АСТАНА, 5 мамыр — Sputnik. Халықаралық ауыр атлетика федерациясы допинг-сынамасында тыйым салынған препараттар табылған үш қазақстандық зілтеміршіге қатысты санкциялар қолдану туралы ресми шешім шығарды, деп хабарлайды Қазақстан ауыр атлетика федерациясының баспасөз қызметі.
Халықаралық ауыр атлетика федерациясының дисциплинарлық комиссиясы шығарған шешімге сәйкес, Майя Манеза мен Зульфия Чиншанло екі жылға, ал Светлана Подобедова сегіз жылға шеттетілді. Бұл шешім Лондондағы Олимпиада допинг-сынамаларын қайта сараптамадан өткізу нәтижесінде тәртіп бұзушылықтар анықталған сәттен бастап, яғни 2016 жылғы 26 мамырдан күшіне енеді.
"Қазақстан Республикасының Ауыр атлетика федерациясының көмегімен спортшылар олимпиададан тыс алған марапаттаулары мен атақтарын сақтап қалды", — деп хабарлады ведомство.
Федерация атап өткендей, зертханалық сараптама және спорттық құқық саласындағы ҚР ауыр атлетика федерациясы құрған адвокаттар мен мамандар тобы бірнеше ай бойы қазақстандық спортшылардың реанализ нәтижелерін мұқият зерттеп, тергеу және сот процесінің барлық кезеңдерінде атлеттерге қолдау көрсеткен.
