АСТАНА, 20 ақпан — Sputnik. Қазақстандық боксшы Қанат Исламның командасы Бейбіт Шүменовпен ынтымақтастық орнату туралы ақпаратқа түсініктеме берді.
"Бейбіт Шүменов Қанат Исламның промоутері болды деген ақпарат жалған. Боксрек сайтына солай жазылып кетіпті. Хабарластық. 1-2 күнде өшіреді", — деп жазды "Қазақтың" командасы Instagram-дағы парақшасында.
Естеріңізге сала кетейік, кеше BoxRec.com сайты Бейбіт Шүменов Қанаттың жаңа промоутері болғанын хабарлады. Бұған дейін Қанат Исламның Шымкенттегі Royal Club Fitness & SPA базасында Шүменовтың жетекшілігімен дайындалып жүргені белгілі болған. Одан кейін Бейбіттің өзі промоутерлік компания құрып, қазақстандық былғары қолғап шеберлерін төрткүл дүниеге танытумен айналысатынын мәлімдеген еді.
