АЛМАТЫ, 15 маусым – Sputnik. Қазақстан теннис федерациясы Токиода өтетін Олимпиада ойындарына теннис турнирі бойынша кімдердің баратынын хабарлады.
"Қазақстан командасына ең үздік ойыншы Александр Бублик, сондай-ақ әйелдер триосы кіреді: Елена Рыбакина, Юлия Путинцева мен Ярослава Шведова. Шведова үшін бұл үшінші Олимпиада ойындары", - деп мәлімдеді федерацияның баспасөз қызметі.
Іріктеу талаптарына сәйкес, әр елдің төрт үздік теннисшісі ATP және WTA рейтингінің ТОП-56 қатарына кірсе және Дэвис кубогында немесе Федерация кубогында ел намысын қорғаған болса, ойындарға бара алады.
Оқи отырыңыз: Жапонияда жазғы Олимпиада ойындарының алау эстафетасы басталды – фото
Айта кетейік, Халықаралық олимпиада комитеті Токиодағы жазғы Олимпиада ойындарының қай күндері өтетінін бекітті. Жарыстар 2021 жылдың 23 шілдесі мен 8 тамызы аралығында өтеді.
