон арқылы сөйлесті

72
Президент Алматы әкіміне коронавирус індетінің таралуына жол бермеу бойынша жұмысты күшейтуді және шектеу шараларының сақталуын қатаң бақылауға алу жөнінде тапсырма берді

НҰР-СҰЛТАН, 4 тамыз – Sputnik. Мемлекет басшысы Қасым-Жомарт Тоқаев Алматы облысы мен Алматы қаласы әкімдерінің есебін тыңдады. Бұл туралы президенттің баспасөз хатшысы Берік Уәли Facebook-тегі парақшасында хабарлады.

Президентке Алматы облысының биылғы бірінші жартыжылдықтағы әлеуметтік-экономикалық дамуы жөнінде телефон арқылы баяндалды.

Амандық Баталовтың айтуынша, негізгі салалардың барлығында өсім қамтамасыз етіліп, қысқа мерзімді экономика көрсеткіші 109,4 пайыз болған.

Қасым-Жомарт Тоқаевқа аймақтағы эпидемиологиялық жағдай туралы мәлімет берілді. Облыс әкімі соңғы апта ішінде коронавирус індетін жұқтырғандардың саны 1 пайыздан аспағанын жеткізді. Өңірде 4 мың төсек-орын қарастырылған. Жұқпалы індет стационарының 55,8 пайызында, жансақтау бөлімдеріндегі орындардың 13 пайызында науқастар ем қабылдап жатыр.

Мемлекет басшысы сонымен қатар, тұрғындарды ауыз сумен қамтамасыз ету туралы мәлімет алды. Әкім облыста орталықтанған сумен қамту 98,3 пайыз болғанын және бұл еліміз бойынша ең жоғарғы көрсеткіштердің бірі екенін айтты. Биыл 7 ауылға су құбырын тартып, 11 елді мекенді таза ауыз сумен қамту арқылы көрсеткішті 99,5 пайызға жеткізу жоспарланып отыр. Бұл жобаға 10,9 миллиард теңге қаржы қарастырылған. Алдағы бес жылдың ішінде тағы 33 ауыл ауыз сумен қамтамасыз етіліп, 72 елді мекенде желілерді қайта қалпына келтіру жұмыстары жүргізіледі.

Президентке Амандық Баталов Үшарал қаласындағы әуежайдың ұшып-қону жолағын жөндеу жұмысының, Алакөл жағалауындағы су тазарту құрылғылары құрылысының басталғанын және ауыл әкімдері сайлауының қорытындысы туралы айтты.

Қасым-Жомарт Тоқаев бұқаралық спортты дамытуға және ішкі туризмді ілгерілетуге ерекше көңіл бөлуді тапсырды.

Бұдан кейін мемлекет басшысы Алматы қаласының әкімі Бақытжан Сағынтаевпен шаһардағы коронавирус індетінің таралуына қарсы атқарылып жатқан шаралар мен қаланың инфрақұрылымын дамыту мәселелерін телефон арқылы талқылады.

Бақытжан Сағынтаевтың айтуынша, "дельта" штамының таралуына байланысты Алматы қаласындағы эпидемиологиялық жағдай күрделі болып тұр. Өткен аптада індет жұқтыру 1,4 есе артып, 7 936-дан 10 805-ке жеткен. Бір тәулікте вирус жұқтыру 1,4 пайызға көбейген. Соңғы тәулікте жаңадан 1558 науқас тіркелсе, олардың 1480-інде індеттің белгілері бар.

Науқастар санының артуына байланысты қосымша жұқпалы аурулар ауруханалары ашылуда. Қазір 7625 науқас ем қабылдап жатыр, 2400 орындық төсек-орын қоры жасақталды.

Қаланың дәріхана желісін дәрі-дәрмекпен қамтамасыз ету мақсатында 5 миллиард теңге көлемінде тұрақтандыру қоры құрылды. 68 түрлі дәрі-дәрмектің қажетті мөлшері жасақталды. Қаланың медициналық ұйымдары дәрі-дәрмек пен жеке қорғаныш құралдарының екі айлық қорымен қамтамасыз етілген.

