АСТАНА, 15 наурыз — Sputnik. Жолында кезіккенді тонап, ақшасын иемденіп кете беретін қарақшы бұл жолы күнделікті "тірлігіне" өзгеріс енгізіпті, деп жазады ladbible.
Дәлірек айтсақ, Хэюань қаласының банктерінің біріндегі бейнебақылау камерасына өте сирек кездесетін қызықты жайт түсіп қалды. Ли есімді қыз банкоматтан ақшасын шешіп алып жатқанда, қарақшының құрбанына айналады. Жігіт бойжеткеннің арқасына пышақ тіреп, қаражатын тартып алмақ болған.
Үрейі ұшқан қытай қызы қолында бар 2500 юаньді (144 мың теңгедей) ұсынады. Қарақшы тағы да ақша шешіп беруін талап етіпті.
Сол кезде кенеттен күтпеген жайт болды. Тонаушы қыздың шотында қаражат қалмағанын білгенде, жаны ашып, тартып алған ақшасын қайтарып берген.
Соған қарамастан құқық қорғау органдары ұрының бұл "қайырымдылығын" ескермей, ізін суытпастан қолға түсірді.