Тұрғындарға жаппай екпе салу жалғасып жатыр. Қалада 167 вакцина салу пункті жұмыс істеп тұр. 4 тамыздағы жағдай бойынша 740 487 адамға екпенің бірінші компоненті, 545 954 тұрғынға екінші компоненті салынған.

Мемлекет басшысы Алматы қаласының әкіміне коронавирус індетінің таралуына жол бермеу бойынша жұмысты күшейтуді және шектеу шараларының сақталуын қатаң бақылауға алу жөнінде тапсырма берді.

Әңгімелесу барысында Бақытжан Сағынтаев Қасым-Жомарт Тоқаевқа Наурызбай ауданына қосылған ықшам аудандардағы тұрғындарды сапалы ауыз сумен қамтамасыз ету және Абай даңғылын қала шекарасына дейін ұзарту жөнінде баяндады. Сонымен қатар қаланың тарихи орталығындағы құрылыстарды шектеу мәселелері көтерілді.

72
Тақырып:
Коронавирус эпидемиясы
Архивтегі сурет

Әкімдік 19 миллионыншы тұрғынның отбасына 1 млн теңге сыйға тартты

72
(Жаңартылды 17:59 04.08.2021)
Әкімдік нәрестенің отбасына балалар арбасын, сәби күтіміне арналған жиынтық, жеміс-жидек себеті мен басқа да сыйлықтар сыйлады

НҰР-СҰЛТАН, 4 тамыз – Sputnik. Алматы облысының әкімдігі Қазақстанның он тоғыз миллионыншы азаматы атанған Жәния Азаматқызының отбасына 1 миллион теңгенің сертификатын тарту етті, деп хабарлайды өңір әкімдігінің баспасөз қызметі.

Алматы облысы әкімінің орынбасары Арслан Дәндібаев пен Іле ауданының әкімі Бағдат Қарасаев сәбидің отбасымен кездесті. Шенеуніктер қыздың ата-анасын қуанышты күнмен құттықтап, мықты денсаулық және бақытты ғұмыр тіледі.

Сондай-ақ отбасына облыс әкімінің атынан құттықтау хат пен 1 миллион теңгенің сертификатын табыстады. Бұдан бөлек, балалар арбасын, сәби күтіміне арналған жиынтық, жеміс-жидек себеті мен басқа да сыйлықтар сыйлады.

Жәнияның әкесі Азамат Нұрғалиевтің айтуынша, бұл бүкіл отбасы үшін күтпеген оқиға болды.

"Біз басында сенген жоқпыз, қателесіп кеткен шығар деп ойладық. Учаскелік дәрігер хабарласып, бізді әкімдік іздеп жатқанын айтқанда ғана сендік. Біз қызымызды Қазақстанның лайықты азаматы етіп тәрбиелеуге тырысамыз", - деді ол.

Ал нәрестенің анасы Назгүл Көбентаева Жәния ол үшін ерекше бала екенін атап өтті.

Тағы оқыңыз: Қазақстанның он тоғыз миллионыншы тұрғыны туралы жаңа дерек шықты

"Жәнияны біз бес-алты жыл күттік. Қызымыз дүние есігін ашқан сәттен бастап бүкіл Қазақстанға танымал болды, болашақта да белгілі азамат болады деген үміттемін", - деді келіншек.

20 маусым күні Алматы қаласының перзентханасында Қазақстанның 19 миллионыншы тұрғыны дүниеге келді.

Сәби түнгі сағат екіде туды, салмағы – 4160 грамм , ал бойы – 57 см.

Нәрестенің ата-анасы – 1982 жылғы Азамат Нұрғалиев пен 1986 жылғы Назгүл Көбентаева Алматы облысы Іле ауданы Чапаево ауылында тұрады.

Жәния Азаматқызы – отбасындағы төртінші бала.

3 тамыз күні президент Қасым-Жомарт Тоқаев Twitter-де Қазақстан халқы 19 миллион адамға жеткенін хабарлады. Мемлекет басшысы он тоғыз миллионыншы азаматтың ата-анасы мен қазақстандықтарды осы қуанышпен құттықтады.

72
Кілт сөздер:
Алматы облысы, сәби, Қазақстан халқы
АҚШ полицейлері

АҚШ-тың гипердыбысты зымыраны тағы да сынақтан өте алмады